الەۋمەتتىك جەلىلەردە تىيىم سالىنعان جانە سوت ەكسترەميستىك دەپ تانىعان «قازاقستاننىڭ دەموكراتيالىق تاڭداۋى» ۇيىمى 21 قىركۇيەكتە زاڭسىز نارازىلىق اكتسيالارىن وتكىزۋگە جانە وعان قاتىسۋعا شاقىرۋ تاراتۋىنا وراي, قازاقستان رەسپۋبليكاسى باس پروكۋرورىنىڭ ءبىرىنشى ورىنباسارى ب.اسىلوۆ «پروكۋراتۋرا تۋرالى» زاڭنىڭ 31-بابىنا قاتىستى ۇندەۋ جاسادى.
ۇندەۋدە دەسترۋكتيۆتى كۇشتەردىڭ الەۋمەتتىك قولداۋ شارالارى, مەملەكەتارالىق قاتىناستار تۋرالى جالعان اقپارات تاراتا وتىرىپ, حالىقتى اداستىرىپ, تارتىپسىزدىكتەر, الەۋمەتتىك جانە ۇلتتىق ارازدىقتى تۋدىرۋ ارقىلى قوعامدىق قاۋىپسىزدىككە قاۋىپ توندىرەتىنى, مۇنداي ارەكەتتەرگە زاڭمەن تىيىم سالىنعانى ايتىلعان. سول سەبەپتى قۇقىق قورعاۋ ورگاندارى زاڭ بۇزۋشىلارعا زاڭمەن بەلگىلەنگەن تارتىپتە قاتاڭ شارا قولداناتىن بولادى.
قازاقستان شەت ەلدىك ۇيىمدارمەن قىلمىسكەرلەردى بىرلەسىپ ۇستاۋ بويىنشا 69 كەلىسىم جاساعان, ولاردىڭ اراسىندا يتاليا, يسپانيا سياقتى ەۋروپالىق وداققا مۇشە ەلدەر دە بار. وسىنداي بىرىككەن جۇمىستاردىڭ ناتيجەسىندە سوڭعى بەس جىلدا ىزدەۋدە بولعان 356 ادام ەكستراديتسيالانعان.
قر باس پروكۋراتۋراسىنىڭ قوعامدىق مۇددەلەردى قورعاۋ قىزمەتىنىڭ باستىعى ساپاربەك نۇرپەيىسوۆتىڭ ايتۋىنشا, بيىلدىڭ وزىندە عانا سولتۇستىك ماكەدونيا, وڭتۇستىك كورەيا, بولگاريا سياقتى 5 مەملەكەتپەن كەلىسىم جاسالعان. «بۇل بىزدەگى قىلمىستىق-قۇقىقتىق رەفورمالارعا حالىقارالىق دەڭگەيدە سەنىم بار ەكەنىن كورسەتەدى. وسى پروگرەسس ءبىزدىڭ قىزمەتىمىزدە ءوز جەمىسىن بەرەدى دەپ ويلايمىن. اتالعان كەلىسىمدەردىڭ ارقاسىندا شەتەلدەردەن 53 ادام ەكستراديتسيالاندى. ءبىز 77 شەتەلدىكتى ۇستاپ بەردىك» دەگەن ساپاربەك نۇرپەيىسوۆ ەلگە قايتارىلعان قىلمىسكەرلەردىڭ بىرنەشەۋىنىڭ اتىن اتادى. «مىسالى, وزبەكستاننان مەحتيەۆ ەكستراديتسيالاندى. ول اقتوبە وبلىسىندا ورتەنگەن اۆتوبۋستىڭ 52 جولاۋشىسىنىڭ ولىمىنە كىنالى دەپ ىزدەلگەن بولاتىن. رەسەيدەن «ربك» بانكىنىڭ 172 ملرد تەڭگەسىن جىمقىرعان ج.ەرتاەۆ قايتارىلدى. گەرمانيا مەن ۋكراينا ونىڭ سىبايلاستارى بولعان يبراگيموۆ پەن قۇسايىنوۆتى ۇستاپ بەردى. گرۋزيادان قىزداردى ەسىرتكى كۋرەرى رەتىندە پايدالاناتىن قىلمىستىق توپ قۇرعانى ءۇشىن ىزدەۋ جاريالانعان سالامەح اتتى ادام قايتارىلدى» دەگەن باس پروكۋراتۋرا وكىلى قازاقستاندىقتاردى ارانداتۋشىلىقتان اباي بولۋعا شاقىردى, سونداي-اق ۇگىت-ناسيحات جۇرگىزىپ, حالىقتىڭ اراسىنا ىرتكى سالعىسى كەلەتىن 8 ۇيىمنىڭ بۇگىندە زاڭ جۇزىندە ەكسترەميستىك توپ دەپ تانىلعانىن كەلتىردى. ولاردىڭ قاتارىندا مۇحتار ابليازوۆ توبى دا بار. ونىمەن بىرگە جۇمىس ىستەگەن 42 ادام سوتتالعان. جالپى بيۋدجەتكە كەلتىرگەن شىعىنى 7,5 ميلليارد دوللار بولىپ وتىر. بيۋدجەت قارجىسىن جىمقىرۋ ارقىلى سىرتقا شىعارعان اقشاسىنىڭ 1 ميلليارد دوللاردان استامى ەلگە قايتارىلعان. جۇمىستار ءالى جالعاسۋدا. «حالىقتىڭ قارجىسىن ۇرلاعان ادام ەندى حالىقتى بيلىككە قارسى ۇگىتتەپ وتىر. وسىدان اباي بولۋىمىز كەرەك» دەدى پروكۋراتۋرا وكىلى.
جادىرا شامۇراتوۆا
