«جۋرناليستەر – جۇرەك جىرشىسى. ادامزات ىشىندەگى ەڭ جۇردەك جاندار – جۋرناليستەر. جۋرناليستەردىڭ بارمايتىن جەرى, شىقپايتىن شىڭى جوق. جۋرناليستەر – كورەگەن حالىق. جۋرناليستەر 4 موتورلى ۇشاققا ۇقسايدى. ولار – ءارى اقىن, ءارى تاريحشى, ءارى سۋرەتشى, ءارى عالىم. وسى 4 «موتور» جەردەگى جازۋشىنى بيىككە سامعاتادى» دەگەن ءازىلحان نۇرشايىقوۆتىڭ اسىل سوزدەرىنىڭ استارىندا تالاي سىر بار. الايدا, سول موتورلى ۇشاقتىڭ بيىك شىڭداردا قالىقتاپ ءجۇرىپ, ءبىر كۇنى جەرگە قوناتىنى اقيقات قوي.
«ولاردىڭ ەسىمى جۇرەگىمىزدە» اتاۋىمەن «تۇگەل مەديا» بىرلەستىگىنىڭ يگى باستاماسىمەن, بيىل ەكىنشى جىل وتكىزىلىپ وتىرعان, سانانىڭ سۇڭقارلارىن ەسكە الۋ كەشى ءوتتى. ساعىنىش پەن نازعا تولى اسەرلى كەزدەسۋدە كوزىنە جاس الماعان جان قالمادى. بارلىعىمىز جانتالاس تىرشىلىكتىڭ جەتەگىندە ءجۇرىپ, كەيىنگى جىلدارى ارامىزدان تالاي قالامگەرلەرىمىز ءومىردەن وزعانىن بىلمەي دە قالىپپىز. قارا ءسوزدىڭ شەبەرى, ارداگەر-جۋرناليست اسكەن نابيەۆ اتامىز, ەڭ كوپ وقىلاتىن جازۋشىلارىمىزدىڭ ءبىرى – قابىرعالى قالامگەرىمىز دۇكەنباي دوسجان, بار سانالى ءومىرىن انا ءتىلىمىزدىڭ مارتەبەسىن كوتەرۋگە ارناعان سابىرجان شۇكىرۇلى مەن ەربول شايمەردەن اعالارىمىز, ەلباسىنىڭ جەكە تەلەوپەراتورى قىزمەتىن اتقارعان باقتىباي شاحانوۆ تا باقيلىققا اتتانىپتى. سونىمەن قاتار, «نيۆانىڭ» جۇمىسىن دوڭگەلەتەم دەپ ءجۇرىپ, ءوزىنىڭ جۇرەگىنىڭ قاشان سىر بەرگەنىن اڭعارماي قالعان ۆلاديمير گۋندارەۆ پەن بەلگىلى اقىن, وسى ءوڭىردى جىرلاعان اندرەي تريشەچكين مەن ەلىمىزدىڭ ءجونى بولەك باسىلىمى «كازپراۆداعا» عۇمىرىنىڭ الپىس جىلىن بەرگەن يۆان بالۋچەۆسكيلەرمەن سول كەشتە قايتا قاۋىشقانداي بولدىق. بۇل ءتىزىمنىڭ ىشىندە اياۋلى دا ارداقتى نازىك جاندىلارىمىزدىڭ دا ورىن الۋى قابىرعامىزدى قايىستىرادى. تالانتتى اقىن – مارفۋعا بەكتەمىروۆا مەن نەبارى 42 جاسىندا «ەل-بەسىگىن» قيماي كەتكەن ناتاليا حاباروۆا-زەلەنيا جازىلماس دەرتتىڭ قۇربانى بولعان.
ساعىنىشتان توگىلگەن جاستارىن تىيا الماي, جۇرەك تۇبىندە قالعان لەبىزدەرىن حالىقپەن بولىسۋگە كەلگەن, مارقۇمداردىڭ, تۋعان-تۋىس, دوس-جاراندارىنىڭ اڭگىمەسىنەن, بەلگىلى تۇلعالارىمىزدىڭ بەيمالىم سىرلارىنا قانىقتىق. بۇگىندە ۆولگوگراد قالاسىنىڭ ءبىر كوشەسى اسكەن نابيەۆ ەسىمىمەن اتالاتىنىڭ ەكىنىڭ ءبىرى بىلە بەرمەيدى دە. ساحناعا قوس نەمەرەسىن, دۇكەنباي اعامىزدىڭ شامشىراقتارى, ءابىلحايىر مەن التايىن ەرتە شىققان ساۋلە دوسجانوۆا اپايىمىزدىڭ: «وتىز جىل بىرگە تۇرىپ, اعامىزدىڭ سوڭعى دەمىندە ءبىر اۋىز ءسوزىن ەستي الماي, قوشتاسۋعا ۇلگەرە الماعاندىعى جانىنىڭ جازىلماس دەرتى, ىشكى كۇيىگى ەكەندىگىن» كوز جاسىنا ەرىك بەرە ايتقاندا, كوز الدىمىزعا اسىل ەرىن ارداقتاعان, قازاق ايەلىنىڭ بەينەسى كەلگەندەي. ءسوز ونەرىندە وزا شاۋىپ, سەرگەك جۇرەتىن ەربول شايمەردەندى دە سۇم اجال الپىسقا جەتكىزبەي, ورتامىزدى ويسىراتتى. قيماستىقپەن ەسكە العان كۋرستاستارى, ونىڭ ءۇش تومدىق شىعارمالار جيناعىن حالىققا ۇسىنىپ, ونىڭ جالعاسى ءالى دە جارىققا شىعاتىنىنا ۋادە بەردى. قازاق جۋرناليستەرىنىڭ ىشىندە ساۋىتبەك ابدراحمانوۆتان كەيىن, كۇللى دۇنيە ءجۇزىنىڭ كوپتەگەن ەلدەرىنە تابانى ەڭ كوپ تيگەن, ەلباسىنىڭ بارلىق ساپارلارىنىڭ كۋاگەرى – باقتىباي شاحانوۆ جايلى ءبىر ۇزىك سىر شەرتكەن بەلگىلى عالىم, جۋرناليست باۋىرجان وماروۆ: «ومىرگە رياسىز عاشىق, شامداعاي شيراق جىگىتكە قالايشا الپىس جاستى قيامىز دەپ جۇرگەنىمىزدە, بەيمەزگىل ومىردەن ءوتىپ كەتتى» دەيدى.
