نۇر-سۇلتان قالاسىنىڭ اكىمى التاي كولگىنوۆ قۇرىلىس سالاسىنىڭ قىزمەتكەرلەرىن كاسىبي مەرەكەلەرىمەن قۇتتىقتادى.
«قالامىزداعى الەۋمەتتىك ۇيلەر, مەكتەپتەر, اۋرۋحانالار, جولدار, ساياباقتار مەن اۋلالار قۇرىلىسشىلاردىڭ ەڭبەگىمەن سالىندى. قۇرىلىس سالاسى قىزمەتكەرلەرىنىڭ كۇندەلىكتى قاجىرلى ەڭبەگىنىڭ ارقاسىندا قالامىز ءوسىپ, ودان ءارى كوركەيىپ كەلەدى. ولار كۇندىز-ءتۇنى, ايازدا دا, ىستىقتا دا جۇمىس ىستەيدى. ەلوردانىڭ اۆتورى جانە باس ساۋلەتشىسى – ەلباسى. تۇڭعىش پرەزيدەنتتىڭ استانانى كوشىرۋ تۋرالى شەشىمى – پراگماتيزم مەن كورەگەندىكتىڭ ۇلگىسى. قۇرىلىسشىلار 300 مىڭ حالقى بار شاعىن قالانى قارقىندى ءوسىپ كەلە جاتقان استاناعا اينالدىردى. قالا تۇرعىندارىنىڭ سانى ءتورت ەسە ءوستى. بارشا قۇرىلىس سالاسىنىڭ قىزمەتكەرلەرىن كاسىبي مەرەكەلەرىمەن قۇتتىقتايمىن! سىزدەرگە زور دەنساۋلىق, باقىت جانە تابىس تىلەيمىن!» دەپ جازدى ا.كولگىنوۆ Instagram پاراقشاسىندا.
ەلوردامىز قۇرىلىس سەكتورىندا كوشباسشى بولىپ قالا بەرەدى. قالادا جىل سايىن ميلليونداعان شارشى مەتر تۇرعىن ءۇي, الەۋمەتتىك نىساندار سالىنىپ جاتىر. نۇر-سۇلتان – ارماندار ورىندالاتىن قالا. مەملەكەت باسشىسى ەلوردانىڭ دامۋىنا ەرەكشە كوڭىل بولەدى. پرەزيدەنتتىڭ تاپسىرماسىنا سايكەس بيىل قولجەتىمدى الەۋمەتتىك تۇرعىن ءۇي قۇرىلىسىنىڭ كولەمى ءۇش ەسە ارتتى.
