7 ماۋسىم – تاعام قاۋىپسىزدىگى كۇنىنە وراي استانا قالاسى قوعامدىق دەنساۋلىق قورعاۋ دەپارتامەنتى «شاپاعات», «شانحاي», «كوك» بازارلارى سياقتى قالانىڭ بىرقاتار ساۋدا ورتالىقتارى مەن بالاباقشالاردا جانە مەكتەپ جانىنداعى لاگەرلەردە ءتۇرلى شارالار وتكىزدى.
ساۋدا ورتالىقتارىنداعى شارا بارىسىندا كەلۋشىلەر ساتىپ العان ازىق-تۇلىك تاۋارلارىن زەرتحانالىق تەكسەرىستەن وتكىزدى. مامانداردىڭ مالىمەتىنشە, بيىلعى بەس ايدا زەرتحانالىق تەكسەرىسكە 1836 سىناما الىنعان. الايدا ونىڭ 18 پايىزى نورماتيۆتىك كورسەتكىشتەرمەن سايكەس كەلمەگەن. كەيبىرىندە تاۋارلاردى تاڭبالاۋ جونىندە ماسەلەلەر تۋىنداسا, ەندى بىرىندە ميكروبتار كوپ بولىپ شىققان.
– شارانىڭ ماقساتى – ساتىپ الۋشىلارعا كەز كەلگەن تاعامنىڭ ساپاسىن, تازالىعىن, نيتراتتاردىڭ قۇرامىن بىلۋگە مۇمكىندىك بەرۋ. ەگەر پىسىرىلگەن ءونىم بولسا, تاماق دايىنداۋ دارەجەسى تەكسەرىلەدى. ەگەر ازىق-تۇلىك ساپاسى تالاپقا ساي بولماسا, ءونىم جەتكىزۋشىلەرگە قايتارىلىپ, اكت جاسالادى. ساتىپ الاردا الدىمەن ءونىمنىڭ قاپتاماسىنا, تاڭبالانۋىنا, ساقتاۋ ۋاقىتىنا نازار اۋدارۋ قاجەت, – دەيدى قوعامدىق دەنساۋلىق قورعاۋ دەپارتامەنتىنىڭ جەتەكشى مامانى اسەل امانوۆا.
ال بالاباقشالاردا بالعىندارعا پايدالى جانە قاۋىپتى تاعامداردىڭ تۇرلەرى تۋرالى ايتىلىپ, ءتۇرلى ويىندار ۇيىمداستىرىلدى.
