رەسەيدىڭ پەنزا وبلىسى گۋبەرناتورى يۆان بەلوزەرتسەۆ باستاعان دەلەگاتسيا استاناعا ءۇش كۇندىك رەسمي ساپارمەن كەلدى. ونداعى باستى ماقسات – ەكى ەل اراسىنداعى ەكونوميكالىق جانە گۋمانيتارلىق ارىپتەستىكتى نىعايتۋ.
اۋەلى قوناقتار ەلوردا اكىمى ادىلبەك جاقسىبەكوۆپەن كەزدەستى. شاھار باسشىسى ەكىجاقتى ساۋدا-ەكونوميكالىق جانە الەۋمەتتىك-مادەني قارىم-قاتىناستى دامىتۋعا مەيلىنشە مۇددەلى ەكەندىگىن جەتكىزدى.
«ءبىز پەنزا وبلىسىمەن ءوزارا بايلانىستى تەرەڭدەتۋگە جانە جۇيەلى تۇردە كەڭەيتۋگە كوپ ءمان بەرەمىز» دەدى ادىلبەك جاقسىبەكوۆ.
پەنزا وبلىسىنىڭ گۋبەرناتورى ەلوردا اكىمىنە قوناقجايلىعى مەن قازاقستاننىڭ جاس استاناسىنىڭ دامۋىمەن تانىسۋعا مۇمكىندىك بەرگەنى ءۇشىن العىس ايتتى.
– بۇگىندە استانا ۇلكەن جەتىستىككە قول جەتكىزدى. مۇنداعى زاماناۋي تۇرعىن ءۇي, مادەنيەت جانە سپورت نىساندارى قۇرىلىسىنىڭ قارقىنى تاڭ قالدىرادى. كەشە قالانى ارالاعان كەزدە وسىعان تاعى دا كوز جەتكىزدىك. بۇل شاھار ادام كاپيتالىن تارتاتىن ورتالىققا اينالعانى داۋسىز, – دەدى يۆان بەلوزەرتسەۆ.
رەسەيلىك دەلەگاتسيا قۇرامىندا پەنزا وبلىسىنىڭ زاڭ شىعاراتىن جينالىسى توراعاسى ۆالەري ليدين, مينيسترلىكتەر مەن ۆەدومستۆو وكىلدەرى, ىسكەرلىك قوعامداستىقتار مەن ساۋدا-ونەركاسىپتىك پالاتا مۇشەلەرى, كاسىپورىندار, قارجىلىق جانە ءبىلىم بەرۋ مەكەمەلەرىنىڭ باسشىلارى بار.
ساپار بارىسىندا مەيماندار «ەكسپو – 2017» كورمە كەشەنىنە بارىپ, اۋماقتاعى وبەكتىلەرمەن تانىستى. پەنزا وبلىسىنىڭ گۋبەرناتورى استانا قالاسى اكىمىنىڭ كەلەر جىلعى كورمەگە شاقىرتۋىن قابىل الىپ, ماڭىزدى شاراعا قۋانا كەلەتىندەرىن جەتكىزدى. سونداي-اق, تاراپتار حالىقارالىق مامانداندىرىلعان كورمە شەڭبەرىندە پەنزا وبلىسىنىڭ استاناداعى كۇندەرىن وتكىزۋگە ۋاعدالاستى.
