قازاقستان رەسپۋبليكاسى جوعارعى سوتىنىڭ توراعاسى جاقىپ اسانوۆ پەن استانا قالاسى سوتىنىڭ توراعاسى تلەكتەس بارپىباەۆتىڭ اتىنا «International Law Company» حالىقارالىق قۇقىقتىق كومپانياسىنىڭ ديرەكتورى ك.ەسپەنبەتوۆادان العىس حات كەلىپ ءتۇستى.
حاتتا ول جەكە تۇلعالاردان بانكتىك شارت بويىنشا زاەم شارتىن ءىشىنارا جارامسىز دەپ تانۋ جانە ۇستالعان قارىزداردى قايتارۋ جونىندە وتىنىشتەردىڭ كوپ تۇسەتىندىگىن, ءارى وسى ەكىنشى دەڭگەيلى بانكتەردەگى نەسيەلەرگە قاتىستى سوتتا قارالعان ىستەر بويىنشا ءوزىنىڭ العىسىن بىلدىرگەن.
ك.ەسپەنبەتوۆا حاتتا ەسىل اۋداندىق سوتىنىڭ توراعاسى رۋسلان باقىتجانۇلىنا, سۋديا ايگۇل دۇيسەنبەكقىزىنا ازاماتتىق ىستەردى سوزبالاڭعا سالماي, جان-جاقتى قاراعانى ءۇشىن ءوزىنىڭ ريزاشىلىعىن بىلدىرگەن. ول ءىستى قاراۋ بارىسىندا سۋديالاردىڭ تاراپتاردىڭ قۇقىقتارىن تۇسىندىرە كەلە, ولاردىڭ ءوزارا قارىم-قاتىناستى بۇزبايتىن, ورتاق ىمىراعا كەلتىرە بىلگەندىگىن تىلگە تيەك ەتەدى.
سونداي-اق, سۋديالاردىڭ بىلىكتىلىگىنىڭ ناتيجەسىندە تالاپكەر ا.كاليەۆانىڭ جاۋاپكەر «ەۋرازيالىق بانك» اق-عا قاتىستى ازاماتتىق ءىس بويىنشا داۋ مەدياتسيا تارتىبىمەن شەشىلگەن. ورتاق كەلىسىم نەگىزىندە تالاپكەر از ۋاقىتتا تولەنگەن قاراجات سوماسىن بانكتەن قايتارىپ الۋ مۇمكىندىگىنە يە بولعاندىعى ايتىلادى.
بوتاگوز بايانوۆا,
استانا قالالىق سوتى
ءباسپاسوز قىزمەتىنىڭ جەتەكشىسى
