استانادا جىل سايىن جولدار مەن كوشەلەر جوندەلەدى. بىراق ولاردىڭ كوبى كوكتەم شىعا ويىلىپ جاتادى. بيىل دا ءبىر جىلعا شىداماي كوپتەگەن جولدىڭ استاڭ-كەستەڭى شىقتى. قوماقتى قاراجاتقا توسەلگەن اسفالتتىڭ ساپاسىزدىعى قالا اكىمىنىڭ دە نازارىنا ىلىگىپ, ول تيىستى مەكەمەگە ءبىر ايدىڭ ىشىندە بارلىق كوشەنى رەتكە كەلتىرۋدى قاتاڭ تاپسىردى.
استانادا جولدار مەن كوشەلەردىڭ ساپاسى وزەكتى ماسەلەنىڭ ءبىرى بولىپ تۇر. كۇن جىلىنا قاربالاسا جۇمىس ىستەيتىن مەردىگەر كومپانيالاردىڭ ءوز ءمىندەتتەرىن قانشالىقتى ادال اتقارعانى كەلەسى جىلى كورىنىپ قالادى. بيىل دا قار ەري سالىسىمەن ءجوندەلگەن جولداردىڭ شيكىلىگى ءبىلىندى. مىسالى, ءوزىمىز كۇندە ءجۇرەتىن اسان قايعى كوشەسى بىلتىر عانا جوندەلگەن ەدى. ويدىم-ويدىم بولىپ جاتاتىن كوشەمىزگە اسفالت توسەلىپ, قۋانىپ قالعان ەدىك. بىراق الگى ادەمى كورىنگەن جولىمىز كوپ ۇزاماي ويىلدى دا قالدى. تۋرا بۇرىنعى «تاز قالپىنا» ءتۇستى. «كەرەمەت-اق جوندەپتى» دەگەن كەكەسىنمەن, ويلى-شۇڭقىرلاردان قاشىپ, جولى تاۋىرلەۋ قارسى باعىتپەن جۇرۋگە ءماجبۇرمىز.
البەتتە, ءبىر جولدى ەكىنشى رەت جوندەۋ تۇرعىندارعا دا, بيلىككە دە ءتيىمدى ەمەس. سوندىقتان قالا اكىمى جولداردىڭ ساپاسىنا ايرىقشا ءمان بەرۋدى تاپسىردى. ەندى ەلوردانىڭ ويدىم-ويدىم كوشەلەرى ءبىر ايدىڭ ىشىندە قالىپقا كەلۋى ءتيىس. ال جۇمىسىنا نەمقۇرايلى قاراعان مەردىگەر كومپانيالار كەم-كەتىكتى قايتادان تۇزەتۋگە مىندەتتى.
استانا قالاسى اۆتوموبيل جولدارى باسقارماسىنىڭ ءبولىم باسشىسى اسقار يساكوۆتىڭ مالىمەتىنشە, بۇگىندە 117 كوشەنىڭ جاعدايىنا بارلاۋ جۇرگىزىلگەن.سونىڭ 93-ىندە ويلى-شۇڭقىرلاردى تەگىستەۋ, 23-ىندە – ورتاشا جوندەۋ جۇمىستارى جۇرگىزىلەتىن بولدى. بۇل شارۋالاردىڭ ءبارى اكىم ايتقان مەرزىمدە ورىندالماق. الايدا, اۋا رايى جاڭبىرلى بولسا, بۇل ۋاقىت سوزىلۋى مۇمكىن.
اسقار يساكوۆتىڭ ايتۋىنشا, جوندەۋ جۇمىستارىنا جەگىلىكتى بيۋدجەتتەن 5 ملرد تەڭگە ءبولىنىپ وتىر. نەگىزىنەن ويلى-شۇڭقىرى كوپ كوشەلەرگە كوبىرەك كوڭىل بولىنبەك.
قىمبات توقتامۇرات
