«ەلوردا اقپارات» مەديارەسۋرسى مەن «استانا» راديوسىنىڭ بىرلەسكەن جوباسى – «ەلوردا تىنىسى» راديوحابارىنىڭ كەزەكتى شىعارىلىمىنداعى سۇحبات ەتيكالىق كودەكس پەن مەملەكەتتىك قىزمەتشىنىڭ مىنەز-قۇلىق نورمالارى تاقىرىبىندا ءوربىدى. ستۋديا مەيمانى استانا قالاسى اكىمى اپپاراتى باسشىسىنىڭ ورىنباسارى, ەتيكا جونىندەگى ءۋاكىلەتتى وكىلى يمين سابيروۆ تىكەلەي ەفيردەگى سۇحبات بارىسىندا مەملەكەتتىك قىزمەتشىلەرگە ازاماتتار تاراپىنان تۇسەتىن شاعىمدار جايلى اڭگىمەلەدى.
– وزدەرىن قاناعاتتاندىرماعان جاعدايلار تۋرالى ايتۋدان تارتىنبايتىن ازاماتتاردان ارىز-شاعىمدار كوپ تۇسەدى. سولاردىڭ ىشىندە بىلتىرعى 16 شاعىم مەن بيىلعى بىرنەشە ءوتىنىش ەسىمدە ەرەكشە ساقتالىپ قالىپتى. شاعىمدا كوتەرىلگەن ماسەلەلەر ءارتۇرلى. سونىڭ ىشىندە جۇمىس ورنىنداعى تارتىپسىزدىك تە بار. قالالىقتاردىڭ ءبىرى تۇرعىن ءۇي باسقارماسىنا شاعىمدانعان كەز دە بولدى. ءبىز بۇل ماسەلەنى قاراستىرعاندا باسقارما باسشىسى ەتيكالىق نورمالاردى بۇزعان مەملەكەتتىك قىزمەتشىمەن بىرگە شاقىرىلدى. شاعىمدانۋشى مەملەكەتتىك قىزمەتشىنىڭ جۇمىس ۇستەلىندە بۋتەربرود تۇرعانىن جاقتىرماعان ءتارىزدى. سول ءۇشىن بىزگە شاعىم تۇسىرگەن. ولار ءتىپتى وسىنداي جاعدايعا دا نازار اۋدارادى, – دەيدى يمين سابيروۆ.
ونىڭ ايتۋىنشا, قارالعان ماسەلەلەردىڭ ەڭ كۇردەلىسى قازاقستان حالقى اسسامبلەياسى ەتنومادەني بىرلەستىكتەرى توراعالارىنىڭ اكىمدىك قۇرىلىمدىق بىرلەستىگىنىڭ جەتەكشىسىنە شاعىمدانعان كەزى بولىپتى.
– اسسامبلەياعا قاراستى 17 ەتنومادەني بىرلەستىكتىڭ ءتوراعاسى اكىمدىكتىڭ قۇرىلىمدىق ءبىرلەستىك جەتەكشىسىنىڭ ۇستىنەن ونىڭ ادەپسىزدىك تانىتىپ, ونىمەن قويماي وزىنە جۇكتەلگەن مىندەتتى تيىسىنشە ورىنداماعانى ءۇشىن شاعىم ءتۇسىرىپتى. بۇل دەرەك بويىنشا پرەزيدەنت اكىمشىلىگى قىزمەتكەرلەرىنىڭ قاتىسۋىمەن ءتورت وتىرىس ءوتكىزدىك. بۇل ءوتىنىش وتە مۇقيات قارالدى. ءناتيجەسىندە قالا باسشىلىعىنا سول ديرەكتوردى جۇمىستان بوساتۋعا ۇسىنىس جىبەرىلدى, – دەيدى ي.سابيروۆ.
ەتيكا جونىندەگى ۋاكىلەتتى وكىل سونىمەن قاتار مەملەكەتتىك ورگانداردىڭ لاۋازىمدى تۇلعالارىنا, سونداي-اق كۆازيمەملەكەتتىك كاسىپورىن باسشىسىنا دا ۇجىمدىق شاعىمداردىڭ تۇسكەنىن اتاپ ءوتتى.
– اۋدان اكىمدىگىندە جەرگىلىكتى اتقارۋشى ورگاننىڭ اپپارات باسشىسى لاۋازىمىنداعى تۇلعانىڭ ۇستىنەن دە شاعىمداندى. سودان اپپارات باسشىسى سويلەسۋگە شاقىرىلىپ, بۇل تۋرالى اكىمگە اقپارات بەرىلدى. بىراق بۇدان كەيىن ول قىزمەتكەر جۇمىستان بوساتىلدى, – دەگەن ەتيكا جونىندەگى ۋاكىلەتتى وكىل, – تاعى بىردە ادەپسىزدىك كورسەتكەنى تۋرالى اكىمدىككە قارايتىن كاسىپورىن, ياعني كۆازيمەملەكەتتىك سەكتوردىڭ باسشىسىنا ۇجىمدىق شاعىم كەلىپ ءتۇستى. ول قىزمەت كورسەتۋدە ەرەكشە جەڭىلدىكتەر سۇراپ, تالابى ورىندالماعان كەزدە قىزمەتىن اسىرا پايدالانباق بولىپتى. ەتيكا جونىندەگى ۋاكىلەت بۇل ىسكە قاتىستى شەشىمدى تەك زاڭعا سايكەس, ونى جازالاۋ كەرەكتىگى جونىندە مەملەكەتتىك ورگانعا ۇسىنىس جاسادى. ءبىلۋىمشە, ول جازاسىن الدى دا, – دەيدى.
ەتيكا جونىندەگى ۋاكىلەتتى وكىل ءسوز سوڭىندا ازاماتتاردىڭ مەملەكەتتىك قىزمەتشىلەردىڭ تەرىس ارەكەتىن بايقاعان جاعدايدا بەلسەندىلىك تانىتىپ, وعان جۇگىنۋگە بولاتىنىن ايتتى.
