كەشە ەلباسى استانا حالىقارالىق اۋەجايىنىڭ جاڭا تەرمينالىندا بولىپ, جولاۋشىلارعا ارنالعان نەگىزگى عيماراتتى ارالاپ شىقتى.
اۋەجايدىڭ باس ديرەكتورى رادىلبەك ءاديمولدانىڭ ايتۋىنشا, تەرمينال VIP جانە قاراپايىم جولاۋشىلارعا ارنالعان ەكى ايماقتان تۇرادى. ياعني, بۇدان بىلاي استاناداعى اۋەجايدىڭ ەكى بىردەي تەرمينالى جولاۋشىلارعا قىزمەت كورسەتەتىن بولادى. اۋەجايدىڭ جاڭادان سالىنعان بولىگى «ت1» دەپ بەلگىلەنسە, ال ەسكى عيمارات «ت2» دەپ اتالادى.
– جاڭا تەرمينالدا ءتورت كىرەبەرىس بار. ىشىندە جولاۋشىلاردى تىركەيتىن 26 بىردەي ورىن جانە تولقۇجات تەكسەرەتىن 42 كابينا ورناتىلعان. ال جاڭا جۇيەنىڭ ارقاسىندا قولجۇكتەردىڭ 1200 داناسىن ءبىر ساعاتتىڭ ىشىندە وتكىزۋگە بولادى. «جۇكتەردى وتكىزۋ جۇيەسىنىڭ باستى ەرەكشەلىگى سول, قانداي دا ءبىر قاۋىپتى جۇكتەر بولسا, ونىڭ بارلىعى اۆتوماتتى تۇردە بىردەن باسقا جولاقپەن كەتەدى دە, قاۋىپسىز ايماققا شىعارىلادى. ەكىنشى قاباتتا تولىعىمەن ءدامxانالار مەن مەيرامxانالار بولادى. VIP-ايماقتا دارەتxانالارمەن بىرگە, دۋشقا تۇسەتىن ورىندار دا بار. جاڭا تەرمينالدىڭ جالپى اۋدانى – 47 مىڭ شارشى مەتر, – دەدى ول.
رادىلبەك ءاديمولدانىڭ سوزىنشە, جاڭا تەرمينال جولاۋشىلارعا ءتورت-بەس كۇننەن كەيىن قىزمەت كورسەتە باستايدى. سونداي-اق, ول ەسكى عيماراتتان ىشكى رەيستەر, ال جاڭا تەرمينالدان xالىقارالىق رەيستەرگە ۇشىرىلاتىنىن ايتتى. جالپى, جاڭا تەرمينال جىلىنا 5 ميلليون ادامعا قىزمەت كورسەتەدى دەپ جوسپارلانىپ وتىر. ەسكى عيماراتپەن بىرگە ەسەپتەگەندە استانا حالىقارالىق اۋەجايى 8,2 ملن جولاۋشىعا قىزمەت كورسەتەدى. بۇل «ەكسپو-2017» حالىقارالىق كورمەسى كەزىندە جولاۋشىلارعا وتە قولايلى بولماق.
