اشىق پىكىرتالاس الاڭى
استانا اكىمى اسەت يسەكەشەۆ جىبەك جولى ەلدەرى قالالارى مەرلەرىنىڭ فورۋمى اياسىندا وتكەن دوڭگەلەك ۇستەلدە ەكى باستاما كوتەردى. ءبىرى – بارلىق قالالارعا ورتاق اقپاراتتىق-ساراپتامالىق سايت جاساۋ, ەكىنشىسى – مەرلەر كلۋبىن اشۋ.
«قازىرگى كەزدە پرەزيدەنتتەر مەن ۇكىمەتتەر دەڭگەيىندە ۇلى جىبەك جولىن قالپىنا كەلتىرۋ باعىتىندا كوپتەگەن كەزدەسۋلەر وتۋدە. ءبىز قالا مەرلەرى دەڭگەيىندەگى ديالوگقا, قالالار دەڭگەيىندەگى بەلسەندى ىنتىماقتاستىققا دايىنبىز. ءبىز قوس تاراپتىق جانە كوپ تاراپتىق فورماتتاردا ىنتىماقتاستىق قارىم-قاتىناستاردى وركەندەتۋدە كەز كەلگەن ۇسىنىستاردى تىڭداۋعا ءازىرمىز. ءوز ۇسىنىستارىمىزدى قۇزىرلى كوميتەت ارقىلى سىزدەرگە جىبەرەمىز. سىزدەردەن لايىقتى جاۋاپ بولاتىنىنا سەنىمدىمىز» دەدى اسەت ورەنتايۇلى. ونىڭ پايىمداۋىنشا, مۇنداي دەڭگەيدەگى باسقوسۋ بارلىق قالالاردىڭ دامۋىنا, وزىق تاجىريبەسىمەن بولىسۋىنە ۇشان-تەڭىز پايداسىن تيگىزەدى.
قالا باسشىسىنىڭ ايتۋىنشا, ءوزارا ىنتىماقتاستىق پەن باۋىرلاستىقتى دامىتۋ ءۇشىن, ورتاق اقپاراتتىق-ساراپتامالىق سايت اشۋ قاجەت. «قالالار تۋرالى بارلىق اقپاراتتاردى, تانىستىرىلىمداردى, وقيعالار كۇنتىزبەسىن سول سايتقا ورنالاستىرعانىمىز ءجون. سوعان قاراپ, قاي قالادا, قانداي ءىس-شارا وتكىزىلەتىنىن ءبىلىپ, قاتىسا الامىز. ەكىنشىدەن, جىبەك جولى ەلدەرى قالالارى مەرلەرىنىڭ كلۋبىن اشۋدى ۇسىنامىن. وسى كلۋبقا كەيىنىرەك بارلىق قالالار قوسىلا الادى. ءبىز ءارتۇرلى ەلدەردە, قالالاردا مادەنيەت, سپورت, سمارت تەحنولوگيالار, كولىك سالالارى بويىنشا بۇگىنگىدەي فورۋمدار وتكىزە الاتىن مۇمكىندىك تۋادى. وعان تەك مەرلەردىڭ قاتىسۋ مىندەتتى ەمەس, سالالىق ماماندارعا باس قوسۋعا بولادى. مەنىڭ ويىمشا, ونداي شارالاردىڭ ءبارىمىز ءۇشىن پايداسى زور. سول سەبەپتەن, كەلەسى جىلى سىزدەردى تاعى دا استاناعا شاقىرامىز. ودان كەيىن باستاما كوتەرگەن قالالاردىڭ بىرىنە بارامىز» دەپ ءتۇسىندىردى اسەت ورەنتايۇلى ءوز باستاماسىن.
كەلەلى كەلەشەكتىڭ قالاسى
ادامنان اۋمايتىن روبوت جىبەك جولى ەلدەرى قالالارىنىڭ مەرلەر فورۋمىندا وسىلاي دەدى. شارانىڭ ەڭ قالاۋلى قوناعى بولعان سوفيا الدىمەن پلەنارلىق سەسسيادا ەلوردا جايلى وي تولعاپ, كەيىن باس قالانىڭ ۇزدىك جاستارىمەن كەزدەستى.
