ەلوردانىڭ ءبىلىم بەرۋ مەكەمەلەرىندە قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان ەتنومادەني بىرلەستىكتەر كۇنى اكتسياسى باستالدى
ەلىمىزدىڭ مەرەيلى مەرەكەسىنە ارنالعان شارالار 16 جەلتوقسانعا دەيىن جالعاساتىن بولادى. قازاقستاننىڭ ەڭ باستى قۇندىلىعى ءارى جەتىستىگى بولىپ سانالاتىن ىنتىماق پەن بىرلىكتى ۇلىقتايتىن ايتۋلى اكتسيانىڭ العاشقى شاراسى استاناداعى كولىك جانە كوممۋنيكاتسيالار كوللەدجىندە ءوتتى.
سالتاناتتى شارا بارىسىندا «ۆوزروجدەنيە» نەمىستەر قوعامى, «قىرعىزستان-استانا» قوعامدىق بىرلەستىگى جانە «تاڭ» تاتار-باشقۇرت مادەني ورتالىعىنىڭ ونەرپازدارى ءوز ونەرلەرى ارقىلى ەلىمىزدەگى بىرلىك پەن بەرەكەنى بەينەلەپ كورسەتتى. ەلىمىزدە مەكەندەيتىن بارلىق ۇلتتاردىڭ ءبىر شاڭىراق استىندا بەرەكەلى ءومىر ءسۇرىپ كەلە جاتقانىن اسپەتتەگەن اندەر شىرقالىپ, ەل تاۋەلسىزدىگىن ۇلىقتاعان ولەڭدەر وقىلدى.
«قازاقستان حالقى اسسامبلەياسىنىڭ ۇيىتقىسىمەن وتكەن باعدارلاما اياسىندا قالامىزداعى 27 ەتنومادەني بىرلەستىكتىڭ جۇمىسى قامتىلادى. جوعارى وقۋ ورىندارى مەن كوللەدجدەردە ۇيىمداستىرىلاتىن ءىس-شارا جاستاردى ۇلتارالىق ىنتىماق پەن بىرلىككە شاقىرىپ, قازاقستاندا تۇرىپ جاتقان ەتنوستاردىڭ سالت-ءداستۇرى مەن مادەنيەتىن ساقتاۋعا باعىتتالادى» دەيدى «قىرعىزستان-استانا» قىرعىز ەتنومادەني بىرلەستىگىنىڭ توراعاسى شاۆكات يسمايلوۆ.
ەتنومادەني بىرلەستىكتەر كۇنى ەلورداداعى بارلىق وقۋ ورىندارىندا وتەدى. بۇگىنگى تاڭدا ۋنيۆەرسيتەت ستۋدەنتتەرى دە, كوللەدج وقۋشىلارى دا, مەكتەپ شاكىرتتەرى دە تاۋەلسىزدىك مەرەكەسىنە ارنالعان ايتۋلى اكتسيانى وتكىزۋگە ىستىق ىقىلاس تانىتىپ وتىر.
ءمادينا جاقىپ
