Astana bike: ەلوردالىقتار ەۋروپالىقتاردان قالىسپايدى
كۇن جىلىنعالى بەرى قوس دوڭعالاققا قونجيعان استانالىقتاردى ءجيى كورەتىن بولدىق. اسىرەسە, كەپتەلىستەن كوز اشپايتىن كوشەلەردە بۇل ۆەلوسيپەدىڭ – تاپتىرماس تۇلپار. ءارى-بەرىدەن سوڭ, اۆتوتۇراقتان ورىن ىزدەپ, اۋرەگە تۇسپەيسىڭ. اۋانى دا لاستامايسىڭ. ۋاقىتىڭ مەن جولىڭا ءوزىڭ – بي, ءوزىڭ – قوجا!
وسى ورايدا ەلوردادا بۇرناعى جىلى ىسكە قوسىلعان «Astana Bike» جۇيەسىنىڭ پايداسى ۇشان-تەڭىز. سول جوبانىڭ ارقاسىندا باس شاھاردىڭ ءبىراز تۇرعىنى سالاۋاتتى ءومىر سالتىنا كوڭىل ءبولىپ, ۆەلوسيپەدكە كوشتى. ال ەندى مىنا قىزىقتى قاراڭىز. ۆەلوسيپەدپەن ءجۇرۋدىڭ ورتاشا كورسەتكىشى جاعىنان استانا جۇرتشىلىعى ماسكەۋ, پاريج جانە سان-فرانتسيسكو تۇرعىندارىنان وزىپ كەتىپتى. ستاتيستيكالىق دەرەكتەرگە سۇيەنسەك, ماسكەۋلىكتەر – تاۋلىگىنە شامامەن 5,7 شاقىرىم, پاريج ازاماتتارى – 3,2 شاقىرىم, سان-فرانتسيسكودا تۇراتىن كىسىلەر 3 شاقىرىم جول جۇرەدى ەكەن. ال استانا قالاسىنداعى «Smoove» ورتالىعىنىڭ مالىمەتىنشە, ءبىزدىڭ قالاداعى ۆەلوسيپەدشىلەر كۇن سايىن 6 شاقىرىمدى ارتقا تاستايدى.
– بۇگىندە «Astana Bike» قىزمەتىن قولدانۋشىلاردىڭ 64 پايىزى – ەرلەر, 36 پايىزى – ايەلدەر. ولار نەگىزىنەن تاڭعى ساعات 7 مەن 9-دىڭ جانە كەشكى ساعات 5 پەن 10-نىڭ اراسىندا ۆەلوسيپەدكە وتىرادى, – دەيدى اتالمىش جوبانىڭ جەتەكشىسى سۇلتانبەك سىزدىقوۆ.
بيىلعى ماۋسىم باستالعالى بەرى ەلوردالىقتار 250 مىڭ شاقىرىمنان اسا جول ءجۇرىپ تاستادى. قازىرگى تاڭدا جۇيەگە 3 جارىم مىڭداي پايدالانۋشى تىركەلگەن. قالانىڭ حالىق كوپ شوعىرلانعان جەرلەرىندە ورنالاسقان بەكەتتەردىڭ ارا قاشىقتىعى 300-500 مەتردەن اسپايدى. ەكولوگيالىق قوزعالىس نىسانىنا اينالعان ۆەلوسيپەدتەردىڭ ەلەكتروندى تۇراقتارىنىڭ ءوزى قۋاتتى كۇن كوزىنەن الادى. بۇل كۇنى استاناداعى 150 ۆەلوبەكەتتىڭ ازىرگە 141-ءى ىسكە قوسىلدى. قالعان ستانسالارعا كەيبىر كوشەلەردىڭ جوندەلۋىنە بايلانىستى ۆەلوسيپەدتەر قويىلعان جوق. عاشىقتار ساياباعىنداعى, «فيتنەس پالاس» كلۋبىنىڭ تۇبىندەگى جانە تاۋەلسىزدىك پەن كۇيشى دينا كوشەلەرىنىڭ قيىلىسىنداعى بەكەتتەر جۇمىسىن كەيىنىرەك باستايدى.
جول-كولىك جۇيەسىنە تۇسەتىن اۋىرتپالىقتى اجەپتاۋىر ازايتقان بۇل قىزمەتكە جىلدان-جىلعا سۇرانىس ارتىپ كەلەدى. وتكەن جىلى وسى جوبانى ىلگەرىلەتۋ ماقساتىندا ۆەلوبەكەتتەر سانى 150-گە, ال ۆەلوسيپەدتەر سانى 1000-عا دەيىن ۇلعايتىلعان بولاتىن. بىلتىرعى ۆەلوماۋسىمدا جۇيەنى 1800-دەي كىسى قولدانعان. ولار ۆەلوسيپەدتى 89 مىڭ رەت جالعا الىپ, 1 ميلليون 500 مىڭ مينۋتتا 180 مىڭ شاقىرىم جول جۇرگەن.
ايتپاقشى, ۆەلوشەيرينگ جۇيەسىنىڭ تيىمدىلىگىن دامىعان ەلدەردىڭ ءتاجىريبەسى دە راستايدى. ونداعى بۇقارانىڭ ۆەلوسيپەدكە دەگەن ءسۇيىسپەنشىلىگى سونشا, قوس دوڭگەلەكتى تۇلپاردى تۇرمىستارىنىڭ ەڭ ماڭىزدى دۇنيەسى سانايدى. سولاردىڭ ىشىندەگى بىزگە ۇلگى بولۋعا تۇرارلىق ىستەردى دە ايتا كەتەيىك. ماسەلەن, نورۆەگيانىڭ ترونحەيم اتتى شاپ-شاعىن قالاسىندا ۆەلوسيپەدتەرگە ارنالعان ليفت بار. جەرگىلىكتى تۇرعىندار مەن قوناقتارعا سول ليفتىمەن برۋباككەن تاۋىنا تەمىر تۇلپارىمەن بىرگە كوتەرىلۋگە رۇقسات. جاڭا زەلانديانىڭ وڭتۇستىگىندەگى كرايستچەرچ كەنتى – ۆەلوكينوتەاترىمەن تانىمال. پەدالدى توقتاۋسىز اينالدىرسا, ودان پايدا بولعان ەلەكتر قۋاتىنىڭ كومەگىمەن فيلم كورۋگە بولادى. مالميولىك ۆەلوجولدارعا كادىمگى كوشەلەردىكى سەكىلدى اتاۋلار بەرىلىپتى. بوگوتادا جىلىنا ءبىر رەت اۆتوكولىك قوزعالىسىن توقتاتىپ, ۆەلوسيپەد كۇنىن اتاپ وتەدى. «جاقسىدان ۇيرەن» دەيدى عوي مۇندايدا قازاق.
بوتاگوز ماراتقىزى