استانادا قالا ماسەلەلەرىن شەشۋگە ارنالعان اشىق مالىمەتتەر بويىنشا حاكاتون ءوتتى دەپ حابارلايدى astana.gov.kz سايتى. ستارتاپ-مارافوندى استانا قالاسى اكىمدىگى اتىنان «استانا Innovations» اق مەن MOST بيزنەس-ينكۋباتورى بىرلەسىپ ۇيىمداستىردى.
حاكاتون – اشىق مالىمەتتەر نەگىزىندە سەرۆيستەر مەن ءموبيلدى قوسىمشالار جاساۋ ارقىلى قالانىڭ تەحنولوگيالىق مۇمكىندىگىن شەشۋ مۇمكىندىگى. قاتىسۋشىلار ءوز جوباسىمەن جۇمىس جاساۋ بارىسىندا ساراپشىنىڭ قولداۋىنا جانە نەتۆوركينگكە ارنالعان الاڭعا قول جەتكىزدى. ال ۇزدىك ءۇش كوماندا جۇلدە قورى 500 000 تەڭگەنى ءوزارا ءبولىستى.
باعدارلامالىق قامتۋ سالاسىنداعى قۇراستىرۋشىلاردان, ديزاينەرلەردەن, ماركەتولوگتاردان,ساراپشىلاردان قۇرالعان كوماندا استانانى ودان ءارى جاقسارتۋ ءۇشىن باس قوستى. ءىس-شارادا قۇرالعان كوماندالار 48 ساعات ىشىندە قوسىمشالار ءپروتوتيپىن جاساپ, ونەرتاپقىشتىق باعدارلامالاۋ ماشىقتارى مەن مالىمەتتەردى وڭدەۋ بويىنشا ءوزارا جارىستى.
حاكاتوننىڭ ءبىرىنشى كۇنى بىرقاتار اقپاراتتىق جانە ءبىلىم بەرۋ سەسسيالارى ءوتتى. ونىڭ بارىسىندا شاقىرىلعان ساراپشىلار اشىق مالىمەتتەرمەن قالاي جۇمىس ىستەۋ كەرەكتىگىن ايتىپ بەردى. مەنتورلار مەن قازىلار رەتىندە تاجىريبەلى كاسىپكەرلەر, ساراپشىلار مەن مەملەكەتتىك قۇرىلىم وكىلدەرى قاتىستى.
اشىق مالىمەتتەردىڭ باستى ءمانى – بيلىك ورگاندارى جۇمىسىنىڭ اشىقتىعىن ارتتىرۋ, تاۋەلسىز قۇراستىرۋشىلارعا قوسىمشالار مەن سەرۆيستەر جاساۋعا جاڭا مۇمكىندىكتەر جاساۋ, قالانى ءوز كۇشتەرىمەن جاقسارتۋعا جول اشۋ.
