نازىك بولمىسىمەن اۆتوبۋس تىزگىندەگەن كەيىپكەرىمىزدىڭ ءجۇزى كوپ تۇرعىنعا تانىس. ون التى جىل ىشىندە ول استاناداعى قوعامدىق كولىكتىڭ ءبىرتالايىن باسقاردى. اسىرەسە, №10, №23, №25, №9 باعدارلارىنىڭ تۇراقتى جولاۋشىلارى ونىڭ ۇقىپتىلىعى مەن مەيىرىمدىلىگىن ساعىنعان شىعار.
اۆتوبۋس ارتىنان جانۇشىرا جۇگىرەتىندەردى سابىرمەن كۇتىپ, ەشكىمنىڭ كوڭىلىن قالدىرماي ءبارىن مىنگەستىرىپ الۋعا دايىن «شوپىر ايەل» كورىنبەي كەتتى دەسەڭىز, تاپتىق. بۇگىندە ول №17, 44, 60 مارشرۋتتارىن جۇرگىزەدى.
«اۆتوبۋس جۇرگىزۋ بالا كەزىمدەگى ارمانىم ەدى» دەپ باستادى اڭگىمەسىن گۇلشات سيبيل. ءوزى ۇلكەن, ءىشى كەڭ قوعامدىق كولىكتىڭ رولىندە وتىرۋ جاس جەتكىنشەكتىڭ ومىرلىك ماقساتىنا اينالادى. جۇرگىزۋشىلىككە سۇرانىپ, اۆتوپارك ەسىگىن قاعىپ تۇرعان 18 جاستاعى بويجەتكەندى كورگەندە ول جەردەگىلەر ءازىل دەپ قابىلداپتى. ويتكەنى, 70-80 جىلدارى ايەلدەرگە مۇنداي ءىس سەنىپ تاپسىرىلمايتىن ەدى. ارمانى الىس تا بولسا جاقىندايىن دەپ 25 جاسىندا كەيىپكەرىمىز قاراعاندىداعى اۆتومەكتەپتە تروللەيبۋس ءجۇرگىزۋشىسىنىڭ وقۋىنا تۇسەدى. ال, تروللەيبۋستان اۆتوبۋسقا اۋىسقانى ءتىپتى قىزىق.
– بۇرىن «ايەلدەر 8-دەن ارتىق قوندىرمالى ورنى بار كولىككە يە بولا المايدى» دەگەن پىكىر بەرىك قالىپتاسقان ەدى. الايدا ەلباسىنىڭ باستاماسىمەن 1990 جىلى اۆتوبۋس ءجۇرگىزۋگە 10 ايەلدەن تۇراتىن ەكسپەريمەنتالدى توپ قۇرىلدى. قاتارىندا مەن دە بولدىم. ءسويتىپ بۇل ءىستىڭ قولىمىزدان كەلەتىنىن دالەلدەدىك. سودان بەرى اۆتوبۋستان تۇسپەدىم, – دەيدى گۇلشات.
1999 جىلى استاناعا كوشىپ كەلگەن ونى №1 قالالىق اۆتوپارك تاڭدانىسپەن قارسى الدى. بىراق ول جەردە بوس ورىن بولماي, كەيىپكەرىمىز تروللەيبۋس جۇرگىزىپ كەتەدى. ەكى مىڭىنشى جىلى عانا ارمانىنا قولى جەتىپ, ءالى كۇنگە دەيىن اۆتوبۋس كابيناسىنان اجىراعان ەمەس. سانالى عۇمىرىن جولاۋشى تاسۋعا ارناعان اپايدىڭ زەينەتكە شىعۋىنا جارتى جىل قالىپتى. بىراق زاڭدى دەمالىسىنا شىعۋعا اسىقپايدى. «جۇمىسىمدى جالعاستىرۋعا كۇشىم جەتكىلىكتى. سۇيىكتى ىسىممەن قوشتاسقىم كەلمەيدى» دەيدى ول.
