قالا اكىمدىگى الەۋمەتتىك ماڭىزى زور ازىق-تۇلىك تاۋارلارىنىڭ باعاسىن تۇراقتاندىرۋ ماسەلەسىنە ەرەكشە كوڭىل ءبولىپ وتىر. سونىڭ اسەرى شىعار, وتكەن اپتادا الەۋمەتتىك ماڭىزى زور ازىق-تۇلىك تاۋارلارى باعاسىنىڭ يندەكسى بويىنشا نۇر-سۇلتان قالاسى 99,8 پايىز كورسەتكىشپەن ەلىمىزدىڭ وڭىرلەرى اراسىنان 2-ورىنعا شىقتى.
مىسالعا, وتكەن اپتادا 1 سۇرىپتى ۇننىڭ باعاسى 1,2 پايىزعا, ءسۇت 2,5 پايىزعا, كارتوپ 1,6 پايىزعا, جۇمىرتقا 2 پايىزعا قىمباتتاسا, قاراقۇمىق جارماسى 10,1 پايىزعا, كۇنباعىس مايى 0,4 پايىزعا, ايران 0,6 پايىزعا, ءسابىز 1,5 پايىزعا, قىرىققابات 0,7 پايىزعا ارزاندادى.
الەۋمەتتىك ماڭىزى زور ازىق-تۇلىك تاۋارلارىنىڭ باعاسىن تۇراقتاندىرۋعا قاتىستى قالا اكىمدىگى بىرنەشە باعىتتاردا ءىس-شارالاردى جۇزەگە اسىرۋدا. بىرىنشىدەن, 2019 جىلدان بەرى جەرگىلىكتى بيۋدجەتتەن 8,6 ملرد تەڭگە ءبولىنىپ كەلەدى. بۇل ەلىمىز بويىنشا ەڭ جوعارعى كورسەتكىش (شىمكەنت – 4,7 ملرد تەڭگە, كوكشەتاۋ – 2,1 ملرد تەڭگە, اقتوبە – 2 ملرد تەڭگە, تالدىقورعان – 3 ملرد تەڭگە, اتىراۋ – 1,5 ملرد تەڭگە, تاراز – 1,8 ملرد تەڭگە, قوستاناي 1,9 ملرد تەڭگە بولگەن).
ەكىنشى باعىت – «اينالىم مەحانيزمى» بويىنشا 24 كاسىپكەرلىك سۋبەكتىلەرىنە قارىز اقشا بەرىلدى. سونىڭ ناتيجەسىندە ەلورداداعى ءىرى ساۋدا نىساندارىندا 19 پوزيتسيا بويىنشا الەۋمەتتىك ماڭىزى زور ازىق-تۇلىك تاۋارلارىنىڭ باعاسى تۇراقتاندى. ءۇشىنشى باعىت – تومەن باعامەن 15 مىڭ توننا جەمىس-جيدەك جەتكىزۋ ءۇشىن قاراعاندى, پاۆلودار, اقمولا وبلىسىنىڭ اۋىل شارۋاشىلىعى ونىمدەرىن وندىرۋشىلەرمەن فورۆاردتىق كەلىسىمشارت جاسالدى. بۇل ونىمدەر قالاداعى «ۆكۋس مارت», «انۆار», «استىقجان», «AQMOL», «ايان», «Magnum Cash&Carry» سياقتى ءىرى ساۋدا ورتالىقتارىندا ساتىلادى. ەڭ باستىسى, «ەگىستىكتەن سورەگە دەيىن» دەگەن مەحانيزمى جۇزەگە اسىرىلادى.
تاعى ءبىر باعىت – جىل بويى وتەتىن جارمەڭكەلەر اشۋ. وسىنداي جارمەڭكەلەر قالانىڭ ءاربىر اۋدانىندا اشىلادى. بارلىعى 8 پاۆيلون سالىنادى. العاشقى پاۆيلون 2021 جىلدىڭ سوڭىنا دەيىن اشىلدى. قالعاندارى 2022 جىلى اشىلىپ, «ەگىستىكتەن سورەگە دەيىن» قاعيداتى بويىنشا ونىمدەردى دەلدالسىز تۇتىنۋشىعا جەتكىزۋگە مۇمكىندىك بەرەدى.
