استانا اكىمى باقىت سۇلتانوۆ باستاعان كوميسسيا بىرنەشە اۆتوبۋس پاركىن ارالاپ, كوشپەلى وتىرىس وتكىزدى. وندا ولار جولاۋشى تاسىمالداۋشىلاردىڭ ماسەلەلەرىن تىڭداپ, اۆتوبۋستاردىڭ جاعدايىمەن تانىستى.
استانا حالقىنا سەگىز اۆتوبۋس پاركى (1 كوممۋنالدىق, 7 جەكەمەنشىك) قىزمەت كورسەتەدى. «استانا لرت» جشس باسقارماسىنىڭ توراعاسى بەكمىرزا يگەنبەردينوۆتىڭ ايتۋىنشا, قوعامدىق كولىكتىڭ سارالانعان ءتاريفى ەنگىزىلگەننەن كەيىن تاسىمالداۋشىلاردىڭ رەسمي كىرىسى ورتا ەسەپپەن 30 %-عا ارتتى.
الايدا, اۆتوپارك وكىلدەرى قاراجاتتىڭ ءالى دە جەتكىلىكسىزدىگىن ايتادى. ولار اۆتوبۋستاردىڭ ۇزدىكسىز جۇمىسىن قامتاماسىز ەتۋ جانە جۇرگىزۋشىلەردىڭ سانىن كوبەيتۋ ءۇشىن سۋبسيديالار كولەمىن ۇلعايتۋ ماسەلەسىن كوتەردى. اكىمدىك ءوز تاراپىنان اۆتوپاركتەر جۇمىسىنا حالىقتىڭ بەرگەن باعاسىنا سۇيەنەتىندەرىن ايتتى. ماسەلەن, iKomek جەدەل ارەكەت ەتۋ ورتالىعىنىڭ مالىمەتى بويىنشا سوڭعى ەكى ايدا قوعامدىق كولىك قىزمەتى ساپاسىنىڭ ناشارلىعىنا بايلانىستى 7721 شاعىم جانە كولىك قىزمەتىن جاقسارتۋ بويىنشا 623 ۇسىنىس تۇسكەن. ورتاشا ەسەپپەن العاندا, كۇن سايىن قوعامدىق كولىككە قاتىستى 112 قوڭىراۋ قابىلدانادى.
«سىزدەر اقشا سۇرايسىزدار. سارالانعان تاريف ەنگىزىلگەننەن كەيىن رەسمي كىرىستەرىڭىز 30 %-عا ارتتى. بىراق بىردە-بىرەۋىڭىز شىعىنداردى وڭتايلاندىرۋ جانە جۇمىس تيىمدىلىگىن ارتتىرۋ تۋرالى جاق اشقان جوقسىزدار. بارلىق ماسەلەنى سۋبسيديالاۋ ەسەبىنەن شەشۋگە تىرىسىپ, كاسىپورىن «ەكونوميكاسىن» قايتا قاراستىرمايسىزدار. بۇلاي بولمايدى!» دەگەن باقىت سۇلتانوۆ اكىمدىك سۋبسيديالاۋ ماسەلەسىنە قاتاڭ قارايتىنىن ەسكەرتتى. ونىڭ سوزىنشە, سۋبسيديالار كەمشىن تۇستاردى تۇزەتۋگە عانا ەمەس, سونىمەن بىرگە كاسىپورىننىڭ تيىمدىلىگىن ارتتىرۋعا قىزمەت ەتەدى.
وتىرىس قورىتىندىسىندا اكىمنىڭ تاپسىرماسىمەن اكىمدىك جانىندا قوعامدىق كولىك كاسىپورىندارىنىڭ جۇمىسىن ارتتىرۋ جانە ولاردىڭ شىعىندارىن وڭتايلاندىرۋ ماقساتىندا ارنايى جۇمىس توبى قۇرىلدى.
