ەنەرگەتيكتەر اۋلەتى
استانا قالاسىندا ەكى عاسىرعا جۋىق ۋاقىت بويى ەنەرگەتيكا سالاسىندا قىزمەت ەتىپ كەلە جاتقان اۋلەت تۇرادى. ادال ەڭبەگىمەن وزگەلەرگە ۇلگى بولىپ, ەنەرگەتيكا سالاسى ومىرلەرىنىڭ اجىراماس ءبىر بولىگىنە اينالعان سىزدىقوۆتار وتباسىنىڭ 8 بىردەي مۇشەسى باس قالانى جىلۋ مەن جارىقپەن قامتىپ وتىرعان ىرگەلى ءوندىرىس ورنى – «استانا-رەك» مەكەمەسىندە قىزمەت ەتىپ كەلەدى.
ەنەرگەتيكتەر اۋلەتىنىڭ نەگىزىن قالاۋشى قاديشا جيەنباەۆا (سىزدىقوۆا) تسەلينوگراد قالالىق ەلەكتر جەلىسىنە (قازىرگى «استانا-رەك» مەكەمەسى) سوناۋ 1960 جىلى كەلگەن ەكەن. ول سول جەردە ءومىر بويى باقىلاۋشى بولىپ ەڭبەك ەتىپ, زەينەتكە شىققان. ادال ەڭبەگىنىڭ ارقاسىندا كوزگە ءتۇسىپ, قاتارىنان بىرنەشە رەت قالالىق جانە اۋداندىق كەڭەستىڭ دەپۋتاتى بولىپ سايلانادى. پارتيا كوميتەتىنىڭ مۇشەسى بولدى. تالاي مارتە جوعارى دارەجەلى وردەن, مەدالدارمەن ماراپاتتالعان. سۋرەتى «قۇرمەت تاقتاسىنان» تۇسپەيتىن ناعىز ەڭبەك ادامى بولدى.
اۋلەت ءداستۇرىن كەيىن قاديشا ۇسەنقىزىنىڭ ەكى اعاسى جالعاستىردى. نىعمەتجان سىزدىقوۆ ەلەكتر مامانى بولىپ قىزمەت ەتتى. ول دا بۇل سالادا ۇزاق ۋاقىت بويى, ياعني تابان اۋدارماستان 36 جىل بويى ەڭبەك ەتەدى. جاستايىنان وسى سالاعا جاقىن وسكەن نىعمەتجان ارنايى وقۋدى تامامداعان سوڭ, ەش ويلانباستان قالالىق ەلەكتر جەلىسىنە جۇمىسقا تۇرادى. ەڭبەك جولىن قاراپايىم جۇرگىزۋشى بولىپ باستاعان ول اعا شەبەر دەڭگەيىنە دەيىن كوتەرىلەدى.
بۇل اۋلەتتىڭ تاعى ءبىر ماقتانىشى دەپ ەگىنباي سىزدىقوۆتى ايتۋعا بولادى. ول اۋلەت تاريحىنداعى ەڭ كوپ ەڭبەك ءوتىلى بار ادام سانالادى. جالپى ەڭبەك ءوتىلى – 47 جىل. سوناۋ 1968 جىلى ەڭبەك جولىن قاراپايىم ەلەكتريك بولىپ باستاعان ەگىنباي ۇسەنۇلى 1980 جىلى شەبەر, سودان كەيىن اعا شەبەر بولىپ تاعايىندالدى. ول دا قارىنداسى قاديشا سەكىلدى بىرنەشە رەت اۋداندىق جانە قالالىق كەڭەس دەپۋتاتى بولىپ سايلاندى. كوپتەگەن مەدال, العىس حات, ماراپات يەگەرى اتانادى. ءوز سالاسىنىڭ ۇزدىگى بولا ءبىلدى. «تسەلينەنەرگو» مەكەمەسى قىزمەتكەرلەرى اراسىنداعى رەسپۋبليكالىق, قالالىق جانە وبلىستىق جارىستاردىڭ بىرنەشە مارتە جەڭىمپازى بولدى. كومپانيانىڭ دامۋىنا ۇلكەن ۇلەس قوسقان ۇسەنۇلىنىڭ فوتوسۋرەتى ءالى كۇنگە دەيىن كاسىپورىننىڭ «قۇرمەت تاقتاسىنا» ءىلۋلى.
كەيىن اناسىنىڭ ەڭبەك جولىن قىزى دامەتكەن اداحمانوۆا جالعاستىردى. ول «استانا-رەك» مەكەمەسىندە 1980 جىلدان بەرى ەڭبەك ەتىپ كەلەدى. «مەن وقۋىمدى اياقتاعاننان كەيىن, بىردەن قالالىق ەلەكتر جەلىسىنە كەلدىم. مىنە, سودان بەرى قاراپ وتىرسام 36 جىل وتە شىعىپتى. ءوندىرىس تابالدىرىعىن العاش اتتاعان كۇننەن بەرى انامنىڭ ءبىر كىسىدەي ەڭبەگى سىڭگەن, قولتاڭباسى قالعان كاسىپورىندا جۇمىس ىستەپ كەلەمىن. بۇل – مەن ءۇشىن ۇلكەن قۋانىش. راسىن ايتۋ كەرەك, ءبىر مەكەمەدە بۇتىندەي ءبىر اۋلەتتەن 8 ادام ەڭبەك ەتۋ دەگەن وتە سيرەك كەزدەسەتىن جاعداي شىعار دەپ ويلايمىن. بۇل ءوندىرىس ورنىندا ءار جىلدارى سىزدىقوۆتار اۋلەتىنەن تاعى ءۇش اعامىز ەڭبەك ەتتى. سونىڭ ءبىرى – مۇحامەدجان ۇسەنۇلى. 1993 جىلدان 2015 جىلعا دەيىن جۇمىس ىستەدى. قالي اعامىز وسى جەردە 1976 جىلدان بەرى ەڭبەك ەتىپ كەلەدى, قازىر اعا شەبەر. ەلۋباي ۇسەنۇلى دا «استانا-رەك» مەكەمەسىنىڭ بىلىكتى تەحنيكتەرىنىڭ ءبىرى» دەيدى دامەتكەن قۇلتاسقىزى.
بۇگىندە اجەسى نەگىزىن قالاپ كەتكەن ەنەرگەتيكتەر جولىن سىزدىقوۆتار اۋلەتىنىڭ قوس بىردەي نەمەرەسى جالعاستىرىپ كەلەدى. 1986 جىلدان بەرى اتالعان كاسىپورىندا قىزمەت ەتەتىن ساكەن سىزدىقوۆ قازىر قىزمەت باسشىسىنىڭ ورىنباسارى لاۋازىمىن اتقارادى. اۋلەتتىڭ ەڭ كەنجە مامانى – دانيار. سولتۇستىك قازاقستان ۋنيۆەرسيتەتىنىڭ تۇلەگى. ول دا «استانا-رەك» قابىرعاسىندا 2007 جىلدان بەرى جۇمىس ىستەيدى. قىزمەتى – ديسپەتچەر.
بۇركىت نۇراسىل