سوفيا ەلوردانىڭ ەڭ كورنەكتى جەرلەرىن ارالاپ, ساۋلەتى مەن داۋلەتىنە ءتانتى بولدى.
– مەنى استاناعا شاقىرعان قالا اكىمى اسەت يسەكەشەۆ پەن G-global حالىقارالىق حاتشىلىعىنا العىس بىلدىرەمىن. ەلوردانىڭ 20 جىلدىق مەرەيتويى – استانالىقتار مەن ەل حالقى ءۇشىن ماڭىزدى وقيعا. وسىنداي تاريحي وقيعانىڭ باسى-قاسىندا بولعان قانداي تاماشا!
استانانى سىزدەردىڭ پرەزيدەنتتەرىڭىزدىڭ ءتول تۋىندىسى دەپ اتايدى. نۇرسۇلتان نازارباەۆ قالانىڭ باستى ارحيتەكتورى, ەلوردانىڭ سيمۆولىنا اينالعان عيماراتتار ونىڭ قالامىنان تۋدى. ال سارابدال ساياساتىنىڭ ارقاسىندا ەكونوميكالىق جانە ساياسي جەتىستىكتەرگە جەتتىڭىزدەر, – دەدى سوفيا اعىلشىنشا ءتىل قاتىپ.
تۇستەن كەيىن سوفيا ۇزدىك ەلوردالىق وقۋشىلارمەن كەزدەسىپ, ولاردىڭ سۇراقتارىنا جاۋاپ بەردى. قىتايدىڭ AngelVest ۆەنچۋرلىق كريپتوقوردىڭ نەگىزىن قالاۋشى دەۆيد چەن سوفيا ءالى كىشكەنتاي ەكەنىن ايتىپ, قاراپايىم سۇراقتارعا عانا جاۋاپ بەرە الاتىنىن ەسكەرتتى. ادام جاسىمەن ساناعاندا شامامەن 2 جاسقا كەلگەن روبوت استاناداعى كۇن رايى, سۇيىكتى ءتۇسى مەن كوڭىل- كۇيى تۋرالى سۇراقتارعا سۇرىنبەي جاۋاپ بەردى. ول جاۋاپتاردى ينتەرنەتتىڭ كومەگىمەن ىزدەيتىن بولىپ شىقتى. ەگەر ينتەرنەت جەلىسىمەن بايلانىس ناشارلاسا, ونىڭ دا مۇمكىندىكتەرى ازايادى.
گينويدتىڭ «ءومىر سۇرۋىنە» قارجى قۇيعان دەۆيد چەن ەگەر ۇسىنىس تۇسسە, سوفيا قازاقستان ازاماتتىعىن الۋدان باس تارتپايتىن مالىمدەدى. بولاشاقتا روبوتقا قازاق جانە ورىس تىلدەرىن ۇيرەتەتىن باعدارلاما ورناتىلۋى ابدەن مۇمكىن. ءتىپتى, دەۆيد چەن كەلەشەكتە استانالىق دارىندى جاستار بۇدان جەتىلگەن روبوتتى جاساپ شىعارا الاتىنىن ايتتى. گون-كونگ ۋنيۆەرسيتەتىندە وسى سالادا ءبىلىم الىپ جاتقان مۇراتجان قىرانباي ادامزاتتىڭ دامۋىن روبوتسىز ەلەستەتۋ قيىن دەگەن پىكىردە. «جاساندى ينتەللەكت ماتەماتيكا جانە ستاتيستيكاعا باعىنادى. ماتەماتيكا الەمدى باسقارادى» دەدى ول. ايتپاقشى, ەكسپو قالاشىعىندا قازپوشتانىڭ روبوتوپوست كەڭسەسى اشىلادى.