اۆتوشەرۋ جولعا شىعادى
قر تاۋەلسىزدىگىنىڭ 25 جىلدىعى جانە ەكىنشى دۇنيەجۇزىلىك سوعىس جىلدارى العاشقى اسكەري قۇرامانىڭ قۇرىلعانىنا 75 جىل تولۋىنا وراي «نۇر وتان» پارتياسى استانا قالالىق فيليالى مەن «گەنەرالدار كەڭەسى» قوعامدىق بىرلەستىگىنىڭ ۇيىمداستىرۋىمەن «ۇلى دالا ازاماتتارى» اتتى رەسپۋبليكالىق اۆتوشەرۋ جولعا شىعادى.
– بۇگىن – تاريحي كۇن. وسىدان ءدال 75 جىل بۇرىن كەڭەس وداعىنا تۇتقيىلدان شابۋىل جاسادى. بەيبىت ءومىردىڭ تىنىشتىعى بۇزىلدى. سول سوعىسقا قازاقستاندىقتاردىڭ قوسقان ۇلەسى زور. ەلىمىزدەن ءبىر ميلليوننان اسا ەر-ازامات مايدانعا الىندى.
ونىڭ 600-دەن استامى قاندى قىرعىندا كوز جۇمدى. بۇگىندە ۇلى وتان سوعىسى جايىندا جازىلعان تاريحي دەرەكتەردىڭ شىندىعى ەندى ايتىلىپ جاتىر. ماسەلەن, جەڭىستىڭ 50 جىلدىق مەرەكەسىندە برەست وبلىسى گۋبەرناتورىنىڭ بايانداماسىن تىڭداعان ەدىم. سوندا ول كىسى برەست قامالىن قورعاعانداردىڭ سەكسەن پايىزى ورتا ازيا مەن قازاقستاندىق جاۋىنگەرلەر بولعانىن ايتادى. ماسكەۋ تۇبىندە ءبىزدىڭ اتالارمىز ەرەن ەرلىكتىڭ ۇلگىسىن كورسەتتى. دەمەك, ءبىز وسىنداي ءباھادۇر بابالارىمىزدى ەش ۇمىتپاعانىمىز ءجون. سوندىقتان بۇگىنگى جاستار اتالار ەرلىگىن قۇرمەتتەپ, دارىپتەپ ءجۇرسىن دەپ, «ارداگەرلەردى ارداقتايىق» دەپ اتالاتىن پارتيا جوباسى اياسىندا اۆتوشەرۋدى ۇيىمداستىرىپ وتىرمىز, – دەدى «نۇر وتان» پارتياسى استانا قالالىق فيليالى توراعاسىنىڭ ءبىرىنشى ەدىل مامىتبەكوۆ.
ال «گەنەرالدار كەڭەسى» رەسپۋبليكالىق قوعامدىق بىرلەستىگىنىڭ وكىلى, گەنەرال-مايور مارات ماردەنوۆتىڭ ايتۋىنشا, اۆتوشەرۋ 4 شىلدەدە الماتىدان شىعىپ, قىرعىز ەلىنىڭ باس قالاسى ءبىشكەككە ايالداپ, ودان كەيىن ەلىمىزدىڭ كوپتەگەن قالالارىن ارالاعاننان كەيىن 8 شىلدە كۇنى ەلورداعا كەلەدى. يگىلىكتى شارا 12 شىلدەدە اياقتالادى.
ازامات ەسەنجول