وسىدان 12 جىل بۇرىن ەسىلگە العاش كەمە تۇسىرگەندە ونىڭ قوعامدىق جاعاجاي اۋماعى, قالانىڭ سولتۇستىك جاعالاۋ بولىگى تەرەڭدەتىلگەن بولاتىن. ەندى, كەيىنگى جىلدارى كەمە جۇرگىزۋ باعدارلاماسىن جۇزەگە اسىرۋعا بايلانىستى وزەننىڭ تومەنگى ساعالارى تازالانىپ, تەرەڭدەتىلىپ جاتىر.
2018 جىلى ەسىلدىڭ ارناسىن كەڭەيتىپ, ءتۇبىن تازالاۋ جۇمىستارىن اتقارۋ ءۇشىن ەلوردادا «پاۆلودار وزەن پورتى» اق-نىڭ جەرگىلىكتى فيليالى قۇرىلدى. كومپانيانىڭ باس ينجەنەرى, ەسىل ارناسىن تازارتۋ جوباسىنىڭ جەتەكشىسى ۆلاديسلاۆ گاەۆسكيدىڭ ايتۋىنشا, كاسىپورىن رەسپۋبليكانىڭ كەز كەلگەن وڭىرلەرىندە وسى تەكتەس جۇمىستاردى اتقاراتىندىقتان, ونىڭ جەرگىلىكتى جەرلەردە فيليالدارى كوپ. مۇندا جالپى سانى 1 مىڭنان اسا ادام ەڭبەك ەتەدى.
فيليالدىڭ جەر سورعىش سناريادتارى ءساۋىردىڭ سوڭى مەن مامىر ايىنىڭ باسىندا ەسىلگە كەزەك-كەزەگىمەن تۇسىرىلگەن. قازىر وزەن ارناسىن 4 جەر سورعىش سناريادتار تازالاپ جاتىر.
– ءبىز ەسىل وزەنىن تەك تەرەڭدەتىپ قانا قويماي, ونىڭ ءىشىن بالدىرلاردان, باسقا دا وسكىندەر مەن ءتۇرلى قالدىقتاردان تازارتامىز. سونداي-اق, 11-ۋچاسكەنىڭ جەلكە تۇسىنان قوسىمشا وزەن قولتىعىن جاسادىق. وزەن ارناسىنىڭ ەنىن 100 مەترگە دەيىن كەڭەيتتىك. الداعى ءبىر اپتانىڭ ىشىندە بۇل ۋچاسكەدەگى وزەن تازارتۋ جۇمىستارىن تولىقتاي اياقتاعان سوڭ, جاعالاۋدى تەگىستەپ, جارىقتاندىرۋ باعاندارىن ورناتىپ, جاسىل جەلەك وتىرعىزىپ, جاڭادان تروتۋار, برۋسچاتكا توسەيمىز. ودان كەيىن 4, 5-ۋچاسكەلەرگە اۋىسامىز, – دەدى جوبا جەتەكشىسى ۆلاديسلاۆ گاەۆسكي.
جوبا جەتەكشىسىنىڭ 11-ۋچاسكە دەپ وتىرعانى – ەسىلدىڭ س.سەيفۋللين كوشەسىنىڭ باس جاعىندا ورنالاسقان «قۇداي گۇلى» دەپ اتالاتىن مەشىت تۇسىنداعى ساعاسى. بۇل تۇس تاياز, وزەننىڭ ورتا جاعىنىڭ تەرەڭدىگى 1-1,5 مەتردەن اسپايدى. قازىرگى جۇمىستارىنىڭ ارقاسىندا ونىڭ ءتۇبى 4-4,5 مەترگە دەيىن تەرەڭدەتىلىپ, سۋ ايدىنى تازالانىپ جاتىر.
