ماۋسىمنىڭ 10 كۇنى اتىراۋ قالاسىنان باستالعان «مەنىڭ ەلىم – مويا سترانا» اتتى ەكسپەديتسيالىق موتو-شەرۋ استانا قالاسىنا كەلىپ جەتتى. اتالعان شارا «قازاقستان-2050» جالپىۇلتتىق قوزعالىسىنىڭ قولداۋىمەن ۇيىمداستىرىلىپ وتىر.
ەكسپەديتسيا مەملەكەتتىك «تۋعان جەر» باعدارلاماسى مەن «جەرگىلىكتى تۋريزم» جوباسى اياسىندا جۇزەگە اسىپ وتىر. ەكسپەديتسيانىڭ ماقساتى تۋعان جەردىڭ تاريحىمەن تانىسىپ, ەلىمىزدىڭ كورىكتى جەرلەرىن ارالاۋ بولىپ سانالادى. «WHEELS BROTHERS MC» موتوكلۋبىنىڭ پرەزيدەنتى ءارى ەكسپەديتسيا جەتەكشىسى ولەگ ءشمالدىڭ ايتۋىنشا, موتوشەرۋ ەل تاريحىن تانۋدا تاپتىرماس مۇمكىندىك بولعان. ماسەلەن, ەكسپەديتسيا مۇشەلەرى ەلىمىزدىڭ 20-دان استام قالاسىن ارالاپ, تاريحي ورىنداردا ايالداعانىن تىلگە تيەك ەتتى.
– قازاق ەلىنىڭ جانە ءوز ولكەڭنىڭ گەوگرافيالىق جاعدايىن بىلمەي, پاتريوت بولۋ مۇمكىن ەمەس. ماسەلەن, ەكسپەديتسيا مۇشەلەرى حانداردىڭ كەسەنەلەرى مەن ورالداعى پۋگاچەۆ مۇراجايىندا بولدى. سونداي-اق, ءبىز ماڭعىستاۋ وبلىسىنداعى شاتقالدا بولدىق. ءبىر تاڭقالارلىق جاعداي, اتالعان جەرگە ەۋروپالىق تۋريستەر كەلىپ, قىزىعىپ جاتىر. ال ءبىز ءوزىمىزدىڭ تاريحي قۇندىلىقتارىمىزعا اسا ءمان بەرىپ وتىرعان جوقپىز, – دەيدى ول.
ولەگ ءشمالدىڭ ايتۋىنشا, ەكسپەديتسيانىڭ قۇرامىندا 8 ادام بار. ولار موتوشەرۋدەن كەيىن ەلىمىزدەگى 25 تاريحي ورىندى انىقتاپ, جاريالايتىن بولادى.
سەرىك جولداسباي
