شىعىس قازاقستان وبلىسىنداعى تاسقىن سۋدان بىرنەشە اۋدان حالقى زارداپ شەككەنى بەلگىلى. «اپات ايتىپ كەلمەيدى». وسى ورايدا بۇكىل ەل-جۇرت بولىپ, شىعىستاعى باۋىرلارعا قولدان كەلگەنشە كومەك بەرىلۋدە.
كۇنى كەشە استانادان جۇك تيەلگەن كولىكتەر كەرۋەنى اياگوزگە قاراي اتتانىپ كەتتى. «جاسامپاز» كونسورتسيۋمى اياگوز اۋدانىندا سۋ تاسقىنىنان زارداپ شەككەن تۇرعىندارعا گۋمانيتارلىق كومەك رەتىندە كۇندەلىكتى تۇرمىسقا قاجەتتى قۇرال-جابدىقتار جىبەردى.
«ونىڭ ىشىندە 4 مىڭ توسەك ورىن, بالالار مەن ەرەسەكتەرگە ارنالعان سىرت كيىمدەر, وقۋشى فورمالارى, 1500 دانا اياق كيىم, 1500 دانا كورپە بار. سونىمەن قاتار 1 ملن تەڭگە كولەمىندە قارجىلاي كومەك بەرىلدى. ايتا كەتەيىك, جوعارىدا اتالعان ونىمدەردىڭ بارلىعى وتاندىق بۇيىمدار. جۇك تيەلگەن كولىكتەر جەكسەنبى كۇنى تاڭعى ساعات 10.30-دا استانا قالاسى بايىرقۇم كوشەسىنەن اتتاندى» دەيدى كونسورتسيۋمنىڭ اتقارۋ كەڭەسىنىڭ ءتورايىمى گۇلميرا ۋاحيتوۆا.
ەسكە سالا كەتەيىك, «جاساپماز» كونسورتسيۋمى وسىدان ەكى جىل بۇرىن قۇرىلعان. وتاندىق نارىقتا ساپالى ءارى باسەكەگە قابىلەتتى ءونىم ۇسىناتىن ەڭ ۇلكەن كونسورتسيۋم قۇرامىنا بۇگىندە 59 قازاقستاندىق كومپانيا كىرەدى.
گۇلميرا ايماعانبەت
