بۇگىن استانا قالاسىنىڭ اكىمى يمانعالي تاسماعامبەتوۆ تاۋەلسىزدىك كۇنى مەرەكەسىنە وراي ەلوردادا جاڭادان بوي كوتەرگەن №10 امبۋلاتورلىق-ەمحانالىق كەشەندى اشتى. جاڭا نىسان جامبىل جانە س.سەيفۋللين كوشەلەرىنىڭ قيىلىسىندا ورنالاسقان.
«100 مەكتەپ, 100 اۋرۋحانا» مەملەكەتتىك باعدارلاماسى اياسىندا سالىنعان جاڭا نىسان ءبىر اۋىسىمدا 500-گە جۋىق ادامدى قابىلداي الاتىن بولادى. ال جالپى العاندا 65 مىڭ ادامعا قىزمەت كورسەتۋگە باعىتتالعان. قازىرگى زامانعى مەديتسينالىق تەحنيكامەن جابدىقتالعان كەشەن ءۇش بلوكتان قۇرالعان بەس قاباتتى عيماراتتا ورنالاسقان.
