استانانىڭ ايتۋلى تويى باستالدى. ەلباسى نۇرسۇلتان نازارباەۆتىڭ قاتىسۋىمەن, قالىپتاسقان ءداستۇر بويىنشا مەملەكەتتىك تۋ كوككە كوتەرىلدى. استانا بار قازاقتىڭ باس قالاسىنا اينالدى. مەملەكەتتىك تۋدىڭ ءداستۇرلى تۇردە ەلوردا كۇنى قارساڭىندا كوتەرىلۋى جالپىۇلتتىق مەرەكەنىڭ مارتەبەسىن تاعى دا اسقاقتاتا ءتۇستى.
«باتىر بابالارىمىز ءبىزدىڭ زور جەڭىستەرگە جەتۋىمىزدى تىلەپ, ءاردايىم تۋدى تىك ۇستاۋدى وسيەت ەتتى. سودان بەرى ءبىز بارلىق جەتىستىككە كوك بايراقتىڭ استىندا قول جەتكىزىپ كەلەمىز. «قازاقستان, تاۋەلسىزدىك, استانا» دەگەن تۇسىنىكتەر ءبىزدىڭ مەملەكەتتىگىمىزبەن, بولاشاعىمىزبەن ءبىرتۇتاس ۇعىمعا اينالدى. قازاقستان – ءبىزدىڭ جالعىز وتانىمىز, تاۋەلسىزدىك – ورىندالعان ارمانىمىز. الەم ەلدەرى تۋلارىنىڭ ەشقايسىسىنا ۇقسامايتىن كوك تۋىمىزدى دۇنيە ءجۇزى مويىندادى» دەدى ەلباسى ءوز سوزىندە.
مەملەكەت باسشىسى قازاقستاننىڭ قارۋلى كۇشتەرى ءۇشىن اسكەري كادرلاردى ساپالدايىنداۋدىڭ ماڭىزدىلىعىنا دا نازار اۋداردى.
«سىزدەردىڭ اسكەري قىزمەتتەرىڭىز بەيبىت جاعدايدا ءوتسىن دەپ تىلەيمىن. بىراق مەملەكەت ءاردايىم ءوزىنىڭ قاۋىپسىزدىگى مەن شەكارا بۇتىندىگىن ويلاۋعا ءتيىس. سوندىقتان, ءبىز وفيتسەرلەرىمىزدى تاۋەلسىز قازاقستاننىڭ جاڭا جاعدايىندا, جاڭا قارۋلى كۇشتەرىمىز ءۇشىن وقىتىپ, تاربيەلەيمىز. اسكەري قىزمەتتى لايىقتى اتقارۋدىڭ ۇلگىسىن كورسەتىڭىزدەر» دەي كەلە, جاس وفيتسەرلەرگە مەملەكەتتىك تۋعا زور قۇرمەت كورسەتۋ وتاندى سۇيۋمەن بىردەي ەكەنىن ەسكە سالدى.
سالتاناتتى جيىندا قازاقستاننىڭ اسكەري جوعارى وقۋ ورىندارىنىڭ ۇزدىك تۇلەكتەرى پرەزيدەنت قولىنان وفيتسەرلىك شەن الدى. جاس وفيتسەرلەر ەلباسىنىڭ الدىندا وتانىمىزدىڭ قاۋىپسىزدىگىن قورعاۋعا انت بەردى. مەرەكەلىك شارادان سوڭ ەلباسى بارشا جۇرتتى استانانىڭ 20 جىلدىعىمەن قۇتتىقتاپ, ەل تۇرعىندارىنا باق-بەرەكە تىلەدى.
