قازاقستان ارمياسىنىڭ اسكەري قىزمەتشىلەرى قاراعاندى وبلىسىنىڭ اۋماعىنداعى جولدا قالىپ قويعان 120 ادامدى قۇتقاردى. 36352 اسكەري ءبولىمىنىڭ قۇتقارۋ جاساعى قارلى بوراندا كەپتەلگەن اۆتوكولىكتەردى الىپ شىعۋ ءۇشىن 4 ساعات بويى جول تازالاۋمەن اينالىستى, دەپ حابارلادى قر قورعانىس مينيسترلىگىنىڭ ءباسپاسوز قىزمەتى.
اۋا رايىنىڭ كۇرت بۇزىلۋىنا بايلانىستى الماتى-ەكاتەرينبۋرگ تراسساسىندا قاراعاندى قالاسىنان 47 شاقىرىم قاشىقتىقتا اقباستاۋ كەنتىنىڭ ماڭىندا بوراندى كۇنى 12 جۇك كولىگى, 10 جەڭىل اۆتوكولىك, سونداي اق جۇرگىنشىلەر مىنگەن 2 اۆتوبۋس جولدا قالعان. قار ۇيىندىلەرىنىڭ بيىكتىگى كەي جەرلەردە 2 مەترگە دەيىن جەتكەن. ماشينالاردى ەۆاكۋاتسيالاۋ ءۇشىن سپاسسكتەگى وقۋ-جاتتىعۋ ورتالىعىنىڭ قولباسشىلىعى 2 اۆتوموبيل مەن ءبىر شىنجىر تاباندى تەحنيكا ءبولدى.
وپەراتسيا تابىستى اياقتالىپ, اسكەري قىزمەتشىلەر جۇرگىزۋشىلەردىڭ قاراعاندى قالاسىنا دەيىن جەتىپ الۋىنا كومەكتەستى. قار قۇشاعىنان قۇتقارىلعان ادامدار قۇتقارۋ جاساعىنىڭ باسشىسى مايور لەونيد ماكلاكوۆقا, سونداي-اق تەحنيكامەن كومەك قولىن سوزعان اعا سەرجانت ن.تويبەكوۆكە, سەرجانت ا.زەمليانۋشكين مەن سەرجانت د.كروتوۆقا العىستارىن ءبىلدىردى.
قازىرگى ۋاقىتتا اسكەري قىزمەتشىلەر اسكەري بولىمگە قايتا ورالىپ, كۇندەلىكتى جاۋىنگەرلىك دايارلىققا كىرىسىپ كەتتى. بىراق اپاتتىق-قۇتقارۋ توبى كەز-كەلگەن ۋاقىتتا جولدا جاۋراعان قازاقستاندىقتارعا كومەككە كەلۋگە ءازىر.