جۇمىس كەستەسى تىعىز. تاڭعى بەس جارىمدا اۆتوپارككە جەتىپ, ديسپەتچەردەن جولداماسىن الادى, مەديتسينالىق تەكسەرۋدەن ءوتىپ بارىپ, گرافيك بويىنشا جۇمىسقا كىرىسەدى. ەڭ العاشقى رەيس التىعا ون بەس مينۋت قالعاندا شىقسا, سوڭعىسىن ادەتتە 7-دە باستايدى ەكەن. گۇلشاتتىڭ سەرىكتەس جۇرگىزۋشىسى بار. ولار ءۇش كۇن سايىن اۋىسىپ وتىرادى. ياعني ءۇش كۇن بويى كەشكى ون جارىمعا دەيىن جۇمىس ىستەپ, كەلەسى ءۇش تاۋلىك دەمالادى.
ونىڭ ايتۋىنشا, №60 اۆتوبۋسقا كۇن سايىن شامامەن 1200-دەي ادام وتىرادى. ال №44 مارشرۋت ءتىپتى 2 مىڭعا دەيىن جولاۋشى تاسيدى ەكەن. ەكيپاجدا وسىنشاما ءومىر يەسىن تاسىمالداعان سوڭ, جۇرگىزۋشى موينىنداعى جاۋاپكەرشىلىك وراسان. گۇلشات بۇل جاۋاپكەرشىلىكتى «ايەل شوپىرلار» ەركەكتەردەن كۇشتىرەك سەزىنەدى دەگەن ويدا. «ويتكەنى بىزدە ينستينكت باسىم. ايەلدەر «ءۇش د» ەرەجەسىن قاتاڭ ۇستايدى. ورىسشا ايتقاندا, «داي دوروگۋ دۋراكۋ». جولىمدى كەسىپ الدىما شىعىپ الاتىنداردى وتكىزە بەرەمىن. سولاردى جونىنە جىبەرىپ 30 سەكۋند جوعالتقانىم اپاتتى جاعداي تۋدىرعاننان الدەقايدا جاقسى. ال ەشكىمگە ەسە جىبەرمەۋ, ۇنەمى ءبىرىنشى بولۋ ەر ازاماتتاردىڭ قانىندا بار. ولاردىڭ جۇيكەسى دە جۇقالاۋ» دەيدى ول.
گۇلشات ءبىرىنشى جەتىپ, گرافيكتى ورىنداۋ ءۇشىن باسقا اۆتوبۋستارمەن ءبىر جولدا جارىسىپ جۇرۋگە دە تۇبەگەيلى قارسى. سونىمەن بىرگە, ۋاقىتى جەتكىلىكتى بولسا بىرەۋلەر سەكىلدى ايالدامادا ۇزاق توقتاپ تۇرىپ المايدى. وندايدا كەلەسى ايالداماعا باياۋ قوزعالادى ەكەن. دۇرىس تا شىعار, ايتپەسە, جولاۋشىلاردىڭ «سوڭعى ايالداما ەمەس, قالانىڭ ورتاسىندا قاقيىپ تۇرىپ الدى» دەپ شۋ شىعارىپ جاتاتىنى بار عوي. ايتپاقشى, باعدارشامنىڭ جاسىلىن كۇتىپ تۇرعان كەزدە جول بويىندا تۇرىپ سىرتتان ىشكە ەشكىمدى كىرگىزبەيدى, ەسىكتى اشىپ ەشكىمدى شىعارمايدى. «بۇل – زاڭعا باعىنۋشىلىق, ەكىنشىدەن, جولاۋشىلاردىڭ قاۋىپسىزدىگى» دەپ تۇسىندىرەدى ءوزى.
«قىزمەتىم جانىما جاقىن. اۆتوبۋس تىزگىندەگەن ايەلدەردىڭ ازدىعىنان با, جولاۋشىلار ەرەكشە قۇرمەت ءبىلدىرىپ جاتادى. راقمەتىن ايتىپ, ءساتتى كۇن تىلەپ. سوندايدا كوڭىلىم ودان سايىن كوتەرىلەدى» دەيدى تاجىريبەلى جۇرگىزۋشى. ماقالامىزدان كەيىن جانىمىزدا جۇرگەن جاقسى ءجۇرگىزۋشىمەن قازاقشا امانداسۋدى ۇمىتپاڭىز. ويتكەنى سارى ءوڭدى اپايىمىزدىڭ اناسى تاتار, اكەسى ناعىز قازاق ەكەن.
ءمادينا جاقىپ
