قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆتىڭ باستاماسىمەن اشىلعان «اتامەكەن» قازاقستان كارتاسى» – ەتنو-مەموريالدىق كەشەنى بۇگىنگى تاڭدا ەلوردا تۇرعىندارىنىڭ عانا ەمەس, قالا قوناقتارىنىڭ دا ەڭ كوپ كەلەتىن مادەني ورىندارىنىڭ ءبىرى. جاقىندا الماتى اۋدانىنىڭ ءبىر توپ قاريالارى استانانىڭ وسىناۋ ايشىقتى نىسانىندا بولىپ, ونداعى عاجايىپتاردى كوزبەن كورىپ قايتتى.
ولار اتالمىش اۋداننىڭ ۇيدە الەۋمەتتىك كومەك الاتىن 50-گە جۋىق جالعىزىلىكتى زەينەتكەرى مەن مۇگەدەگىنە ءار وبلىستىڭ وزىنە ءتان ەرەكشەلىگى مەن جەتىستىكتەرىن ورىس جانە قازاق تىلىندە اڭگىمەلەپ بەردى.
ارداقتى اعا بۋىن وكىلدەرى ەلىمىزدىڭ ايگىلى قالالارىنىڭ كىشىرەيتىلگەن ۇلگىدەگى عيماراتتارى مەن ەسكەرتكىشتەرىن, رەسپۋبليكامىزداعى 14 وبلىس پەن استانا جانە الماتى قالالارىنىڭ وتكەنى مەن بۇگىنگى تىنىسىنان سىر شەرتەتىن قۇندى مۇرالاردى تاماشالادى.
كارتانىڭ ەرەكشە سانمەن جاسالعان ماكەتتەرىنىڭ ءبىرى – كاسپي تەڭىزى. سونىمەن قاتار, ەتنوكەشەندەگى ەلىمىزدىڭ تەمىر جول جەلىسى مەن پوەزداردىڭ ماكەتتەرىن قىزىقتاعان قاريالار قازاقستاننىڭ مادەنيەت, ەكونوميكا سالالارىنداعى جەتىستىكتەرىنە كۋا بولدى. كارتادا قىزىلوردانىڭ كۇرىشى, قاراعاندىنىڭ كومىرى, ماڭعىستاۋدىڭ مۇنايى, قارت بۋراباي, قورعالجىننىڭ ەركە قۇستارى مەن كاسپيدىڭ اققۋلارى, الاتاۋدىڭ اق باس شىڭدارى, تاعى دا باسقا ايتىپ تاۋىسا المايتىن قازىنالى قازاق دالاسى اسەم بەينەلەنگەن. قاريالار تۋعان ولكەنىڭ قۇندىلىقتارىن وسىناۋ كارتادان كورىپ, ەرەكشە سەزىمگە بولەندى. اسىرەسە, «حان شاتىر», تاۋەلسىزدىك سارايى, «نۇر استانا» جانە «ازىرەت سۇلتان» مەشىتتەرى مەن تاعى دا باسقا نىسانداردىڭ ماكەتتەرى كەلۋشىلەرگە قاتتى ۇنادى.
– ەلىمىزدەگى تاۋلار, قىراتتار, وزەن-كولدەر, ورماندى دالالار وتە تاماشا سيپاتتالعان. ءوزىمىز تۇراتىن استانادا دا تاماشا جەرلەر كوپ ەكەن. قىسقاسى, «اتامەكەن» قازاقستان كارتاسى ەتنو-مەموريالدىق كەشەنى ماعان وتە ۇنادى. بۇل جەردە مەن ءوز ەلىمنىڭ تابيعاتىمەن جانە دە الەم كەرەمەتتەرىمەن تانىستىم. مۇراجاي قىزمەتكەرلەرىنە, سونداي-اق, الماتى اۋدانىنىڭ جالعىزىلىكتى زەينەتكەرلەر مەن مۇگەدەكتەرگە ۇيدە الەۋمەتتىك كومەك كورسەتەتىن №1 جانە №2 بولىمشەلەرىنىڭ قىزمەتكەرلەرىنە راحمەت, – دەپ م.ابدراحمانوۆا قاريالار اتىنان العىسىن ايتتى.
گۇلبارشىن وكەشقىزى
