استانا قالاسىنىڭ اكىمدىگى كوشە ساۋداسىن رەتتەۋ جانە قالا ينفراقۇرىلىمىن جاقسارتۋ ماقساتىندا ارنايى 1000 ساۋدا ورنى جوباسىن قولعا العانى بەلگىلى. بۇگىنگى تاڭدا وسى جوبا ناقتى جولعا قويىلىپ, كاسىپكەرلەرگە تەڭ كونكۋرستىق نەگىزدە جالعا بەرىلگەن ورىنداردا اسەم دە ءساندى ساۋدا پاۆيلوندار بوي كوتەرىپ جاتىر. بۇل نىسانداردىڭ 303-ءى ەسىل اۋدانىندا, 305-ءى الماتى اۋدانىندا ال قالعان 377-ءسى سارىارقا اۋدانىندا ورىن تەبەدى.
اتالمىش جوبا ءۇش كەزەڭ بويىنشا ىسكە اسىرىلىپ جاتىر. العاشىندا قالا اكىمدىگىنىڭ كوشە ساۋداسىن جۇزەگە اسىرۋعا 274 ورىن بولگەن بولاتىن. الايدا, كاسىپكەرلەردىڭ ءوتىنىشى بويىنشا ۇسىنىلعان ورىندار سانىن مىڭعا دەيىن كوبەيتۋ تۋرالى شەشىم قابىلدانىپ, شاھاردىڭ تۇس-تۇسىنا تاعى 558 ساۋدا نۇكتەسىنىڭ تۇراعى بەلگىلەندى. قالعان ورىندار ءۇشىنشى كەزەڭ بويىنشا ىسكە اسىرىلدى.
جىلجىمالى ساۋدا نىساندارى نەگىزىنەن 9, 12 جانە 18 شارشى مەترگە شاقتالىپ جاسالعانىن ايتا كەتۋ كەرەك. جوبالانعان بۇل نىساندار ءۇش ءتۇرلى ۇلگىدە ياعني – جەمىس-جيدەك, كونديتەرلىك ونىمدەر جانە نان-توقاش, ءسۇت, شۇجىق ساتۋعا ارنالىپ جاسالسا, ەكىنشىسى – گازەت ساتۋ كيوسكىسى, تىگىن شەبەرحاناسى جانە اياق كيىم جوندەۋ شەبەرحاناسىنا لايىقتالدى. ال ءۇشىنشى ءتۇرى – فاست فۋد, سۋسىن, بالمۇزداق سياقتى دايىن ونىمدەر ساتاتىن ورىندار مەن گۇل پاۆيلوندارىنا ارنالىپ جاسالعان.
كوشە ساۋداسىن ءتيىمدى ۇيىمداستىرۋ استاناداعى ورىن تاپشىلىعى ماسەلەسىن شەشۋگە مۇمكىندىك بەرەدى دەپ جوسپارلانعان 1000 ورىننىڭ كوبى – جىلجىمالى دۇڭگىرشەكتەر. بۇلاردىڭ ىشىندە قوس دوڭعالاقتى ءموبيلدى پۋنكتەر دە بار. مۇنداي دۇڭگىرشەكتەر كادىمگى اربا سياقتى قوزعالىپ, كوشىپ-قونۋى جەڭىل بولادى. بۇلار كوپ ورىن دا المايدى, ساتۋشىلار بار بولعانى 1 شارشى مەتر جەردە ساۋداسىن جۇرگىزە بەرەدى. قوس دوڭعالاقتى نىساندارعا 100 ورىن بەلگىلەنگەن.
اكىمدىكتىڭ مالىمەتىنشە, بۇل جوبا شەڭبەرىندە بالالاردىڭ ويىن-ساۋىعىن ۇيىمداستىرۋعا ارنالعان الاڭدار دا قاراستىرىلعان. وسىنداي 23 الاڭ ەسىل اۋدانىندا ورىن تەپكەن. ونىڭ تورتەۋى د.قوناەۆ, دوستىق كوشەلەرىندە جانە سارايشىق پەن اراي كوشەلەرىنىڭ قيىلىسىندا بولسا, قالعانىنىڭ ءبارى «نۇرجول» جەلەكجولىنا ورنالاسادى. بۇنىڭ ىشىندە ويىنشىق كولىك, سەگۆەي جانە ءوزى سىرعانايتىن تاقتايشالاردى جالعا بەرەتىن 1 پۋنكت جۇمىس ىستەيدى.
استانا قالاسى كاسىپكەرلىك جانە ونەركاسىپ باسقارماسى قىزمەتكەرلەرىنىڭ ايتۋىنشا, جىلدام تاماقتانۋ جۇيەسىن ۇيىمداستىرۋ جانە شاعىن بيزنەستى دامىتۋ ماقساتىندا ءبولىنىپ وتىرعان مىڭ ورىنعا بارلىعى 1 800 ءوتىنىش كەلىپ تۇسكەن ەكەن. بارلىق تالاپتارعا ساي دەپ تابىلعان نىساندارمەن جەكە شارتقا قول قويىلىپ, وسى كەلىسىم شارت اياسىندا كاسىپكەرلەر جەر تەلىمىن 5-7 جىل مەرزىمگە جالعا الىپ جۇمىستارىن جۇرگىزىپ جاتىر. ءموبيلدى كوفەينيا, جىلجىمالى اۆتوسەرۆيس, نان جانە جەمىس-جيدەك دۇڭگىرشىكتەرى, گۇل جانە كادەسىي دۇكەندەرى, سونداي-اق ستريت-فۋد جۇيەلەرىنەن تۇراتىن بۇل ساۋدا نۇكتەلەرى قالانىڭ ساۋلەت كەلبەتىنە, بارلىق سانيتارلىق جانە ورتكە قارسى تالاپتارعا تولىقتاي جاۋاپ بەرەدى.
«ەلوردانىڭ كوشە ساۋداسىنا 1000 ساۋدا ورنىن ءبولۋ تاجىريبەسىنە بۇگىندە وزگە دە وبلىستار قىزىعۋشىلىق ءبىلدىرىپ وتىر. اتالعان جوبا قالاعا دا, كاسىپكەرگە دە قاجەت. ءبىر جاعىنان بۇل كوشە ينفراقۇرىلىمىن جاقسارتۋعا, سونداي-اق, 7 جىلدىڭ ىشىندە سالىنعان ينۆەستيتسيانى قايتارۋعا مۇمكىندىك بەرەدى» دەيدى استانا قالاسى كاسىپكەرلىك جانە ونەركاسىپ باسقارماسى باستىعىنىڭ مىندەتىن اتقارۋشى رىسكۇل قاۋعاباەۆا.
بۇركىت نۇراسىل
