ەسىل اۋدانىنىڭ اكىمى تولەگەن زاكاريانوۆ حالىقپەن وتكەن كەزدەسۋلەرىندە اۋداننىڭ وتكەن جىلداعى جەتكەن جەتىستىكتەرىنە توقتالىپ, باستى سالالار بويىنشا اتقارىلىپ جاتقان جۇمىستارعا شولۋ جاسادى. جيىنعا استانا قالاسى اكىمىنىڭ ورىنباسارى ەرمەك امانشاەۆ پەن قالالىق ءماسليحات دەپۋتاتتارى, باسقارما باسشىلارى قاتىستى.
ادەتتەگىدەي, تۇرعىنداردىڭ ساۋالى جاڭادان جول سالىنىپ, عيماراتتارى بوي تۇزەپ, اۋلالارى اباتتانىپ كەلە جاتقان اۋداننىڭ تۇيتكىلدى ماسەلەلەرىنە باعىتتالدى. بۇل رەتتە, ارينە, قوعامدىق جولاۋشىلار تاسىمالى قىزمەتى, كوشەلەردى قاردان تازالاۋ, كوممۋنالدى قىزمەت ساپاسىنا باستى نازار اۋدارىلدى. اۋدانداعى جاڭادان بوي كوتەرگەن «جاعالاۋ» شاعىن اۋدانىنا حالىقتىڭ كەلىپ قونىستانعانىنا كوپ بولا قويعان جوق. تۇرعىن ءۇي الابىنىڭ اۋقىمى تولعان سايىن تۇرمىستىڭ ماسەلەلەرى دە قىلاڭ بەرىپ قالادى. وسىنداعى №78 مەكتەپتە وتكەن جيىندا «كريستالل» تۇرعىن ءۇي كەشەنىنىڭ كرانىنان سۋ اقپاي قالاتىن كەزدەرى ءجيى بولاتىنىن ايتتى. تۇرعىندار بۇگىن عانا ەمەس, بىلتىردان بەرى ارىزدانىپ, جاۋاپتى ورگانداردىڭ قۇلاعىن جاۋىر ەتكەن. الايدا «باياعى جارتاس سول جارتاس» دەمەكشى, جاعداي ودان سايىن قيىنداعان. بۇرىندارى دەمالىس كۇندەرىندە سۋدان قاعىلىپ وتىرسا, قازىر اپتانىڭ جەتى كۇنىنىڭ بارىندە دە سۋ سارقىلىپ قالاتىن جايت جيىلەپ كەتكەن. تۇرعىندار قايىم مۇحامەدحانوۆ كوشەسىمەن قاشان كولىك جۇرەدى دەپ وتىر. جول اشىلدى, اتاقتى عالىمنىڭ اتى بەرىلدى, ايالداما ورناتتى, ال ازىرگە قوعامدىق كولىكتىڭ قاراسى كورىنبەيدى. تۇرعىندار تالابىنا قۇلاق تۇرگەن كولىك جانە جول-كولىك ينفراقۇرىلىمىن دامىتۋ باسقارماسىنىڭ وكىلدەرى 10 اقپانعا دەيىن ماسەلە شەشىلەدى دەپ ۋادە ەتتى.
«كوش جۇرە تۇزەلەدى» دەسەك تە, ە-15 جانە ە-16 كوشەلەرىندەگى اۆتوبۋس ايالدامالارى تۇرعىن ۇيلەردەن ءبىرشاما قاشىق ورنالاسقان. قىستىڭ ايازىندا بۇرسەڭدەگەن تۇرعىندار ايالداماعا جەتەم دەگەنشە ابىگەرگە ءتۇسىپ ءجۇر. مۇمكىندىگى شەكتەۋلى ازاماتتاردىڭ جايى تىپتەن ايانىشتى. قوعامدىق كولىكتىڭ جۇرگىزۋشىلەرى دە جولدى قىسقارتىپ, ايالدامالاردان اينالىپ وتەتىن قۋلىققا كوشىپتى. ول تۋرالى ە-16 كوشەسىندەگى 2-ءۇيدىڭ تۇرعىنى ايتىپ بەردى. اتاپ ايتقاندا, №61 اۆتوبۋس جۇرگىزۋشىلەرى №81 مەكتەپتىڭ جانىنا عانا توقتاپ, ايالدامانىڭ اقىرعى نۇكتەسىن اينالىپ ءوتىپ, كەرى قايتىپ جۇرەتىن ادەتتى شىعارىپتى. كوپ قاباتتى تۇرعىن ۇيلەرىنە دەيىن جولاۋشىلاردى جەتكىزىپ تاستاۋعا مىندەتتى بولسا دا, ونشا قۇلىقتى ەمەس. ال ايالدامالاردىڭ اراسى ءبىراز جەر. اكىم, ارينە, ءاربىر كولىكتىڭ جۇرگىزۋشىسىن اڭدىپ وتىرا المايدى. مۇنداي جاعدايدا ازاماتتىق بەلسەندىلىك كورسەتىپ, باعىتىنان تايعان اۆتوبۋستىڭ مەملەكەتتىك ءنومىرى مەن جۇرگىزۋشىنىڭ اتى-ءجونىن ءبىلىپ, ءتيىستى ورىندارعا شۇعىل حابارلاڭىزدار دەپ اكىم سالماقتى تۇرعىنداردىڭ وزىنە تاستادى.
«قۇلاگەر» تۇرعىن ءۇي كەشەنىندە 79 پاتەر بار. جاڭا قونىس تويىن تويلاعانداردىڭ قۋانىشى سۋ سەپكەندەي باسىلعان سياقتى. ءۇش جىلعا جەتپەي جاۋىندى كۇندەرى ءۇيدىڭ توبەسىنەن سۋ اعىپ, بالكوندارىن دا سۋ الا باستاعان. ءۇيدى پايدالانۋعا بەرگەن قۇرىلىسشىلار كەمشىلىكتى جويۋ ءۇشىن قولىنىڭ ۇشىن دا قيمىلداتپاعان. تۇرعىندار كىمگە ارىزىن ايتارىن بىلمەي اڭتارىلۋدا. اۋدان اكىمى بۇل ماسەلەنى كوپ ۇزاتپاي, تۇرعىندار مەن جاۋاپتى كومپانيا وكىلدەرىن جولىقتىرىپ, بىرلەسە شەشۋ قاجەتتىگىن جەتكىزدى.
جاڭا كوشەلەردە قار قاشان تازالانادى دەيدى تۇرعىندار. كوكتەم دە جاقىنداپ قالدى, ەرتەڭ كۇن جىلىسىمەن جينالعان قار ەرىپ, ەسىمىزدى شىعارماي ما دەگەن تۇرعىننىڭ ساۋالىنا اۋدان اكىمى ءمان-جايدى ءتۇسىندىردى. «اۋداننىڭ جاڭا كوشەلەرىنىڭ كەيبىرى قالا بالانسىنا كىرمەگەندىكتەن, قار تازالاۋعا قارجى بولىنبەگەن. سوعان قاراماستان, كەشىكتىرىلسە دە قار كۇرەلىپ جاتىر. الداعى ۋاقىتتا دا بۇل جۇمىس توقتامايدى» دەپ جاۋاپ بەردى.
