يتاليالىق فوتوگراف جانە جۋرناليست انتونيو پوليتانو استانادا بولىپ جاتقان ايتۋلى وقيعا «ەكسپو-2017» حالىقارالىق مامانداندىرىلعان كورمەسىنە ارناپ يتاليادا فوتوكورمە وتكىزبەك. بۇل تۋرالى مەديا ورتالىقتا وتكەن ءباسپاسوز ماجىلىسىندە ءمالىم بولدى. سول جيىندا يتاليانىڭ قازاقستانداعى ەلشىسى جانە ۇلتتىق پاۆيلون كوميسسارى ستەفانو راۆانيان كورمە اياسىندا وتەتىن مادەني شارالارمەن تانىستىردى.
انتونيو پوليتانو كاسىبي فوتوگراف رەتىندە كوپتەگەن ەلدەردە تانىمال. ول La Repubblica جانە National Geographic Italy سىندى بەلگىلى باسىلىمداردا جۇمىس ىستەيدى. ءوزى ايتقانداي, يتاليادا ۇيىمداستىرىلاتىن فوتوكورمە يتاليالىقتاردىڭ استانا تۋرالى كوبىرەك ءبىلىپ, ەكسپو سياقتى اۋقىمدى شارا مەن قازاق جۇرتىنىڭ سالت-داستۇرىمەن تانىسۋىنا تاپتىرماس مۇمكىندىك.
– مەن جەرگىلىكتى حالىقتىڭ تىنىس-تىرشىلىگىنەن حابار بەرىپ تۇراتىن كورىنىستەردى جاقسى كورەمىن. كوبىنەسە ادامداردىڭ قيمىل-قوزعالىستاعى ساتتەرىن قاعىپ العاندى ۇناتامىن. ەتنواۋىلعا بارىپ, قازاق حالقىمەن جاقىنىراق تانىستىم دەسەم دە بولادى. جەرگىلىكتى حالىقتىڭ سەلفيگە ءتۇسۋدى ۇناتاتىنىن بايقادىم. استانا ماعان جاقسى اسەر قالدىردى. مەن ءۇشىن پرەزيدەنت رەزيدەنتسياسى – اقوردا ماڭىندا تۇرعىن ۇيلەردىڭ سالىنۋى – تاڭعالارلىق جاعداي. استانانىڭ اسەم ارحيتەكتۋراسىن دا ەرەكشە اتاپ وتكىم كەلەدى, – دەدى ول.
فوتوگرافتىڭ وبەكتيۆىنە يتاليا پاۆيلونى دا ىلىكتى. انتونيو ونداعى روبوتتىڭ وزدىگىنەن سۋرەت سالۋى, اۋماقتاعى قابىرعالاردىڭ ەلدە قولدانىلاتىن ەنەرگيا كوزدەرى جايلى ماعلۇمات بەرۋى سىندى دۇنيەلەردى ءتۇسىرىپ الدى.
كوميسسار ستەفانو راۆانياننىڭ ايتۋىنشا, كەشە يتاليا پاۆيلونى الاڭىندا كەشكى ساعات جەتىدە باستالعان دجاز كەشى 22 شىلدەگە دەيىن جالعاسادى. ال 23 شىلدەدە قالا اكىمدىگى عيماراتىنىڭ الدىندا ساعات 20.00-دە يتاليالىق ساكسوفونشى جانە كومپوزيتور گابريەلە بۋونوسورتە, سوقپالى مۋزىكالى اسپاپتا وينايتىن ساۆەريو فەدەريچي جانە قازاقستاندىق باس گيتاراشى ەركەبۇلان وجەكەنوۆ پەن پەرنەلى اسپاپتىڭ قۇلاعىندا وينايتىن ۆەنەرا تەلماننىڭ قاتىسۋىمەن دجاز كونتسەرتى بولادى.
سونداي-اق, 27 شىلدەدە بايتەرەك مونۋمەنتىنىڭ الاڭىندا ساعات 19.00-دە امبروجيو سپارانيا جەتەكشىلىگىمەن «يتالياعا ساياحات» اتتى حالىق اسپاپتار كونتسەرتى وتەدى. كەلەسى كۇنى ۇلتتىق كىتاپحانا تورىندە ساعات 17.00-دە «لاتسيونىڭ جاسىل ەكونوميكاسى ەكسپو-2017 كورمەسىندە» دەگەن كىتاپتىڭ تۇساۋى كەسىلەدى. وعان قوسا, يتاليا 29 شىلدە كۇنى كەلەم دەۋشىلەردى قالاشىقتا ساعات 19:00-دە وتەتىن ۇلتتىق مۋزىكا كونتسەرتىنە شاقىرادى. ەكى ەل اراسىنداعى ايتۋلى مادەني شارانىڭ ءبىرى دەپ 3 قىركۇيەكتە وتەتىن «استانا وپەرا» تەاترىندا وپەرا ءانشىسى ءپاۆاروتتيدى ەسكە الۋ كونتسەرتىن ايتۋعا بولادى.
گۇلدانا تالعاتقىزى
