اسسامبلەيا زالى اشىلدى
كەشە قر ۇلتتىق اكادەميالىق كىتاپحاناسىندا قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسى ءوتتى. اسسامبلەيا كەڭەسىنىڭ وتىرىسىنا قر مەملەكەتتىك حاتشىسى گۇلشارا ابدىحالىقوۆا, پارلامەنت دەپۋتاتتارى, ورتالىق, جەرگىلىكتى مەملەكەتتىك مەكەمەلەر باسشىلارى, ەتنومادەني بىرلەستىكتەر جەتەكشىلەرى مەن ايماقتىق اسسامبلەيا حاتشىلارىنىڭ مەڭگەرۋشىلەرى, زيالى قاۋىم جانە باق وكىلدەرى قاتىستى.
ۇلتتىق اكادەميالىق كىتاپحانانىڭ حولىندا قازاق حاندىعىنىڭ 550 جىلدىعىنا, قر كونستيتۋتسياسىنىڭ 20 جىلدىعىنا, ۇلى جەڭىستىڭ 70 جىلدىعىنا, «بەيبىتشىلىك پەن كەلىسىمنىڭ جول كارتاسى» مەگاجوباسىنىڭ قورىتىندىسىنا جانە قازاقستان حالقى اسسامبلەياسى مۇشەلەرىنىڭ عىلىمي ەڭبەكتەرىنە ارنالعان كورمەلەر ءوتتى. سونداي-اق, ۇلتتىق اكادەميالىق كىتاپحانادا قازاقستان حالقى اسسامبلەياسى زالى اشىلدى. زالدىڭ اشىلۋى بارىسىندا ەلىمىزدەگى ەتنومادەني ءبىرلەستىكتەردىڭ, قحا قىزمەتىنىڭ تاريحى تۋرالى مالىمەتتەر بازاسى تانىستىرىلدى.
كەڭەيتىلگەن وتىرىستا مەملەكەتتىك حاتشى گۇلشارا ابدىحالىقوۆا: «قازاقستان حالقى اسسامبلەياسى كەڭەسىنىڭ بيىلعى جىلعى وتىرىسى – ەل ءومىرىندەگى ەلەۋلى وقيعا. بۇل شارا قازاقستان رەسپۋبليكاسىنىڭ پرەزيدەنتىن سايلاۋ كۇنىمەن تۇسپا-تۇس كەلىپ وتىر. ساناۋلى كۇندەردەن كەيىن ءبىز ەلىمىزدەگى ەڭ ماڭىزدى ساياسي شاراعا بارشا حالىق بولىپ قاتىسىپ, بىرلىگىمىز بەن ىنتىماعىمىزدى تاعى دا تانىتاتىن بولامىز. وزدەرىڭىزگە بەلگىلى, كەزەكتەن تىس پرەزيدەنت سايلاۋىن وتكىزۋ جونىندەگى باستاما – قازاقستان حالقى اسسامبلەياسى مۇشەلەرى تاراپىنان كوتەرىلدى. البەتتە, بۇل بايىپتى باستامانىڭ مازمۇنى مەن ناقتى نەگىزى بار ەكەنىن حالىق ءوزى قۋاتتادى. ەڭ باستىسى, ەلباسى نۇرسۇلتان نازارباەۆ قازاقستان حالقىنىڭ تىلەگىن تەرەڭ سەزىنىپ, كەزەكتەن تىس سايلاۋ وتكىزۋ جونىندە تاريحي شەشىم قابىلدادى. ەرتەڭ مەملەكەت باسشىسىنىڭ توراعالىعىمەن قازاقستان حالقى اسسامبلەياسىنىڭ XXII سەسسياسى وتەدى. سەسسيادا اسسامبلەيانىڭ 20 جىلدا اتقارعان اۋقىمدى قىزمەتى باعالانىپ, كەلەشەكتە ورىندايتىن كەلەلى مىندەتتەرى ايقىندالادى» دەپ اتاپ ءوتتى.
ىرىسبەك دابەي