بىرىككەن اراب امىرلىكتەرى «ەكسپو-2017» حالىقارالىق مامانداندىرىلعان كورمەگە كاربوننان جاسالاتىن جوعارى تەحنولوگيالى ونىمدەردى ۇسىنباقشى.
بۇل تۋرالى كورمە ۇيىمداستىرۋشىسىنىڭ كەڭسەسىندە «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ پەن ساۋد ارابياسى كورولدىگىنىڭ ەنەرگەتيكا, ونەركاسىپ جانە مينەرالدى رەسۋرستار ءمينيسترى حاليد ءال فاليحپەن كەزدەسۋىندە بەلگىلى بولدى.
كەزدەسۋ بارىسىندا ۇلتتىق كومپانيا باسشىسى ءمينيستردى ەكسپو كورمەسىنىڭ دايىندىعى مەن قۇرىلىس بارىسىمەن تانىستىرىپ ءوتتى. «بارلىق جۇمىستار اياقتالۋعا تاياۋ. قازىرگى تاڭدا قاتىسۋشى مەملەكەتتەر پاۆيلوندارىن بەزەندىرۋمەن قارقىندى اينالىسىپ جاتىر. اراب ەلىنىڭ پاۆيلونى كەلۋشىلەرگە تارتىمدى, مازمۇنى جاعىنان وزگەشە بولاتىنىنا سەنىمدىمىن» دەدى ا.ەسىموۆ.
حاليد ءال فاليح ساۋد ارابياسىنىڭ كورمەگە قاتىسۋى ەكى ەلدىڭ ەكونوميكالىق قارىم-قاتىناسىن جانداندىرۋعا سەپتىگىن تيگىزەتىنىن ايتتى. مۇناي الەمدەگى ەڭ ماڭىزدى ەنەرگيا كوزى بولساداعى, ونى الماستىراتىن بالامالى ءونىمدى ىزدەۋ, پايدالانۋ ۋاقىتى كەلىپ جەتتى. وسىنى ۇعىنعان مۇنايلى مەملەكەت مۇناي جانە مينەرالدى رەسۋرستار مينيسترلىگىنىڭ اتاۋىن ەنەرگەتيكا, ونەركاسىپ جانە مينەرالدى رەسۋرستار مينيسترلىگىنە وزگەرتتى. جيىن سوڭىندا ءمينيستردىڭ ءوزى كورمەنىڭ اشىلۋ سالتاناتىنا قاتىساتىنىن مالىمدەدى.
گۇلدانا تالعاتقىزى
