نۇرسۇلتان نازارباەۆ اتىنداعى حالىقارالىق استانا اۋەجايىنداعى اۆتوتۇراقتىڭ اقىسى قوعامدا داۋ تۋدىرىپ تۇر. ماسەلەن, اۋەجايدىڭ اۆتوتۇراعىنا ءبىر تاۋلىككە كولىگىن قالدىرعان ازامات 57 مىڭ تەڭگە كولەمىندە قارجى تولەگەن. بۇل ماسەلەنى Instagram الەۋمەتتىك جەلىسىنە بەلگىلى ءانشى قايرات باەكەنوۆ جاريالاپ, جۇرتشىلىقتىڭ جاعاسىن ۇستاتتى. سونداي-اق, قر پارلامەنت ءماجىلىسىنىڭ دەپۋتاتى سەرىك ساپيەۆ Instagram جەلىسىندە استانا اكىمى اسەت يسەكەشەۆكە اۋەجايداعى اۆتوتۇراق قۇنىنىڭ شەكتەن تىس قىمبات ەكەنىن ايتىپ, شاعىمدانعان بولاتىن.
جۇرتشىلىقتىڭ وسى شاعىمدارىنا بايلانىستى استانا قالاسى اكىمدىگىنىڭ ءباسپاسوز ورتالىعىندا ءتيىستى سالا باسشىلارى جاۋاپ بەردى. «استانا LRT» جشس كولىك باسقارماسى توراعاسىنىڭ ورىنباسارى رۋستام حاليلەۆتىڭ ايتۋىنشا, جۇرگىزۋشىلەرگە ارنالعان اۋەجايدا بىرنەشە تاڭداۋ بار.
– اۋەجايعا اۆتوكولىكپەن كەلگەن ازامات كولىگىن قىسقا مەرزىمگە تۇراققا قالدىرىپ كەتۋىنە بولادى. ماسەلەن, ءسىز اۋەجايعا كەلىپ جولاۋشىنى ءتۇسىرىپ, بىردەن قايتىپ كەتتىڭىز. ەگەر جۇرگىزۋشى اۆتوتۇراقتا 30 مينۋتتان از ۋاقىت تۇرسا, وندا ول ەشقانداي اقشا تولەمەيدى. الايدا ءبىرىنشى ساعات – 300 تەڭگە, ال كەلەسى ساعات ءۇشىن 1 500 تەڭگە تولەۋگە تۋرا كەلەدى. سونداي-اق, اۋەجايدا ۇزاق مەرزىمدە بەرىلەتىن جابىق اۆتوتۇراقتا, ءتىپتى تەرمينالدان ءسال وتسەڭىز تەگىن اۆتوتۇراق تا بار. مىسالى, اشىق اۆتوتۇراققا كولىگىڭىزدى قالدىرساڭىز, تاۋلىگىنە 2000 تەڭگە تولەيسىز. جالپى, ادامدار قاي اۆتوتۇراققا كولىگىن قويعىسى كەلسە, سوندا قويىپ كەتە الادى. ياعني, ءار ادام ءوز قالاۋى بويىنشا اۆتوتۇراق تاڭداي الادى. ال اقىلى اۆتوتۇراققا كەلەر بولساق, ءاربىر ادام بيلەت الاتىن كەزدە تاريفتىك جوسپاردى كورۋى كەرەك. ءسىز اۆتوتۇراققا كىرىپ كەلە جاتقاندا كورسەتىلگەن بارلىق ەرەجەمەن كەلىسەسىز. ياعني, بۇل ءتاريفتى تاڭداۋعا اركىمنىڭ قۇقىعى بار, – دەيدى ول.
رۋستام حاليلەۆتىڭ ايتۋىنشا, مۇنداي تاريف ازاماتتارعا قولايسىزدىق تۋدىرماس ءۇشىن جاسالىپ وتىر. ماسەلەن, بۇعان دەيىن تەمىر جول بەكەتىنە كولىگىن بىرنەشە كۇنگە تاستاپ كەتۋ جاعدايى انىقتالعان بولاتىن. سونىڭ سالدارىنان تەمىر جول بەكەتىندە كولىك كەپتەلىسى تۋىنداپ, قالا تۇرعىندارى مەن قوناقتارىنا كەدەرگى كەلتىرگەن ەدى. سوندىقتان دا اكىمدىك وسىنداي جاعداي قايتالانباس ءۇشىن اۋەجايدا اقىلى اۆتوتۇراق جۇيەسى ەنگىزىپ وتىر. ۇزىن ءسوزدىڭ قىسقاسى, سالا باسشىلارى اقىلى اۆتوتۇراقتىڭ كەپتەلىس ماسەلەسىن شەشەتىنىن ايتىپ, اقتالۋدا. سونداي-اق, رۋستام حاليلەۆ قىرۋار قارجى تولەگەن ازاماتتارعا جەڭىلدىك جاسالعانىن ايتتى. ياعني, قوس ازامات 2 مىڭ تەڭگەدەن تولەگەن. الايدا بۇدان كەيىن ازاماتتارعا ەشقانداي جەڭىلدىك جاسالمايدى.
سەرىك جولداسباي
