كەشە قر پرەزيدەنتى جانىنداعى جاڭعىرتۋ جونىندەگى ۇلتتىق كوميسسيا مۇشەلەرىنىڭ قاتىسۋىمەن ءباسپاسوز ءماسليحاتى ءوتتى. مەملەكەت باسشىسى نۇرسۇلتان نازارباەۆ ايقىنداعان ۇلت جوسپارىنان تۋىنداعان «100 ناقتى قادام» بويىنشا جۇزەگە اسىرىلا باستاعان ىس-شارالار جايىندا ەگجەي-تەگجەيلى ايتىلدى.
ءومىر ءسۇرۋ ساپاسىن ورلەتەدى
ەلدىك مۇراتىمىزدى, مەملەكەتىمىزدىڭ كەلەشەككە كوزدەلگەن دامۋ جولىن ايقىنداعان ۇلت جوسپارىنىڭ جۇزەگە اسىرىلا باستاعان قادامدارى تۋرالى اڭگىمەنى باستاعان قر پرەمەر-ءمينيسترىنىڭ ورىنباسارى داريعا نازارباەۆا قازاقستاندىقتار ۇلت جوسپارىن جۇزەگە اسىرۋدان تۋىندايتىن مۇمكىنشىلىكتەردى ءبىلۋى ءتيىس ەكەنىن ايتتى. وسى ورايدا «ۇلت جوسپارىنىڭ تابىستى جۇزەگە اسىرىلۋى قازاقستانعا دامۋدىڭ جاڭا دەڭگەيىنە كوتەرىلۋگە, ەكونوميكالىق ءوسىم ءۇشىن قولايلى جاعداي جاساۋعا جانە بارشا قازاقستاندىقتاردىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى. ۇلت جوسپارى كەلەشەكتە ەل تۇرعىندارىنىڭ ءومىر ءسۇرۋ دەڭگەيىن بۇگىنگى تاڭدا وركەنيەتتى ەلدەردە ورىن الىپ وتىرعان جوعارى ءومىر ءسۇرۋ دەڭگەيى مەن ستاندارتتارىنا سايكەستەندىرۋگە باعىتتالعان» دەپ اتاپ ءوتتى ۇكىمەت باسشىسىنىڭ ورىنباسارى.
داريعا نازارباەۆا بيىلعى جىلدىڭ باسىنان بەرى قازاقستان جاڭا قۇقىقتىق جانە ينستيتۋتتىق ورتا جاعدايىندا ءومىر ءسۇرىپ جاتقانىن, وسى ورايدا 59 زاڭ مەن 400-دەن اسا زاڭنامالىق اكتىلەر قابىلدانعانىن, اتاپ ايتقاندا مەملەكەتتىك قىزمەتكە ىرىكتەۋدىڭ ءۇش ساتىلى جۇيەسىنە كوشۋ جۇزەگە اسىرىلعانىن, كوماندالىق اۋىس-ءتۇيىستىڭ دوعارىلعانىن, سونىمەن قاتار ناتيجەگە سايكەس جالاقىمەن قامتاماسىز ەتەتىن اكىمشىلىك مەملەكەتتىك قىزمەتشىلەردى باعالاۋ ءادىسى ەنگىزىلگەنىن جەتكىزدى.
ينۆەستورعا يكەمدى قىزمەت
قر ۇلتتىق ەكونوميكا ءمينيسترى ەربولات دوساەۆ ۇلت جوسپارى اياسىندا جۇزەگە اسىرىلىپ جاتقان يندۋستريالدىق رەفورمالاردىڭ ناتيجەلەرى تۋرالى بايانداپ بەردى. «ەكونوميكالىق ىنتىماقتاستىق جانە دامۋ ۇيىمى ستاندارتتارىنا سايكەس كەلەتىن ينۆەستيتسيالىق احۋالدى قالىپتاستىرۋ ءۇشىن 2016 جىلدىڭ 1 قاڭتارىنان باستاپ ينۆەستورلارعا 350-دەن اسا مەملەكەتتىك قىزمەت كورسەتۋگە ارنالعان «ءبىر تەرەزە» قىزمەتى ىسكە قوسىلدى. ينۆەستورلاردى تارتۋ ماسەلەلەرى جونىندەگى ۇكىمەتتىك كەڭەس قۇرىلدى. وسىعان ۇقساس كەڭەستەر اكىمدەردىڭ باسشىلىعىمەن بارلىق وڭىرلەردە قۇرىلىپ, حالىققا قىزمەت كورسەتۋ ورتالىقتارىندا ينۆەستورلارعا قىزمەت كورسەتۋ سەكتورلارى ىسكە قوسىلدى» دەدى مينيستر ءسوز باسىندا.
