استانا حالىقارالىق اۋەجايىنا «LOT Polish Airlines» اۆياكومپانياسىنىڭ رەيستەر Boeing-737 اۆيالاينەرى كەلىپ قوندى. وسى وقيعا اياسىندا استانا مەن ۆارشاۆانىڭ اراسىن جالعاستىراتىن جاڭا اۋەجولىنىڭ اشىلۋ سالتاناتى ءوتتى. وعان قازاقستان رەسپۋبليكاسى ازاماتتىق اۆياتسيا كوميتەتىنىڭ توراعاسى تالعات لاستاەۆ, استانا اۋەجايى باسقارماسىنىڭ توراعاسى پاولو ريچيوتتي قاتىستى.
«LOT» اۆياكومپانياسىنىڭ توراعاسى رافال ميلچارسكي ءوز سوزىندە پولشانىڭ سىرتقى تاۋار اينالىمىندا قازاقستاننىڭ ماڭىزدى رولىنە توقتالدى. ەكى ەل اراسىندا تاۋار اينالىمى 2016 جىلى 759,4 ملن دوللاردى قۇراعان ەكەن. رافال مىرزا قوس قالانىڭ اراسىن جاقىنداستىراتىن تىكەلەي رەيستەردىڭ ارقاسىندا بۇل كورسەتكىش الداعى ۋاقىتتا ءالى دە وسەتىنىنە سەنىم ءبىلدىردى. «LOT Polish Airlines» اۆياكومپانياسى – الەم بويىنشا 70-تەن استام باعىت بويىنشا ورنىققان ۇشۋ جەلىسى مەن 37 اۋە كەمەسىمەن جابدىقتالعان پولشانىڭ ۇلتتىق اۆياكومپانياسى. جاڭا باعىت استانا مەن ۆارشاۆا اراسىنا اپتاسىنا 4 رەت قاتىنايتىن بولادى. سونىمەن بىرگە, «LOT» كومپانياسى – «ەكسپو-2017» كورمەسىنىڭ رەسمي سەرىكتەسى بولىپ تابىلادى. اۆياكومپانيا كورمەگە كەلەتىن جولاۋشىلارعا بيزنەس, ەكونوم-پرەميۋم جانە ەكونوم سەكىلدى قىزمەت كورسەتۋدىڭ 3 ساناتى بويىنشا قولايلى ساياحاتپەن قامتاماسىز ەتپەك.
