سوڭعى كۇندەرى الەم جۇرتى ەلەڭدەسكەن ەلەۋلى وقيعالاردىڭ ءبىرى رەسەي سىرتقى ىستەر ءمينيسترى سەرگەي لاۆروۆتىڭ 31 مامىردا توعىز جىلدىق ۇزىلىستەن كەيىن كحدر-عا رەسمي ساپارمەن بارعانى بولدى. ساراپشىلار سونىمەن بىرگە ونىڭ كيم چەن ىن بيلىك باسىنا كەلگەلى بەرى قابىلداعان رەسەيلىك ءبىرىنشى مەملەكەت قايراتكەرى ەكەنىن دە ايتىپ جاتىر. ال كورشى ەل سىرتقى بايلانىس ۆەدومستۆوسى باسشىنىڭ سولتۇستىك كورەيا مەن اقش ءسامميتى قارساڭىندا پحەنيانعا نەگە بارعانىن, مۇنداعى كەلىسسوزدىڭ نەندەي تاقىرىپقا ارنالعانىن بولجاۋ قيىن ەمەس.
مالايزيا ساراپتاماعا سەنگەن جوق
مالايزيا كولىك ءمينيسترى ەنتوني لوك ءوز ەلىنىڭ «بوينگ» جولاۋشىلار ۇشاعىنىڭ اپاتىنا بايلانىستى رەسەيگە تاڭىلىپ وتىرعان ايىپتاۋدى دالەلسىز دەپ مالىمدەدى.
بۇدان بۇرىن حالىقارالىق تەرگەۋشىلەر توبى تەرگەۋ اراسىنداعى كەي تۇجىرىمدارعا سۇيەنە كەلىپ, اتالمىش لاينەردى رەسەيدىڭ كۋرسكىدەگى 53-ءىنشى زەنيت-راكەتالىق بريگاداسىنا قاراستى «بۋك» كەشەنى اتىپ ءتۇسىرگەن دەگەن پىكىر بىلدىرگەن بولاتىن. بىراق رەسەي قورعانىس مينيسترلىگىندەگىلەر سول بويدا مۇنىڭ شىندىققا جاناسپايتىنىن ايتتى. ماسكەۋ سونداي-اق تەرگەۋدىڭ رەسەي جاعى كەلتىرىپ وتىرعان ءۋاج بەن كۋالاردىڭ ايتقاندارىن قاپەرگە الىپ وتىرماعانىن سىنادى.
وقيعا 2014 جىلدىڭ شىلدەسىندە بولدى. امستەردامنان كۋالا-لۋمپۋرعا قاراي MH370 رەيسى بويىنشا ۇشىپ بارا جاتقان Boeing 777-200 اۋە كەمەسى دونەتسك وبلىسى ۇستىندە اتىپ ءتۇسىرىلدى. سول ساتتە ۇشاقتىڭ بورتىندا 298 ادام بار ەدى. «الماز-انتەي» اۋە شابۋىلىنا قارسى جۇيەسىن جاساۋشى كاسىپورىننىڭ ساراپشىلارى ونىڭ ۋكراين اسكەرلەرى اتقان زەڭبىرەكتىڭ وعىنان قۇلاعانىن ءبىلدىردى.
«ءولدى دەگەن باتىرىڭ وگىز ءمىنىپ كەلەدى»
ۋكراينادا قىزمەت ەتەتىن رەسەيلىك جۋرناليست اركادي بابچەنكونىڭ «اتىپ ولتىرىلگەنى» جالعان اقپار بولىپ شىقتى.
مۇنىڭ الدىندا ۇيىندە وتىرعان ءجۋرناليستى پاتەرىنە باسىپ كىرگەن بەيتانىس بىرەۋلەردىڭ تۋ سىرتىنان كەلىپ اتقانى, ونىڭ جەدەل جاردەم كولىگىمەن اۋرۋحاناعا اپارىلا جاتقان جولدا جان ءتاسىلىم ەتكەنى حابارلانعان ەدى. بىراق ارتىنشا ۇلتتىق پوليتسيا مالىمدەگەندەي, «ءولدى دەگەن باتىرىڭ» ءتىرى بولىپ شىقتى.
بابچەنكونىڭ ءوزى ۋكراينا قاۋىپسىزدىك قىزمەتىندە وتكەن ءباسپاسوز ءماسليحاتىندا بولعان جايدى ايتىپ بەردى. سويتسە, وپەراتسيانى وسى ورگان جۇرگىزگەن ەكەن. ول مۇنى جۋرناليستكە جاسالعالى جاتقان قاستاندىقتىڭ الدىن الىپ, ونى ورىنداۋشىنى ءىس ۇستىندە قولعا ءتۇسىرۋ ءۇشىن ۇيىمداستىرىپتى.
الايدا ۋكراين قاۋىپسىزدىك قىزمەتىنىڭ بۇل بوپسالاۋ ارەكەتىن الەمنىڭ كوپتەگەن جەتەكشى اقپارات قۇرالدارى, سونىڭ ىشىندە اقش پەن بريتانيانىڭ تەلەارنالارى مەن باسىلىمدارى قاتتى سىنادى.
مەكسيكا قورعانعا اقى تولەمەيدى
مەكسيكا پرەزيدەنتى ەنريكە پەنيا نەتو اقش-تىڭ ەكى ەل شەكاراسىندا تۇرعىزىپ جاتقان قابىرعا-قورعاننىڭ قۇرىلىسى ءۇشىن ءبىر تيىن دا تولەمەيتىنىن ايتتى.
مۇنى ول ءوزىنىڭ Twitter الەۋمەتتىك جەلىسىندە جازدى. «پرەزيدەنت دونالد ترامپ. جوق. مەكسيكا قابىرعا ءۇشىن ەشقاشان ەشتەڭە تولەمەيدى. قازىر دە, كەيىن دە. قۇرمەتپەن, مەكسيكا ء(بىز ءبارىمىز)» دەلىنگەن حابارلامادا.
اڭگىمە اقش پرەزيدەنتى دونالد ترامپتىڭ 29 مامىر كۇنى ءوزى ءجيى پايدالاناتىن جەلىدە مەكسيكا بيلىگىنىڭ شتاتتارعا جاسىرىن جولمەن وتۋگە تالپىنۋشىلار تاسقىنىن توقتاتۋعا كومەكتەسپەيتىنىنە نارازىلىق تانىتۋىنان تۋىپ وتىر. ول ءوز جازباسىندا مەكسيكانى شەكاراداعى قورعان قۇرىلىسىنا اقشا بەرۋگە ءماجبۇر ەتەتىنىن بايانداعان ەدى.
