ارحيۆ قۇجاتتارىنىڭ تانىلۋى, ولاردىڭ عىلىمي باعىتتا قولدانىلۋى, قازاقستان تاريحى مەن ونىڭ استاناسىنا قاتىستى جاڭا قۇجاتتىق قورلاردىڭ جيناقتالۋى ەلىمىز ءۇشىن ايتارلىقتاي ماڭىزعا يە. سول ورايدا ۇلت تاريحىنا قاتىستى قۇندى قۇجاتتاردى استانا مەملەكەتتىك ءارحيۆى تمد ەلدەرىنىڭ ارحيۆتەرىنەن جانە الىس-جاقىن شەتەلدەردەن ىزدەستىرۋ, كوشىرمەلەرىن ارحيۆ قورى قۇجاتتارىنىڭ قاتارىنا قوسۋدا ءتۇرلى ءىس-شارالار جۇرگىزىلۋدە. ارىپتەستىك كەلىسىم نەگىزىندە ءارحيۆتىڭ №430 قورىن قۇرۋدا ۇلكەن جۇمىستار اتقارىلدى. بۇل قوردا ەلىمىزدىڭ ءتۇرلى تاريحي كەزەڭىنە قاتىسى مول قۇجاتتار كەزدەسەدى.
دۇنيەجۇزىلىك پوشتا كۇنى قارساڭىندا اتالعان قور قۇجاتتارىنىڭ ىشىنەن ءحىح عاسىرداعى وڭىرىمىزدە قىزمەت ەتكەن پوشتالارعا قاتىستى دەرەك جاريالانادى.
ۇسىنىلعان قۇجات 1861, 1893 جىلدارداعى اقمولا وڭىرىندە جاڭا پوشتالاردىڭ قۇرىلىسى, قىزمەت كورسەتۋ ساپاسىنا قاتىستى وزگەرتۋلەر بويىنشا ءوڭىر گۋبەرناتورلارىنىڭ اتىنا جازىلعان ۇسىنىستار جانە دە پوشتا مەكەمەلەرىنىڭ ءتىزىمى كەلتىرىلگەن.
قاي ەلدە, قاي كەزەڭدە بولماسىن ايماقتاردىڭ حات-حابار الماسۋىن جۇزەگە اسىراتىن پوشتا بايلانىسىنىڭ ماڭىزى زور بولعان. حالىقارالىق پوشتا – الەمدەگى بايلانىستىڭ ەڭ ۇزاق جەلىسى. بۇگىندە پوشتا قىزمەتى ەڭ ءتيىمدى, سەنىمدى ءارى ارتىق شىعىنسىز جەتكىزۋدىڭ جولى بولىپ ەسەپتەلىنەدى.
