اۋرۋحاناعا جاتىپ ەمدەلۋدىڭ: شۇعىل جانە جوسپارلى تۇردە دەپ اتالاتىن ەكى
ءتۇرى بار. ومىرىنە قاۋىپ تونگەن جاعدايدا اۋرۋحاناعا شۇعىل جەتكىزىلگەن
ازاماتتاردىڭ تەگىن ەمدەلەتىنى تۇسىنىكتى. ول مەملەكەت كەپىلدىك بەرگەن تەگىن
مەديتسينالىق كومەك پاكەتى شەڭبەرىندە قارجىلاندىرىلادى. ال, جوسپارلى
تۇردە ەم قابىلداۋ دەگەنىمىز نە؟ جولدامانى قالاي الۋعا بولادى؟
«بۇل جەردە جەرگىلىكتى ەمحانالار ماڭىزدى ءرول اتقارادى. جوسپارلى ەم
قابىلداۋ ءۇشىن ازاماتتار تىركەلگەن ەمحاناسىنا بارۋى ءتيىس. مەديتسينالىق
كومەكتىڭ بۇل ءتۇرى سوزىلمالى اۋرۋلارمەن اۋىراتىن پاتسيەنتتەرگە
كورسەتىلەدى. ۋچاسكەلىك دارىگەر ءسىزدى قاراپ, اناليز تاپسىرۋعا جولداما بەرەدى.
بۇل پاتسيەنتتى اۋرۋحاناعا جاتقىزۋ قاجەتتىگىن راستاۋ ءۇشىن قاجەت. تەكسەرۋدەن
وتكەننەن كەيىن دارىگەرىڭىز سىزگە جولداما جازىپ بەرەدى», – دەيدى «الەۋمەتتىك
مەديتسينالىق ساقتاندىرۋ قورى» كەاق باسقارۋشى ديرەكتورى زابيرا
ورازاليەۆا.
ايتۋىنشا, جاتىپ ەمدەلەتىن اۋرۋحانانى دا ۋچاسكەلىك ماماننىڭ كومەگىمەن
تاڭداۋعا بولادى. وسىدان كەيىن جولداما «اۋرۋحاناعا جاتقىزۋ بيۋروسىنا»
تىركەلەدى. بيۋرو اتسيەنتتىڭ اۋراحاناعا قاي كۇنى جاتقىزىلاتىنىن كوبىنە
اۆتوماتتى تۇردە انىقتايدى. ال, ونكولوگيالىق, پسيحياتريالىق,
ناركولوگيالىق ديسپانسەرلەر, تەرى-ۆەنەرولوگيالىق جانە جۇقپالى اۋرۋلار
اۋرۋحاناسى سىندى مامانداندىرىلعان كلينيكالارعا جاتۋ ءۇشىن ستاتسينار
قىزمەتكەرىنىڭ كومەگى قاجەت.
ءارى قاراي نە ىستەۋ كەرەك؟
پاتسيەنتتىڭ قولىنا تالون بەرىلەدى. تالونداعى بىرەگەي كودتى ەنگىزىپ, كەزەكتى
https://bg.eisz.kz/ سايتى ارقىلى باقىلاپ وتىرۋعا بولادى. كەزەك كەلگەنگە
دەيىن دارىگەردىڭ بەرگەن بارلىق نۇسقاۋلارىن ورىنداپ, مۇقيات دايىندالۋ
قاجەت. ستاتسيوناردا ەمدەلۋگە كەدەرگى كەلتىرەتىن جاعدايلار تۋىنداپ جاتسا, ول
تۋرالى ەمدەۋشى دارىگەرگە ەرتەرەك حابارلاعان دۇرىس. اۋرۋحاناعا جاتاردا:
جەكە كۋالىگىڭىزدى, اۋرۋحاناعا جاتقىزۋ تالونىن, جولداما مەن
دياگنوستيكالىق زەرتتەۋلەردىڭ قورىتىندىسىن وزىڭىزبەن بىرگە الا بارۋدى
ۇمىتپاڭىز. ەگەر باسقا قالاداعى ستاتسيونارعا بارىپ ەمدەلەتىن بولساڭىز,
بيلەتتى ەرتەرەك قامداپ قويعان دۇرىس. ويتكەنى, مەديتسينالىق ساقتاندىرۋ
قورى جولعا كەتەتىن شىعىنداردى تولەمەيدى, دەيدى زابيرا ورازاليەۆا.
قانداي جاعدايدا جۇيە جولداما بەرۋدەن باس تارتۋى مۇمكىن؟
– پاتسيەنت قاجەتتى تەكسەرۋلەردەن وتپەگەن بولسا. ەگەر ەرتەرەك ەسكەرتىلسە
ستاتسيونار پاتسيەنتتى ءبىر تاۋلىككە دەيىن كۇتە الادى. وسى ۋاقىت ىشىندە ءتيىستى
اناليزدەردەن ءوتىپ ۇلگەرۋگە تىرىسىڭىز. ايتپەسە ءوتىنىم كۇشىن جويادى.
– اۋرۋحاناعا جاتاتىن تۇستا جۇقپالى اۋرۋمەن اۋىرىپ قالسا. مىسالى, وتكىر
رەسپيراتورلىق ۆيرۋستىق ينفەكتسيا جۇقتىرىپ العان پاتسيەنتتەر
قابىلدانبايدى.مۇندايدا ايىققاننان كەيىن قايتا حابارلاسۋ قاجەت.
ستاتسيوناردا جاتىپ ەمدەلۋگە قاجەتتى كورسەتىلىمدەر بولماسا.
ەگەر قۇجاتتاردى راسىمدەۋ بارىسىندا جوسپارلى ەمگە جاتقىزۋدان باس تارتسا
قوردىڭ حالىقپەن جۇمىس جونىندەگى دەپارتامەنتىنىڭ كومەگىنە جۇگىنۋگە
بولادى. تەلەفونى: 8 (7172) 647 023, 8 (7172) 647 066
ەلەكتروندى پوشتا: vopros@fms.kz نەمەسە مسق سايتىنداعى «حالىقتىق
باقىلاۋ» بولىمىنە حات جازىڭىز.
