جاقىندا لوندون قالاسىنداعى گيننەس رەكوردتار كىتابىنىڭ شتاب-پاتەرىنەن كەلگەن سۋپەرۆايزەر «ەلدىڭ ەڭ باستى ۇلتتىق تاعامىن دايىنداۋ» بويىنشا دۇنيەجۇزىلىك رەكوردتى تىركەدى. استانا تويىنا ارنالىپ كوتەرىلگەن قازانعا 736,5 كگ تارتاتىن ءۇش جىلقىنىڭ ەتى اسىلدى. ۇلكەن استى دايىنداۋعا قىرىققا جۋىق اسپاز بىلەك سىبانا كىرىستى, قامىرىن جايىپ, تۇزدىعىن جاسادى. سوڭى ۇلان-اسىر مەرەكەگە ۇلاسقان ۋاقيعانىڭ ورتاسىندا بولىپ, بىزدەر دە باس تاعامنان ءدام تاتقان ەدىك.
جالپى, دايىنداۋ ءتاسىلى ءبىر بولعانىمەن قازانى بار ءار ءۇيدىڭ بيكەسى ەتتى ارقالاي اسادى. قاراپايىم كورىنگەنمەن, ەت اسۋدىڭ دا ەرەكشەلىكتەرى بار. كەيدە الدىمىزعا ءبىر قايناۋى كەم كەلگەندە, «قايران قور بولعان اس» دەپ ويلايسىز. كەيبىر كەزدەرى ءيىسى بۇرقىراپ, جىلقىنىڭ قارنىمەن بىرگە اسىلعان ەت كەلگەندە, تاباققا قول سوزباس-تان «قارنىمىز» اشىپ قالادى. ال تىم ءپىسىپ كەتسە دە «بەسبارماقتان» بەرەكە كەتەدى. قۇنارى سورپاعا شىعىپ, جىپكە اينالعان قىزىلدىڭ ءدامى قالمايدى. بۇل كوبىنە, مەيرامحانالاردا, تويحانالاردا اسىلعان استىڭ كىناراتى. مۇنىڭ ءبارى ەت اسۋدىڭ قۇپياسىن بىلمەگەندىكتەن, ونى دايىنداۋ تەحنولوگياسىن ساقتاماعاندىقتان بولىپ جاتادى.
ءداستۇر بويىنشا, كوپشىلىككە ارنالىپ سويىلاتىن جىلقىنى كۇنى بۇرىن جايعاپ, جىلىكتەردى بۇزىپ, ەتىن تۇزداپ, جىلى قانىنان تازارتىپ, سورعىتىپ الاتىن. قازىسىن دا كۇنى بۇرىن اينالدىرادى. مۇشەلەنگەن ەت جۇقالاپ كەسىلىپ, اراسىنا تۇز سەبىلەتىن. سورعىتىلعان ەتتىڭ كوبىگى از بولىپ, مولدىرەپ تۇرادى. ەت ءبىر قايناعاندا سورپانىڭ بەتىنە شىققان كوبىكتى الىپ, وتتى سودان كەيىن كۇشەيتەدى. سەبەبى, قاتتى وتتا ساقىرلاپ قايناعان ەت قاتتى بولىپ, جەۋگە سۇيكىمسىز بولادى. وتى باسەڭ قازاندا قايناعان اس بابىمەن پىسەدى.
ءىرى مالدىڭ ەتى ساعاتتاپ قايناعان سوڭ عانا پىسەدى. ىدىستىڭ تۇبىندەگى ەت ءپىسىپ, بەتىندەگى ەتتىڭ قىزۋى از بولسا دا ەتتىڭ بابى الا-قۇلا بولادى. سول سەبەپتى بىرەر ساعات وتكەننەن كەيىن ەتتى اۋدارىپ, استىنداعىسىن ۇستىنە شىعارىپ, ءبىر تەكسەرىپ العاننىڭ زيانى جوق. سول سياقتى قازىنى بولەك پىسىرگەن ءجون. ويتكەنى, ىشەككە تىققان ەتتىڭ ءپىسۋ پروتسەسى ءجاي ەتتەن گورى ۇزاعىراق. سونداي-اق, قارتانى دا ۇزاق قايناتقان دۇرىس. قارىندى سىيلى قوناققا اسپايتىنىن ەستەن شىعارىپ جاتامىز. تۇزدىق جاساۋدىڭ دا قۇپياسى بار. كوپ جەردە پيازدى ساقينالاپ جۋان ەتىپ كەسەدى. كوركى كەلگەنمەن, شيكى پياز كوبىنىڭ كوڭىلىنەن شىقپايدى. جۇقالاپ تۋرالعان تۇزدىق تا ەزىلىپ كەتىپ جاتادى. ونىڭ بابىن اسپازدىڭ قالاۋىنا قالدىرايىق. قارا بۇرىش تۇزدىقتىڭ ءدامىن كەلتىرەدى. سورپانى قۇرتپەن ەزىپ ىشكەن جاقسى. ەتتىڭ قامىرى جۇقا ءارى تەگىس جايىلۋى ءۇشىن يلەپ قويعان جاقسى. قايتا-قايتا باستىرىپ, ءيى قاندى دەگەندە ۇندى ازداپ سالىپ جايعان دۇرىس, ەگەر ۇن كوپ بولسا, سورپا قويۋلانىپ, تىم قۇنارلى بولىپ كەتەدى.
گيننەس كىتابىنا دا كىرگىزىپ ۇلگەرگەن, تىسكە كىرمەسە, تۇسكە كىرەتىن ۇلتتىق تاعامىمىزدىڭ قالاي بولسا سولاي جاسالۋىنا جول بەرمەۋىمىز كەرەك سياقتى.
ايگۇل ۋايسوۆا
