قوعامدىق كولىك قىزمەتىنىڭ جۇمىسى ءبىر جونگە كەلمەي-اق قويدى. اسىرەسە, كەيبىر كوندۋكتورلاردىڭ مادەنيەتسىزدىگىنە قايران قالامىن. قازاقستاننىڭ باس قالاسىندا ەڭبەك ەتىپ جۇرگەندەرىن ەستەن شىعاراتىندارى نەسى؟!
كوندۋكتورلاردىڭ ارنايى وقىتۋدان وتەتىنىنەن حاباردارمىز. دەگەنمەن, سولاردىڭ بارلىعى بىردەي ءوز مىندەتتەرىن تالاپقا ساي ورىندامايدى.
جولاۋشىعا بيلەت بەرۋدىڭ ورنىنا قالتا تەلەفونىمەن سويلەسىپ تۇرىپ الاتىندارىن قايتەرسىز. وزدەرى جان-جاعىنداعىلاردان قىمسىنبايدى دا. جەكە ومىرىنە قاتىستى ماسەلەنى كوپشىلىكتىڭ كوزىنشە تالقىلاپ تۇرا بەرەدى. داۋىستارىن ءسال باسەڭدەتۋگە دە ورەلەرى جەتپەيدى. ەسكەرتۋ جاساپ, جونگە سالعىسى كەلگەندەرگە جاۋاپتارى دايىن تۇرادى: «شارۋاڭ بولماسىن. كىممەن قالاي سويلەسۋ كەرەكتىگىن ءوزىم بىلەم…» دەپ ورەكپيدى. وندايلارمەن شاپىلداسۋدان ەشتەڭە ۇتپايتىنىن بۇگىندە ۇلكەندەر دە ءتۇسىنىپ الدى. جۇمعان اۋىزدارىن اشپايدى.
جاقىندا بارار جەرىمە جەتە الماي, ايدىڭ-كۇننىڭ امانىندا استانادا اداستىم دا قالدىم. كىمنىڭ كەسىرى دەيسىز بە؟ ارينە, مەنىڭ وسىلايشا سەرگەلدەڭگە تۇسۋىمە تاعى دا كوندۋكتورلار كىنالى. قالالىق ونكولوگيا ديسپانسەرىنە بەت العانمىن. ابىلاي حان داڭعىلىنىڭ بويىنداعى ءبىر ايالداماعا توقتاعاندا كوندۋكتور قىز: «تراۆماتولوگيا جانە ورتوپەديا ورتالىعىنان ءتۇسۋىڭىز كەرەك ەدى. ەندى قازىر شىعىڭىز دا, العا قاراي ءجۇرىپ, وڭعا بۇرىلىڭىز. سول جولمەن تىكە جۇرە بەرەسىز» دەگەن سوڭ, العا قاراي جۇرە بەردىم. ءجۇرىپ كەلەم, ءجۇرىپ كەلەم. بىراق دىتتەگەن جەرىمە جەتەر ەمەسپىن. تۇسىنىكسىز بىردەڭەلەر. ءسويتىپ, اجەپتاۋىر جۇرگەننەن كەيىن ءوتىپ بارا جاتقان بەيتانىس بىرەۋدەن سۇراسام, مۇلدە باسقا باعىتقا كەتىپ بارادى ەكەنمىن. جازعان قۇلدا شارشاۋ بار ما؟ كەلگەن ىزىممەن كەرى قايتتىم. جوعالتقان ۋاقىتىم مەن جۇقارعان جۇيكەم ءۇشىن كىمدى جازالارىمدى بىلمەي دالمىن. باعاناعى ايالداماعا قايتىپ كەلسەم, ەگدە تارتقان ءبىر قاريا وتىر ەكەن. اشۋعا بۋلىعىپ, بولعان جايتتى تۇگەل بايانداي جونەلدىم. ول دا سول باياعى كوندۋكتوردىڭ كەسىرىنەن قالا كەزىپ جۇرگەنىن جاسىرمادى. «وزدەرى قالانى دۇرىس بىلمەيتىن بولسا, جۇرتقا قالاي ءجون سىلتەيدى؟ سوندايلاردى قالاي جۇمىسقا الادى ەكەن…» دەپ سارناپ قويا بەردى.
راسىندا دا, استاناعا سىرتتان كەلۋشىلەر كوپ. كۇنى ەرتەڭ «ەكسپو-2017» كورمەسىن وتكىزگەلى وتىرمىز. سول كەزدە قوناقتاردىڭ الدىندا ابىرويىمىزدان ايرىلىپ قالماس ءۇشىن بۇل ماسەلەگە نەمكەتتى قاراماي, ونى بىرلەسىپ شەشكەن ءجون دەپ ويلايمىن.
قاناپيا مومىنوۆ, زەينەتكەر
