بەلگىلى فوتوسۋرەتشى شۇكىر شاحايدىڭ «استانا – جان جۇرەگىم» اتالاتىن كەزەكتى فوتوالبومى جارىق كوردى. وسىعان دەيىن ول «تاۋەلسىزدىك: قاس-قاعىم ءسات», «تاۋەلسىزدىك», «استانا – 10 جىل», «استانا – قازاقستاننىڭ جۇرەگى», «سۋرەتشى كوزىمەن» جانە باسقا ەگەمەن ەل تاريحىنان, ەڭسەلى ەلوردانىڭ قالىپتاسۋ كەزەڭدەرىنەن سىر تارتاتىن 14 فوتوالبوم شىعاردى. قازاق, ورىس جانە اعىلشىن تىلدەرىندەگى بۇل ون بەسىنشى فوتوالبومى استانانىڭ 20 جىلدىعىنا ارنالعان.
فوتوالبوم «استانا – قازاقستاننىڭ جاڭعىرۋىنىڭ سيمۆولى, كوپۇلتتى مەملەكەت پەن ونداعى ەرىك-جىگەردىڭ سيمۆولى. بۇل – ەلدىڭ قيىن-قىستاۋ كەزەڭدەرىندە جارقىن بولاشاققا دەگەن بەرىك سەنىممەن باتىل قادامداردى اتقارۋىنىڭ جەمىسى. بۇل – ۇلتتىڭ سەنىمى مەن ءۇمىتىنىڭ, ەركىندىك الا وتىرىپ بولاشاقتاعى جەتىستىكتەرگە دەگەن سەنىمنىڭ سيمۆولى» دەگەن ەلباسى نۇرسۇلتان نازارباەۆتىڭ سوزىمەن اشىلادى.
ءارى قاراي فوتوسۋرەتشى ەلوردانى الماتىدان اقمولاعا اۋىستىرۋ تۋرالى قازاقستان رەسپۋبليكاسى جوعارعى كەڭەسىنىڭ 1994 جىلعى 6 شىلدەدەگى قابىلداعان تاريحي شەشىمىنەن باستاپ, استانانىڭ بۇگىنگە دەيىنگى وتكەن جارقىن جولى تۋرالى باياندايدى. سونىڭ ىشىندە ەلوردانىڭ الەمدىك ارەناداعى جەتىستىكتەرىن, وندىرىستەگى, ەكونوميكاداعى اۋىز تولتىرىپ ايتارلىقتاي كورسەتكىشتەرىن ءسوز ەتەدى.
ارينە, بۇل فوتوالبوم جايلى كوپ ءسوز ايتپاي, ونى كوزبەن كورۋ كەرەك. 320 بەتتەن تۇراتىن كولەمدى ەڭبەكتە سان الۋان فوتوسۋرەت جيناقتالعان. فوتوالبوم ەلوردا مەرەيتويىنا تاماشا تارتۋ بولدى.
