استانادا جۇزەگە اسىرىلىپ جاتقان سمارت-جوبالار امەريكالىق عالىمداردى قاتتى قىزىقتىرۋدا. ءبىر قۋانارلىعى, ەلوردانىڭ ەسكى بولىگىندەگى «جاستار» شاعىن اۋدانىندا ەنگىزىلەتىن قاناتقاقتى جوبالارعا امەريكالىق تەحنولوگيالار قولدانىلادى. مۇنداي جاعىمدى جاڭالىقتى استانا راديوسىنىڭ «ەلوردا تىنىسى» باعدارلاماسىنا كەلگەن «Astana Innovation» اق باسقارما توراعاسى ولجاس سارتاەۆ جاريا ەتتى.
«جۋىردا امەريكالىق ۋنيۆەرسيتەتتىڭ وكىلدەرىمەن كەزدەستىك. ولار ءبىزدىڭ «اقىلدى» قالا باعىتىنداعى تاجىريبەمىزگە قىزىعۋشىلىعى بارىن بايقاتتى. سمارت-قالا بويىنشا ءوز جوبالارىن قولدانىسقا ەنگىزىپ جاتقاندارىن جەتكىزدى. كەزدەسۋ سوڭىنان امەريكالىق ستۋدەنتتەردى ەلورداعا جىبەرەتىنى جونىندە كەلىسىم جاسادىق» دەدى ولجاس سارتاەۆ.
سونداي-اق, قۇزىرلى مەكەمە باسشىسى ايگىلى «سكولكوۆو» ورتالىعىنىڭ رەزيدەنتتەرىن بيىل قۇرىلاتىن استانانىڭ «اقىلدى» اۋدانىندا ءوز تەحنولوگياسىن ەنگىزۋگە شاقىرعانىن مالىمدەدى. قاناتقاقتى جوبا رەتىندە ەلوردانىڭ ەسكى بولىگىندەگى «جاستار» شاعىن اۋدانى تاڭدالعان. ول جەردە جاڭا تەحنولوگيالار 10 باعىت بويىنشا قولدانىسقا ەنگىزىلەدى: اباتتاندىرۋ (جىلى تروتۋارلار, جىلىتىلاتىن جولدار); «اقىلدى» جاياۋ جۇرگىنشىلەر جولى جانە كولىك قوزعالىسىن جوسپارلاۋ; ساندىق-موبيلدىك كاسىپكەرلىك; «اقىلدى» ينفراقۇرىلىم (كوشەدەگى جارىقتار, جاڭبىر سۋىن اعىزاتىن ارىقتار); ەكولوگيالىق شەشىمدەر (كۇل-قوقىستى بولەك جيناۋ), قاۋىپسىزدىك.
ەلوردالىق اتا-انالار بۇعان دەيىن 1-ءشى سىنىپقا باراتىن بالاسىنىڭ قۇجاتتارىن مەكتەپكە تاپسىرۋعا قاتىستى قولايسىزدىقتارعا تاپ بولاتىن ەدى. استانادا ىسكە اسىرىلاتىن «اقىلدى» جوبالار بۇل ماسەلەنىڭ شەشىمىن تابۋعا جول اشتى. 1 ماۋسىم مەن 30 تامىز ارالىعىندا ولار بالانىڭ قۇجاتتارىن ەلەكتروندى-ساندىق قولتاڭبانىڭ كومەگىمەن e.astana.kz سايتىندا تاپسىرا الادى. «پورتال 24/7 تارتىبىمەن جۇمىس ىستەيدى. دەمەك, اتا-انالار ۇيىندە نەمەسە جۇمىس ورنىندا وتىرىپ-اق مەكتەپكە جازعان ءوتىنىشىن ونلاين-تارتىپپەن بەرە الادى» دەدى ولجاس سارتاەۆ. ونىڭ ايتۋىنشا, ءوتىنىش بەرۋشىلەر e.astana.kz سايتىنا كىرىپ, ەلەكتروندى مەكەنجايى مەن بايلانىس تەلەفوندارىن جازىپ, ءتيىستى قۇجاتتاردىڭ سكانەرلەنگەن كوشىرمەسىن قوسا سالادى. بالانىڭ مەكتەپكە قابىلدانعانى نەمەسە قابىلدانباعانى جونىندەگى حابارلاما ءوتىنىش بەرۋشى ازاماتتىڭ جەكە پاراقشاسىنا يا بولماسا ەلەكتروندى مەكەنجايىنا 5 جۇمىس كۇنى ىشىندە كەلەدى. قۇجاتتار تولىق تاپسىرىلماسا نەمەسە سكانەرلەنگەن نۇسقاسىندا كەمشىلىكتەر بولسا, ءوتىنىش كەرى قايتارىلادى. ال بالانى مەكتەپكە تىركەيتىن كەزدە اتا-انالار تۇپنۇسقا قۇجاتتارىن الا بارادى.
مۇنداي جۇيە بالانىڭ مەكتەبىن ءوز قالاۋى بويىنشا نەمەسە شاعىن اۋداننىڭ جاقىندىعىنا قاراي تاڭداۋعا مۇمكىندىك بەرەدى. شاعىن اۋدان بويىنشا مەكتەپ تاڭداعاندا اتا-انالار بوس قالعان ورىنداردىڭ سانى تۋرالى اقپارات الادى. سونىڭ ناتيجەسىندە ءوز تاڭداۋىن ۋاقىتىندا وزگەرتۋگە بولادى. ايتا كەتەرلىگى, بۇل جۇيە اتا-انالارعا وتە قولايلى. ال قۇجاتتى مەكتەپكە ءوز اياعىمەن بارىپ, ءوز قولىمەن تاپسىراتىنداردىڭ دا ەركى وزىندە. «ۇيىندە كومپيۋتەرى نەمەسە عالامتور جەلىسى بولماعان جاعدايدا, اتا-انالار ەلەكتروندى-ساندىق قولتاڭباسىن الىپ, جاقىن جەردەگى مەكتەپتىڭ كەڭەسشىسىنە بارا الادى. ەگەر ەلەكتروندى-ساندىق قولتاڭباسى بولماسا, وندا قۇجاتتاردى قاعاز تۇرىندە تاپسىرا الادى» دەپ ءتۇسىندىردى ولجاس سارتاەۆ.
ايتپاقشى, بالاباقشا كەزەگىنە دە تۋرا وسىنداي تارتىپپەن جازىلۋعا بولادى. «Astana Innovation» اق-نىڭ باسقارما توراعاسى «اقىلدى» جوبا تولىقتاي ەنگىزىلمەگەنىمەن بىرقاتار مەكتەپتەر مەن بالاباقشالاردا جۇمىس ىستەپ تۇرعانىن ايتتى. «سمارت-ەمحانا» ءموبيلدى قوسىمشاسى ارقىلى ەلوردالىقتار ۇيىندە وتىرىپ, ەمحاناداعى دارىگەردىڭ قابىلداۋىنا دا جازىلا الادى.
