ەلوردادا 30-عا جۋىق سپورت جانە شىعارماشىلىق اۋلا كلۋبتارى بار. ولار تۇرعىندارعا تەگىن قىزمەت كورسەتەدى. نەگىزگى ماقساتى – الەۋمەتتىك وسال توپتاعى وتباسى بالالارىنىڭ بوس ۋاقىتىن ءتيىمدى وتكىزۋ. اۋلا كلۋبتارىنداعى ساباقتار بالالار مەن جاسوسپىرىمدەردىڭ بەلسەندى ءارى جان-جاقتى دامۋىنا اسەرىن تيگىزەدى. مۇندا كەلگەندەر جاڭا دوستار تاۋىپ, ءوز قىزىعۋشىلىقتارىمەن اينالىسادى.
سوڭعى سەگىز جىل ىشىندە بۇل الەۋمەتتىك جوبا تۇراقتى تۇردە ىسكە اسىپ كەلەدى. بۇگىنگى تاڭدا ەلوردانىڭ ءتورت اۋدانىنداعى 29 كلۋبتا 3100-دەن استام ادام تاربيەلەنۋدە. 7-29 جاس ارالىعىنداعى بالالار مەن جاستار ءۇشىن 133 ۇيىرمە مەن سەكتسيالار جۇمىس ىستەيدى. ونىڭ ىشىندە سپورت سەكتسياسى – 76, شىعارماشىلىق باعىتتاعى ۇيىرمەلەر سانى – 57.
– بۇگىندە نۇر-سۇلتان قالاسى بويىنشا 29 اۋلا كلۋبى جۇمىس ىستەيدى. اۋلا كلۋبتارى قالانىڭ جاس تۇرعىندارى ءۇشىن مادەني-سپورتتىق ورتالىق سانالادى. سەبەبى وسى جوبا ارقىلى بالالار مەن جاستاردى بۇقارالىق سپورتقا, شىعارماشىلىق ۇيىرمەلەرگە, ومىرلىك قاجەتتى داعدىلارعا ۇيرەتكىمىز كەلەدى. اۋلا كلۋبتارى جاستار مەن جاسوسپىرىمدەر اراسىنداعى قىلمىستىڭ ازايۋىنا, بالالاردىڭ دەنساۋلىعىن جاقسارتۋعا جانە ولاردىڭ ومىرلىك بەلسەندىلىگىن ارتتىرۋعا تىكەلەي اسەرى زور. سونداي-اق قازاقستاندىق ءپاتريوتيزمدى دامىتۋعا ىقپال ەتەدى. اۋلا كلۋبتارى دەمالىس كەزىندە وتە كوپ سۇرانىسقا يە. وسى رەتتە بالالار مەن جاسوسپىرىمدەردىڭ تولىققاندى بوس ۋاقىتىن ۇيىمداستىرۋعا نەگىز بولا الادى, – دەدى «استانا جاستارى» كمم اۋلا كلۋبتارىن دامىتۋ ءبولىمىنىڭ مامانى اسەل بولاتقىزى.
كلۋبتاعى سەكتسيالار مەن ۇيىرمەلەردەن بالالار بىرنەشە باعىتتى تاڭداۋعا مۇمكىندىگى بار. ونىڭ ىشىندە كاراتە, بوكس, ەركىن كۇرەس, دزيۋدو, ۇستەل تەننيسى, شاحمات, دويبى, حورەوگرافيا, مۋزىكالىق اسپاپتاردا ويناۋ, ۆوكال جانە باسقا دا ۇيىرمەلەر جۇمىس ىستەيدى.
– ەلوردالىق اۋلا كلۋبتارىنىڭ قاتىسۋشىلارى جىل سايىن ءتۇرلى جالپىقالالىق, رەسپۋبليكالىق جانە حالىقارالىق جارىستارعا قاتىستى. اسىرەسە, سپورت باعىتىندا جوعارى جەتىستىكتەرگە جەتىپ ءجۇر. اتاپ ايتقاندا, كلۋب تاربيەلەنۋشىلەرى بولگاريا, ارمەنيا, قىرعىزستان, وزبەكستان, رەسەي, يتاليا, قازاقستان قالالارىندا وتكەن جارىستىڭ جۇلدەگەرلەرى اتاندى, – دەپ اتاپ ءوتتى «استانا جاستارى» كمم اۋلا كلۋبتارىن دامىتۋ ءبولىمىنىڭ مامانى.
بالاڭىزدى تەگىن ۇيىرمەگە نەمەسە سەكتسياعا جازۋ ءۇشىن كورسەتىلگەن مەكەنجايعا نەمەسە Instagram الەۋمەتتىك جەلىسى ارقىلى نۇر-سۇلتان قالاسى اۋلا كلۋبتارى جەلىسىنىڭ @ns_aula پاراقشاسىنا حابارلاما جازا الادى. ءارى قاراي ۇيىرمەلەردى تاڭداۋعا بولادى.
ايزادا جايىققىزى
