قايران كوڭىلدىڭ كوكجيەگىن قاشىرار كوركەم ساتتەر – باقىت اتاۋلىنىڭ ءبىر بالاماسى. انكارادا استانا مادەني كۇندەرىنىڭ اتالىپ ءوتىلۋى الگىندەگى ءلام- ءميمىمىزدىڭ ماندىمدى مالىمەتى ىسپەتتى. گازەتىمىزدىڭ الدىڭعى سانىندا «رياسىز كوڭىلدەر كوپىرى» دەپ ءسوز باستاعانبىز. بۇگىن تۇرىكتىڭ باس قالاسىنداعى قارەكەتتەرىمىزدەن تاعى ءبىراز شىم-شىم اڭگىمە تارقايدى.
استانانىڭ انكاراداعى مادەني كۇندەرى اسا ءساتتى ۇيىمداستىرىلدى. اسىرەسە, قابىلداۋشى تاراپتىڭ مەيماندوستىعىنان قازاقتىڭ قوناقجايلىعىنداي ءىلتيپات ايقىن اڭدالىپ تۇردى. سول توڭىرەكتەگى قىز-جىگىتتەردىڭ سوزىنەن ۇققانىمىز: ەلوردامىزدىڭ سىيلاستىعىن سەزىنىپ جۇرگەن مەر مەليح گوكچەك مىرزا قازاق ەلى وكىلدەرىن سالتاناتتاپ كۇتە الماسا, وزدەرىنە ءمىن ەكەنىن مىقتاپ ەسكەرگەنگە, ەسكەرتكەنگە ۇقسايدى. قالانىڭ نەگىزگى كوشەلەرىن بويلاي قازاقستان تۋى ءىلىنىپتى. البەتتە, ونىمەن قوسا, وزدەرىنىڭ بايراعى دا مەنمۇندالايدى. تەگىندە تۇرىكتەر مۇستافا اتاتۇرىكتىڭ سۋرەتىمەن قاتار ەلدىڭ تۋىن تىم قاستەر تۇتادى. ءار ءۇيدىڭ تەرەزەسىنەن «قىزىلعا باسىلعان اي-جۇلدىزدى» ايشىقتاپ قويۋ – ۇلكەن مارتەبە.
بۇل كۇندەرى ءبىزدىڭ قۇلاقتىڭ تۇبىندە «قارداشلار», «ارقاداش» سىندى ۇعىمدار ءجيى قالىقتادى. تۇرىك باۋىرلاردىڭ نيەتىن سوزىنەن عانا ەمەس, ىسىنەن دە سەزىندىك. ەلباسى نۇرسۇلتان نازارباەۆقا ورناتقان ەسكەرتكىشى اتاتۇرىك داڭعىلى بويىندا, كورىكتى تۇستا قويىلىپتى. استانا اكىمى يمانعالي تاسماعامبەتوۆ باستاعان وكىلتوپ وسىناۋ نيەت تۋىندىسىمەن دە تانىستى.
تالايعى تاريحى بار قاجى بايرام مەشىتىندەگى جۇما نامازدان كەيىن «قازاقى ءۇي» اتتى مۋزەي – تۇراقتى ديورامما اشىلدى.
كەشىندە «كونگرەسيۋم» سارايىندا انكارالىقتار استانالىق قولونەر شەبەرلەرى مەن سۋرەتشىلەرىنىڭ كورمەسىن سەرپىلىسپەن تاماشالادى. قازاقى دامنەن اۋىز ءتيىپ, ارقا-جارقا بولىپ جاتتى. ەلىمىز ونەرپازدارىنىڭ كونتسەرتىنە زال تولى كورەرمەن جيىلدى. ازامات جىلتىركوزوۆ ورىنداعان اباي ءانى «كوزىمنىڭ قاراسىنان» باستالعان جاپ-جاقسى كەشتى قازاقستاننىڭ حالىق ءارتىسى روزا رىمباەۆا ءتامامدادى. استانالىق فيلارمونيا وركەسترىنىڭ, «مۋزارت», «بەلەس» توپتارىنىڭ, «ناز» بي تەاترىنىڭ, وزگە دە ەلگە ەسىمى بەلگىلى ونەر وكىلدەرىنىڭ كونتسەرتى كورگەن جاندى كوڭىلسىز قايتارماستاي ەدى.
استانا كۇندەرى – قوس شاھار ءۇشىن شىن مانىندە تاريحي شارا. ونىڭ باستى ايشىعىنىڭ بىرىنە اينالعان ءانشى-بيشىلەرىمىز ايانىپ قالمادى. سەنبىنىڭ كەشىندە «گەنچليك پاركىنە» كەلگەن ەل الدىندا انكارا اسپانىن تاعى دا قازاق اۋەنى بۋىپ كەتتى. ەڭبەكتەمەگەن سابيدەن ەڭكەيگەن كارىگە دەيىن بي ا لاڭىنان كەزدەستى ءردى ك . كوكپەڭبەك-قىزىل جالاۋشالار دا – ارقاداشلاردىڭ دوستىعىن نىعايتا تۇسۋگە تالاپتانعانداي اسىعىس. قوناقتاردىڭ ونەرىنە قوجايىن جاق سۋ-ساۋلەلى شوۋمەن جاۋاپ قاتتى. ايلاپات سۋبۇرقاقتار كوككە شاپشىپ, ءتۇرلى-ءتۇستى جارىقتارمەن قيدالانعان شاقتا تۇتاس كورىنىس قالىپتاستى.
انكارادا استانا مادەني كۇندەرىنىڭ اياسى ايتارلىقتاي كەڭ. دەلەگاتسيا مۇشەلەرىنىڭ سۇحباتى, كورەرمەن پىكىرى, ءارتۇرلى اسەرلەرمەن گازەتىمىزدىڭ الداعى ساندارىنىڭ بىرىنەن وقيسىزدار.
ەربولات قامەن, سۇلتان سەيىت (فوتو)
