استانانىڭ تۋريستىك سيمۆولى بويىنشا كونتسەپتۋالدىق, ديزاينەرلىك شەشىمدەردى تابۋ ماقساتىندا ۇزدىك نوباي-جوباسىنا بايقاۋ جاريالاندى.
سيمۆول, بەلگى (برەند) قالانىڭ مارتەبەسىن, ونىڭ تۋريستىك تارتىمدىلىعىن, كورىكتى جەرلەرىن, لاندشافتىنىڭ ەرەكشەلىكتەرىن جانە تاريحىن جەتكىزۋگە ءتيىس. سيمۆول جارقىن, ىقشام جانە زاماناۋي بولۋى كەرەك. ءتۇس گامماسى قازاقتاردىڭ دەكوراتيۆتى ونەرىنىڭ ءتۇس جانە كومپوزيتسيالىق داستۇرلەرىن كورسەتۋگە ءتيىس. تۋريستىك بەلگىدە قالانىڭ رۋحىن, ونىڭ ءمانىن جەتكىزەتىن تۇپنۇسقا سەمانتيكالىق شەشىمدەردى, گرافيكالىق ەلەمەنتتەردى, ايرىقشا ۇرانداردى قولدانۋعا بولادى. تۋريستىك سيمۆول ديزاين مەن گرافيكالىق ونەردىڭ زاماناۋي, الەمدىك ۇدەرىستەرىندە ورىندالۋعا ءتيىس.
بايقاۋ 2016 جىلدىڭ 26 جەلتوقسانى مەن 2017 جىلدىڭ 25 قاڭتار ارالىعىندا وتەدى. بايقاۋدى ۇيىمداستىرۋشى «استانا قالاسىنىڭ ساۋلەت جانە قالا قۇرىلىسى باسقارماسى» مم بولىپ تابىلادى. بايقاۋعا نيەت تانىتقان كەز كەلگەن ادام قاتىسا الادى.
بايقاۋ ماتەريالدارىن 010000, استانا قالاسى, بەيبىتشىلىك كوشەسى, 11, 535 كابينەت مەكەن-جايى بويىنشا, 2017 جىلدىڭ 25 قاڭتارى ساعات 18:00 –دەن كەشىكتىرمەي تاپسىرۋ قاجەت. بايقاۋدىڭ ەرەجەسىمەن تومەندە تىركەلگەن قۇجاتتان تانىسۋعا بولادى.
