بيىلعى اقپان ايى اقىرىپ كەلدى. الدىمەن بوران, ونىڭ سوڭى قىزىلشۇناق ايازعا ۇلاسىپ, ادامداردى ءبىراز ابىگەرگە سالدى. مەكتەپ وقۋشىلارى ساباقتان بوساتىلىپ, جىلۋ مەكەمەلەرىنىڭ جۇمىسى كۇشەيتىلدى. وسى توتەنشە جاعدايعا بايلانىستى ەلوردا باسشىسى باقىت سۇلتانوۆ تۇرعىنداردى ءبىر-بىرىنە جاناشىرلىق كورسەتۋگە ۇندەۋ جولدادى.
شىن مانىندە, وسى ايازدى كۇندەرى ەلوردا حالقىنىڭ بىرلىگى مەن قامقورلىعى ەرەكشە بولدى. ماسەلەن, باس شاھارداعى مەشىتتەر «استانا – مەيىرىمدىلىك قالا» قايىرىمدىلىق اكتسياسى اياسىندا مۇقتاج وتباسىلارعا كومىر مەن ازىق-تۇلىك الىپ بەرىپ, دالادا جۇمىس ىستەپ جۇرگەن ادامدارعا ىستىق تاماق مەن شاي تاراتتى. سونداي-اق ايالدامادا توڭىپ تۇرعان ادامداردى ۇيلەرىنە اپارىپ تاستادى. اسىرەسە, «نۇر استانا» مەشىتىنىڭ قىزمەتكەرلەرى مەن باسقا دا ازاماتتار بىرىگىپ, كومەككە ءزارۋ ادامدارعا 18 «تەگىن تاكسي» كولىگىن ۇيىمداستىردى.
7 اقپان كۇنى قالالىق اكىمدىك «ASTANA TAXI» مەكەمەسىمەن بىرلەسىپ «جىلى ساپار» اكتسياسىن وتكىزدى. «ASTANA TAXI» جۇرگىزۋشىلەرى قالالىق اۆتوبۋس باعدارلارىمەن ءجۇرىپ, جولاۋشىلاردى ۇيلەرىنە تەگىن جەتكىزدى. ال كەشە سول جاعالاۋداعى «نۇرجول» اۆتوتۇراعى كۇننىڭ سۋىقتىعىنا بايلانىستى تەگىن قىزمەت كورسەتتى.
بۇل يگىلىكتى باستامانى ءىرى جانە شاعىن بيزنەس وكىلدەرى دە ءىلىپ اكەتتى. «Asia Park» ويىن-ساۋىق ورتالىعى تەگىن شاي ۇلەستىرۋ اكتسياسىن جاريالاپ, ادامدارعا ىستىق شاي بەردى. مۇنداي ىزگىلىكتى شارانى كاسىپكەر سياۆۋش تايروۆ پەن ۆيللايات كاريموۆ تە جاسادى. سونداي-اق كولىگى قاتىپ قالعان تۇرعىندارعا ماشيناسىن تەگىن قىزدىرىپ بەرگەن ازاماتتار دا بولدى.
قىسقاسى, از كۇنگى اۋا رايىنىڭ قولايسىزدىعى ەلوردالىقتاردى ءبىر-بىرىنە جاقىنداتا ءتۇستى.