ال وزەننىڭ مەشىتتەن ءسال تومەنىرەك, قالانىڭ ەكى جاعالاۋىن قوسىپ تۇرعان كوپىردەن ارعى اۋدانى 4-ۋچاسكە دەپ, قالالىق قوعامدىق جاعاجاي اۋماعى 5-ۋچاسكە دەپ اتالادى. وسى ەكى ۋچاسكەنىڭ تازارتۋ-تەرەڭدەتۋ جۇمىستارى قارا كۇزگە دەيىن سوزىلاتىن كورىنەدى.
وزەن تۇبىنەن شىعارىلعان قۇم-تاس جانە قالدىقتار جاعالاۋعا ۇيىلەدى. جۇمىسشىلاردىڭ ايتۋىنشا, وزەن تۇبىنەن كۇنىنە 2,5 مىڭ تونناعا دەيىن جىنىس شىعارىلادى ەكەن. قۇمنىڭ ءبىر بولىگى قالا شارۋاشىلىعىنىڭ قاجەتتەرى ءۇشىن جۇمسالادى, سونداي-اق كومپانيا ونى وزەن جاعالاۋىن تەگىستەۋ, دامبىنى كوتەرۋ ءۇشىن پايدالانادى.
ەسىلدە جۇرگەن جەر سورعىش سناريادتىڭ كورپۋسى مەن بولشەكتەرى ەلورداعا پاۆلوداردان جۇك كولىكتەرىمەن بولشەكتەلىپ اكەلىنىپ, «قازاقسەلماش» اق زاۋىتىندا قۇراستىرىلعان. «پاۆلودار وزەن پورتى» اق ودان ءبىر تسەحتى جالعا الىپتى.
جەر سورعىش سنارياد – وزەن-كولدەردىڭ ءتۇبىن تەرەڭدەتۋگە جانە سۋ استىنان قۇم وندىرۋگە ارنالعان تەحنيكالىق فلوت كەمەسى. ول توپىراق سورعىسى ارقىلى جىنىستى قويىرتپاق رەتىندە وندىرەدى جانە سىرتقا شىعارادى.
ءار جەر سورعىش سناريادتى 3 ادام باسقارادى. اتى جامان ىندەت تارالماي تۇرعاندا جۇمىس تاۋلىك بويى ۇزبەي جۇرگىزىلەتىن, قازىر ادامدار تەك تاڭعى 08.00-دەن كەشكى 20.00-گە دەيىن جانە قورعانىس شارالارىن ساقتاي وتىرىپ ەڭبەكتەنەتىن بولعان. دەگەنمەن, كارانتيندىك رەجيم كومپانيا جۇمىسىنا ودان باسقا ەش وزگەرىستەر اكەلە قويعان جوق. پەرسونال سانى دا ءباز-باياعىشا. اتقارىلاتىن جۇمىس تا بۇرىنعىداي.
P.S. وتكەن اپتادا ەسىلگە سۋ جىبەرىلىپ, وزەن ارناسى 1-1,5 مەترگە كوتەرىلدى. بىراق كەلەسى كۇنى سۋ قايتادان تارتىلىپ, بۇرىنعى قالپىنا ءتۇستى, ءارى وزەندەگى بالىقتار جوعالىپ كەتتى. سويتسەك, مول سۋ «قۇداي گۇلى» مەشىتىنەن تومەنگى تۇستاعى توعاندى بۇزىپ, اعىپ كەتكەن ەكەن. سۋدى توقتاتۋ ءۇشىن «پاۆلودار وزەن پورتى» اق نۇر-سۇلتان قالاسىنداعى فيليالىنىڭ جۇمىسشىلارى جەدەل ۇيمەجال بوگەتىن (دامبا) جاسادى. ال بالىقتىڭ جوعالىپ كەتۋىنە توعاننىڭ جارىلۋىنىڭ ەش قاتىسى جوق. ول – بىرەسە نوسەر جاۋىپ, بىرەسە كۇننىڭ قاتتى ىسىپ كەتۋى سالدارىنان بولعان جاعداي. اۋا رايىنىڭ مۇنداي قۇبىلمالى كەزدەرى بالىقتار اۋىرىپ, سۋدىڭ تۇبىندە جاتىپ الادى ەكەن.
