استانانىڭ جەرۇيىق ساياباعىندا ۇلتتىق وتباسى كۇنىنە ارنالعان «سالاۋاتتى وتباسى – سالاۋاتتى ۇلت» ۇرانىمەن قىزىقتى اكتسيا ءوتتى

شارانى استانا قالاسى دەنساۋلىق ساقتاۋ باسقارماسى, سالاۋاتتى ءومىر سالتىن قالىپتاستىرۋ ورتالىعى الماتى اۋدانى اكىمدىگىمەن بىرلەسىپ ۇيىمداستىردى.

– مەملەكەتىمىز وتباسى ينستيتۋتىنىڭ دامۋىنا ۇلكەن كوڭىل ءبولىپ, وعان ۇنەمى قولداۋ ءبىلدىرىپ كەلەدى. دۇنيەجۇزىلىك دەنساۋلىق ساقتاۋ ۇيىمى قازاقستاندى پوليوميليتتەن جانە بەزگەكتەن ارىلعان ايماق رەتىندە تانىدى. تاۋەلسىزدىگىمىزدىڭ 25 جىلى ىشىندە ەلىمىزدە قىزامىق, ديفتەريا, قىزىلشا سىندى جۇقپالى اۋرۋلار ءجۇز ەسەدەن استام كورسەتكىشكە ازايدى. بالا تۋ كورسەتكىشى دە 10 مىڭ سابيگە ارتتى. دەنساۋلىق ساقتاۋ مامانى رەتىندە وسىعان مارقايامىن.

استانا تۇرعىندارىنىڭ الەۋمەتتىك كەلبەتىن سارالاساق, ەلوردادا ءبىلىمدى, بىلىكتى جاس وتباسىلار تۇرادى. سونداي وتباسىداعى ەرى مەن ايەلىنىڭ باسىندا ءبىر ەمەس, ەكى جوعارعى ءبىلىم توقايلاسقانىڭ زەرتتەۋلەر ايتادى. ەلوردا دارىگەرلەرى  وتباسى مەن جۇكتىلىكتى جوسپارلاۋعا كوپ ءمان بەرەدى. سونىڭ ارقاسىندا بالا ءولىمى ەكى ەسە ازايىپ, انا ءولىمى مۇلدە جويىلدى. بۇل كورسەتكىشتەر قازاقستاندى دامۋ قارقىنى جوعارى 50 مەملەكەتتىڭ قاتارىنا قوستى. الدىمىزدا ەندى وتىزدىققا كىرۋ ماقساتى تۇر. بۇل ماقساتتى دا ەڭسەرەمىز دەپ ويلايمىن, – دەدى استانا قالاسى دەنساۋلىق ساقتاۋ باسقارماسى باسشىسىنىڭ ورىنباسارى ءىلياس باكىروۆ.

ساياباققا جينالعاندارعا سالەمىن جەتكىزگەن وليمپيادا چەمپيونى, گرەك-ريم كۇرەسىنەن قازاقستان قۇراماسىنىڭ جاتتىقتىرۋشىسى, «استانا» كاسىبي سپورت كلۋبىنىڭ اعا مەنەدجەرى يۋري مەلنيچەنكو بارشانى بوكسشى گەننادي گولوۆكيننىڭ كەزەكتى جەڭىسىمەن قۇتتىقتاپ, ريو وليمپياداسىنداعى سپورتشىلارىمىزدىڭ جارقىن جەتىستىكتەرىن جاڭعىرتتى.

اكتسيا وتباسىلار اراسىنداعى ءتۇرلى جارىستارمەن جالعاسىپ, مەرەكەلىك كونتسەرتكە ۇلاستى. اتاپ ايتساق, «سالاۋاتتى ءومىر سالتىن ۇستاناتىن ۇزدىك وتباسى» ينتەرنەت-بايقاۋىندا ابدۋللاەۆتار وتباسى توپ جاردى. ال بورانباەۆتار مەن ايتىموۆتەر اۋلەتتەرى ەكىنشى جانە ءۇشىنشى ورىنداردى يەلەندى.

امانعالي قالجانوۆ