توتەنشە جاعداي بولعان جەرگە ەلوردا اكىمى باقىت سۇلتانوۆ بارىپ, وقيعانىڭ ءمان-جايىنا كوز جەتكىزدى.
وكىنىشكە قاراي, جارىلىستان زارداپ شەككەندەر بار. بۇل وقيعا قالاي بولعان؟ 15 ناۋرىز كۇنى ساعات 17.06-دا «101» ءورت ءسوندىرۋ ءبولىمىنىڭ ورتالىق بايلانىس بولىمىنە الاش تاسجولى, 65/1 مەكەنجايى بويىنشا گاز باللونى جارىلدى دەگەن حابارلاما تۇسەدى. «اقپارات تۇسكەن سوڭ ءورت ءسوندىرۋ قىزمەتىنىڭ كەزەكشى بولىمشەلەرى وقيعا ورنىنا 8 مينۋتتان كەيىن جەتكەن. ولار «مولپرودۋكتسەرۆيس» جشس-ءتىڭ عيماراتىندا گاز باللونىنىڭ جارىلۋى سالدارىنان توبە وپىرىلىپ تۇسكەنىن انىقتايدى. وپىرىلعان جەردىڭ اۋدانى 300 شارشى مەتردى قۇرايدى. جارىلىستىڭ سالدارىنان ءۇش ادام زارداپ شەككەن. 1991 جىلى جانە 1970 جىلى تۋعان ازاماتتاردىڭ دەنەسىن قاتتى كۇيىك شالعان. ولاردىڭ ەكەۋى №1 قالالىق اۋرۋحاناعا جەتكىزىلدى. قارقىندى تەراپيا بولىمشەسىندە ەم-دوم قابىلداۋدا. ال ءورت ءسوندىرۋ جۇمىستارىنا جەكە قۇرامنىڭ 22 ادامى, 6 تەحنيكا جۇمىلدىرىلعان» دەلىنگەن ۆەدومستۆونىڭ رەسمي حابارلاماسىندا.
ءسال شەگىنىس جاساساق, وسىدان ءبىراز ۋاقىت بۇرىن قالا اكىمى باقىت سۇلتانوۆ ەلورداداعى گاز تاراتاتىن جەلىلەردى تەكسەرۋگە ارنايى تاپسىرما بەرگەن بولاتىن. ەندىگى كەزەكتە گازدى باللونمەن تۇتىناتىنداردى تەكسەرۋ باستالاتىنى انىق. ولاي بولسا, كوپتەگەن ادامداردىڭ ومىرىنە قاۋىپ توندىرەتىن گاز باللوندارىنىڭ قولدانىلۋىنا تىيىم سالىنادى.