بەلگىلى قازاقستاندىق اقىن, پروزايك, پۋبليتسيست, رەسپۋبليكالىق ادەبي-كوركەمدىك, قوعامدىق-ساياسي «نيۆا» جۋرنالىنىڭ باس رەداكتورى بولعان ۆلاديمير گۋندارەۆتىڭ اسىل جارى رايسا نيكيتيچنامەن تانىسىپ, سۇحباتتاستىق. ساحنادا گۋندارەۆتىڭ «دەرەۆەنكا مويا» ءانى وينالا باستاعاننان, جان جۇرەگى ليريكاعا تولى, ادامدى وزىنە اسا ءبىر نازىكتىكپەن باۋرايتىن رايسا اپايىمىزدىڭ ساعىنىشقا تولى مولدىرەگەن كوز جاسىن كورگەندە, كوكەيگە كوپ نارسەنى تۇيگەندەي بولدىق. جۇرەگىنىڭ تورەسىنەن ايىرىلعان رايسا نيكيتيچنانىڭ ءبىر عانا ءوتىنىشى – جاناشىرسىز قالعان «نيۆا» جۋرنالىن قايتا جاڭعىرتسا ەكەن دەپ تىلەيدى. اقپاراتتىڭ اعىمىنا ىلەسە ءجۇرىپ, اقىندىق قابىلەتىن اياققا تاپتاتپاي, وزەگىن جارىپ شىققان ولەڭدەرىمەن ەلدى باۋراعان كوكشەنىڭ ارداقتى قىزى, ءوز «اتلانتيداسىنا» ەرتە اتتانعان مارفۋعا بەكتەمىروۆانى ەسكە الۋعا كەلگەن جۇبايى, اقىن ەسەنگەلدى ءسۇيىنوۆ پەن اناسىن قيماي, ءسوز الۋعا جۇرەكسىنگەن قىزى كوزىمىزگە جاس ءۇيىرتتى, مارفۋعا اپامىزدىڭ ءانى مەن سوزىنە جازىلعان «اق قايىڭ» ءانىنىڭ ىرعاعىنا بولەندىك. جۋرناليستەر كۇنىندە دۇنيەگە كەلىپ, قىرىق ەكى جىلدان كەيىن ءدال وسى مەرەكە قارساڭىندا ارىپتەستەرىن قۇتتىقتاۋعا ۇلگەرە الماعان ومىرگە عاشىق, كوڭىلى اشىق ناتاليا حاباروۆانىڭ ايىقپاس دەرتتەن كوز جۇمعانى جانعا باتادى. ءومىرىنىڭ سوڭعى ساتتەرىنە دەيىن ءبىر قولمەن عانا كومپيۋتەردە وتىرىپ, جۇرەك تامىرلارى ءبىر جاق قولىنا عانا قان جۇگىرتكەنىنە قاراماستان, سول ايالى الاقاندارىمەن, تانىستارىنا: «سەندەردىڭ مەنىڭ ومىرىمدە بار بولعاندارىنا راحمەت!» دەپ سمس حابارلامالار جىبەرىپ وتىرعان.
P.S.: جۇمىر جەر بەتىن اقپاراتپەن توعىستىراتىن ءسوز ساردارلارىنىڭ سانى كۇن ساناپ ازايۋدا. 2011 جىلى جەر بەتى 107 جۋرناليستىنەن ايىرىلسا, 2012 جىلى بۇل كورسەتكىش 121 ەسەبىمەن رەكوردتىق مەجەگە جەتكەن. 2013 جىلدىڭ باسىنان بەرى 110 جۋرناليست ومىردەن وزعان. سول 110-نىڭ 10-ى – ءبىزدىڭ ەلىمىزدىڭ قارىمدى قالامگەرلەرى.
نۇرگۇل احانقىزى
