تالانتتى جاس رەسەي, اۋستراليا, برازيليا, بولگاريا, جاپونيا, كانادا, وڭتۇستىك افريكا, وڭتۇستىك كورەيا ونەرپازدارىنان دارا شىعىپ, بالەت ارتىستەرىنىڭ V حالىقارالىق كونكۋرسىندا باس جۇلدەنى قانجىعاسىنا بايلادى.
تۇركيانىڭ سيۋرەي وپەرا تەاترىندا وتكەن بايقاۋ – بي ونەرىندە ايرىقشا بەدەلگە يە. ءۇش كەزەڭگە بولىنگەن كونكۋرسقا 15-26 جاس ارالىعىنداعى بيشىلەر قاتىستى.
باقتيار ادامجان تۇرىك ساحناسىندا ل.مينكۋستىڭ «دون كيحوت», «بايادەركا», ب.اسافەۆتىڭ «پاريج جالىنى», تس.ءپۋنيدىڭ «ەسمەرالدا» بالەتىنەن ۆارياتسيالار ورىندادى. ءدۇبىرلى دودا كلاسسيكالىق شىعارمالاردان بولەك ەكى زاماناۋي ءنومىردى قامتىدى. بايقاۋدىڭ بۇل باعدارلاماسىندا باقتيار ۋاليتبەك سيازبەكوۆتىڭ «مەنىڭ بولشەگىم» جانە بەلگىلى قىتايلىق حورەوگراف يسيان چجاننىڭ «ويانۋىن» كورسەتتى.
– كونكۋرس جايلى ءبىر-ەكى اي بۇرىن ەستىسەك تە, دايىندىقتى 7-8 كۇن قالعاندا باستادىق. ويتكەنى, بار كۇشىمىز بەن ۋاقىتىمىزدى «پاريج قۇداي-انا سوبورى» بالەتىنىڭ پرەمەراسىن وتكىزۋگە ارنادىق. ءبىز ءۇشىن پرەمەرا قاشان دا ءبىرىنشى ورىندا, جارىستىڭ ءبارى – ەكىنشى كەزەكتەگى دۇنيە. دەسە دە, «استانا وپەراداعى» تىنىمسىز دايىندىقتاردىڭ ارقاسىندا بايقاۋ كەزىندە بويىمدا الاڭداۋ, قوبالجۋ سەزىمى بولمادى. ويتكەنى دەنەم كونكۋرستىق جۇكتەمەنى كوتەرۋگە دايىن ەدى. ال, جۇيكەمە سالماق تۇسىرمەۋ ءۇشىن ساحناعا وزامىن دەپ ەمەس, كورەرمەندى قۋانتامىن دەپ شىقتىم, – دەيدى جەڭىمپاز.
ورىنداۋشىلاردىڭ شەبەرلىگىن بەرلين مەملەكەتتىك بالەتىنىڭ كوركەمدىك جەتەكشىسى, «توكيو-بالەتتىڭ» شىعارماشىلىق جونىندەگى كەڭەسشىسى ۆلاديمير مالاحوۆ باستاعان قازىلار القاسى باعالادى. ولاردىڭ قاتارىندا بالەت ارتىستەرىنىڭ ر.نۋرەەۆ اتىنداعى حالىقارالىق كونكۋرس ديرەكتورى ر.بوكور, سكوپە (ماكەدونيا) بي تەاترى جانە بي فەستيۆالىنىڭ ديرەكتورى ر.ريسيمكين, «Dance for You» جۋرنالىنىڭ رەداكتورى م.ۆيەرۋ, قازاقستاننىڭ حالىق ءارتىسى گ.تۇتقىباەۆا, بوستون بالەتىنىڭ كوركەمدىك جەتەكشىسى م.نيسسينەن, گوللانديا بي فەستيۆالىنىڭ كوركەمدىك جەتەكشىسى, روتتەردامداعى ونەر ۋنيۆەرسيتەتىنىڭ «كودارتس» بي اكادەمياسىنىڭ اتقارۋ كەڭەسىنىڭ مۇشەسى س.ۆيۋرستەن سەكىلدى بالەت مايتالماندارى بولدى.
– باقتياردىڭ بار قابىلەتىن پاش ەتۋگە كۇش سالدىق. ونىڭ فيزيكالىق مۇمكىندىگى كەڭ, مۋزىكامەن كەرەمەت ۇيلەسىمدى. ءمىنسىز سەكىرەدى. اكتەرلىك ويىنى قوشەمەتكە لايىق. بايقاۋعا قانداي باعدارلاما ۇسىناتىنىمىزدى كوپ ويلادىق. ءبىر جاعىنان ۋاقىت تا تىعىز. ءدال سول كەزدە «استانا بالەت» تەاترىنىڭ شاقىرتۋىمەن ەلورداعا قىتايدان بەلگىلى حورەوگراف يسيان چجان كەلگەن ەدى. اتاقتى بالەتمەيستەر لۋيدجو بونينو ونىڭ ءوزى دە كەرەمەت بيلەيتىنىن ايتتى. ءسويتىپ يسيان چجاندى باقتيارعا زاماناۋي بي قويىپ بەرۋىن قولقالادىم. بىردەن كەلىستى, – دەدى «استانا وپەرا» بالەتتىك ترۋپپاسىنىڭ كوركەمدىك جەتەكشىسى, رەسەيدىڭ حالىق ءارتىسى التىناي اسىلمۇراتوۆا.
ساناۋلى كۇندە باقتيارعا جاڭا بي ۇيرەتكەن يسيان چجان ءارتىستىڭ فيزيكالىق كۇيىنە جوعارى باعا بەرىپ, بولاشاعىنىڭ زور ەكەنىنە سەنىمىن بىلدىرەدى. «سوليست تاماشا فورمادا, ءبارىن لەزدە قاعىپ الادى, نەبارى ەكى كۇندە مەن ۇيرەتكەن جاڭا ءستيلدى مەڭگەرىپ, شەبەرلىگى بۇرىنعىدان شىڭدالا ءتۇستى» دەپ ءسۇيسىنىپتى قىتايلىق حورەوگراف.
«استانا وپەرا» تەاترىنىڭ جەتەكشى ءسوليسى باقتيار ادامجاننىڭ ءوز اۋزىنان بالا كەزىندە ونىڭ كۇرەسپەن اينالىسقانىن بىلدىك. بالەتكە ول 10 جاسىندا كەلىپتى.
«مەنىڭشە, قازاقى وتباسىنان شىققان ۇل بالالار بالەتتى بىردەن جاقسى كورىپ كەتپەيدى. قىزدار قىزىعۋى مۇمكىن. ال مەن ازىرگە لوسينا كيىپ الىپ, «بالەت ءارتىسى بولعىم كەلەدى» دەگەن جىگىتتى كەزدەستىرگەن ەمەسپىن. ول ءۇشىن ۋاقىت كەرەك. ءوز باسىم تەك ءتورت جىلدان كەيىن بالەتتىڭ نە ەكەنىن تۇسىنە باستادىم. بالەت دەگەن – وليمپيادالىق سپورت ءتۇرىنەن كەم تۇسپەيتىن سۇلۋلىق پەن اۋىر ەڭبەك ۇيلەسكەن ونەر. بۇل جەڭىس مەنى قاناتتاندىردى. ەندى بۇرىنعىدان دا ءوسىپ-جەتىلىپ, الداعى ماقساتتارىما قول جەتكىزگىم كەلەدى» دەگەن قۋانىشىمەن ءبولىستى باقتيار ادامجان.
ءمادينا جاقىپ
