ەسىل اۋدانىندا اباتتاندىرۋ جۇمىستارى جالعاسۋدا. اۋداندا جاساندى جول توسەمەسى بار بالالار مەن فۋتبول الاڭدارى, حوككەي ويناۋعا لايىقتالعان الاڭدار, جاتتىعۋعا جانە workout-كەشەندەرىنە ىڭعايلى سپورت الاڭدارى سالىندى.
اۋلالاردا قوقىس جاشىكتەرى مەن ورىندىقتار ورناتىلىپ, اعاشتار وتىرعىزىلدى.
«ەسىل اۋدانى بويىنشا 483 تۇرعىن ءۇي كەشەنى بار. ونىڭ 87 پايىزى قالپىنا كەلتىرۋ جۇمىستارىن قاجەت ەتپەيدى. قالعان 13 پايىزىندا اباتتاندىرۋ جۇمىستارىن جالعاستىرامىز. بيىل 42 تۇرعىن ءۇي كەشەنىندە ءتيىستى جۇمىستار اتقارىلدى. بيىل «جاعالاۋ 3» تۇرعىن ءۇي كەشەنىنە 16 جاتتىعۋ كەشەنىن ورناتتىق, 6 فۋتبول الاڭى پايدا بولدى. بۇگىندە اۋدانىمىزدا 30 مىڭنان اسا اعاش وتىرعىزىلدى. بۇل جۇمىستار كەلەرى جىلى دا جالعاسادى» دەدى ەسىل اۋدانى اكىمدىگى اباتتاندىرۋ ءبولىمىنىڭ باسشىسى جارقىن ايتجانوۆ.
