استانا
ەلوردادا ەلەكتروموبيلدەرگە عانا ارنالعان كولىك تۇراعى اشىلادى. مۇنداي شارا 2018-2020 جىلدارعا ارنالعان قورشاعان ورتانى ساۋىقتىرۋ جونىندەگى كەشەندى جوسپاردا قاراستىرىلعان.
الماتى وبلىسى
اۋەزوۆ اۋدانىنا قاراستى «سايران» حالىقارالىق اۆتوۆوكزالىنىڭ اۋماعىنا جاڭعىرتۋ جۇمىستارى جۇرگىزىلىپ, حالىقارالىق ستاندارتتارعا سايكەستەندىرۋ جۇرگىزىلۋدە. وسى ۋاقىتقا دەيىن 120 قۇرىلىس نىسانى, سونىڭ ىشىندە 100 ساۋدا ورتالىعى مەن 20 ءدامحانا قالپىنا كەلتىرىلگەن. ەندى بەينەباقىلاۋ, فاستفۋد, Wi-fi ايماقتارى, مۇز ايدىنى, زاماناۋي تاكسوموتورلى تۇراق جانە جاڭا بيلەت ساتۋ تەرمينالدارى ورناتىلاتىن بولادى.
اقتوبە وبلىسى
تەمىر اۋدانىندا بارلىق مەكتەپتەردە قازاقتانۋ كۋرسى اشىلدى. ۇلتتىق سالت-ءداستۇردى جاڭعىرتۋعا ارنالعان كۋرستا وقۋشىلاردى دومبىرا شەرتۋگە ۇيرەتەدى. ساباقتار تەگىن وتكىزىلەدى.
شىعىس قازاقستان وبلىسى
سەمەيدەگى ماشينا قۇراستىرۋ زاۋىتىندا جىل سوڭىنا دەيىن ءارتۇرلى مودەلدەگى 700 جۇك كولىگى شىعارىلادى. حالىق ءمىنىپ جۇرگەن ءاربىر ەكىنشى كولىك ەلىمىزدە قۇراستىرىلعان. ونىڭ ىشىندە اسىرەسە «ۋرال» اۆتوكولىكتەرى ەرەكشە سۇرانىسقا يە. كولىكتەر 6-دان 22 تونناعا دەيىن جۇك تاسي الاتىن.
تۇركىستان وبلىسى
وبلىس اۋماعىندا «ءداستۇرلى قۇندىلىقتار كەرۋەنى» تاقىرىبىندا كوشپەلى جيىندار وتۋدە. حالىققا ءمادەني, رۋحاني, ءدىني تۇرعىدا ءتۇسىندىرۋ جۇمىستارىن جۇرگىزۋ ماقساتىندا ۇيىمداستىرىلعان وسىنداي شارالار بۇعان دەيىن ارىس قالاسى مەن سارىاعاش, ماقتاارال, جەتىساي, كەلەس, شاردارا, قازىعۇرت جانە تولەبي اۋداندارىندا وتكىزىلدى.
قىزىلوردا وبلىسى
قىزىلوردالىق مەملەكەتتىك قىزمەتكەرلەر زاڭسىز بەرىلگەن سىيلىقتارىن تاپسىرۋدا. ناقتى ايتقاندا, 8 قىزمەتكەر مەملەكەتتىك قىزمەت كورسەتكەنى ءۇشىن ازاماتتاردان العان سىي-سياپاتىن ارنايى قورعا وتكىزدى. جىل باسىنان بەرى وسىنداي 22 سىيلىق ارناۋلى قورداعى قۇندى زاتتار نارىقتىق بولشەك ساۋداعا شىعارىلىپ, تۇسكەن قارجى رەسپۋبليكالىق بيۋدجەتكە اۋدارىلادى.
ماڭعىستاۋ وبلىسى
مۇنايلى اۋدانىندا ءۇيدى دەزينفەكتسيالاۋ سالدارىنان 5 ادام ۋلانىپ, ولاردىڭ ەكەۋى قايتىس بولعان. دەزينفەكتسيا جۇرگىزگەن كومپانيانىڭ مامانى ۋاقىتشا ۇستاۋ يزولياتورىنا قاماۋعا الىندى. بەلگىلى بولعانداي, قايتىس بولعاندار قاندالاعا قارسى «كۆيك-فو» پرەپاراتىنان ۋلاعان.
قاراعاندى وبلىسى
جەلتوقسان ايىندا «جالتىربۇلاق» كەن ورنىنىڭ شيكىزاتىن قايتا وڭدەيتىن تسەح اشىلادى. اتالمىش جوبا وبلىستىڭ كاسىپكەرلىكتى دامىتۋ كارتاسىنا ەنگىزىلگەن. جالپى قۇنى – 3,4 ميلليارد تەڭگە. 123 ادامدى جۇمىسپەن قامتىعان ءوندىرىس ورنىنىڭ جىلدىق قۋاتى 515 مىڭ توننا تۇنبا ازىرلەۋگە شاقتالعان.