ەلدىڭ ەكونوميكالىق سالاسىنا جاۋاپتى مينيستر, سونىمەن قاتار فارماتسەۆتيكا, اگروونەركاسىپ, تاۋ-كەن ءوندىرىسى, مەتاللۋرگيا, حيميا جانە قۇرىلىس ماتەريالدارى ءوندىرىسى بويىنشا 2,2 ملرد.اقش دوللارىنا 16 جوبا تارتۋ مەن ىسكە اسىرۋ بويىنشا جۇمىستار جۇرگىزىلگەنىن اتاپ كورسەتتى.
قازاقستان قۇرىلىس سالاسىندا ەۋروكود جۇيەسىنە كوشۋدى باستايدى. ءمينيستردىڭ ايتۋىنشا, قۇرىلىس سالاسىندا باستاپقى رۇقسات بەرۋ قۇجاتتارىن بەرۋ مەرزىمدەرى 40 كۇننەن 17 جۇمىس كۇنىنە دەيىن, ەسكيزدى جوبانى كەلىسۋ 60 كۇننەن 15 جۇمىس كۇنىنە دەيىن قىسقارتىلعان. ال قۇرىلىستىڭ باستالۋى تۋرالى حابارلامانى ءبىر كۇن ىشىندە ەلەكتروندى تۇردە بەرۋ قامتاماسىز ەتىلگەن. سونداي-اق, ساراپتامالىق جۇمىستاردىڭ رەتى ەداۋىر جەڭىلدەتىلگەن.
ەلىمىزدە سىرتقى ساۋدانى جۇرگىزۋ راسىمدەرى دە جەڭىلدەتىلدى. اتاپ ايتقاندا, ەكسپورتتىق-يمپورتتىق وپەراتسيالاردى جاساۋ كەزىندە قۇجاتتار سانى قىسقارتىلىپ وتىر. قارجى مينيسترلىگى ۇلتتىق كاسىپكەرلەر پالاتاسىمەن بىرلەسىپ, پوستكەدەندىك رەسىمدەۋ بويىنشا «300 ءىرى سالىق تولەۋشىگە ارنالعان جاسىل ءدالىز» ىلكىمدى جوباسىن ىسكە اسىرعان.
«استانا» حالىقارالىق قارجى ورتالىعى حالىقارالىق 3 قارجى ورتالىعىمەن ىنتىماقتاستىقتى باستاعان. اتاپ ايتقاندا, دۋباي قارجى ورتالىعى, لوندون-سيتي بريتاندىق كورپوراتسياسىمەن جانە كاتار قارجى ورتالىعىمەن ىسكەرلىك قارىم-قاتىناس ورناتىلعان.
سوت جۇيەسى جاڭارادى
ءباسپاسوز ءماسليحاتىندا زاڭنىڭ ۇستەمدىگىن قامتاماسىز ەتۋ باعىتى بويىنشا رەفورمالادى ىسكە اسىرۋ تۋرالى قر پرەزيدەنتى اكىمشىلىگى جەتەكشىسىنىڭ ورىنباسارى مارات بەكەتاەۆ بايانداپ بەردى. ەلىمىزدە وتكەن جىلمەن سالىستىرعاندا ازاماتتىق ءىس جۇرگىزۋدە پروكۋروردىڭ قاتىسۋى 35 پايىزعا قىسقارعان. سونىمەن قاتار, جەكە سوت ورىنداۋشىلاردىڭ ۋاكىلەتتىلىكتەرى دە ايتارلىقتاي كەڭەيگەن. وسى رەتتە م.بەكەتاەۆ «جىل باسىنان بەرى وتكەن ەكى جارىم اي ۋاقىتتا جەكەمەنشىك سوت ورىنداۋشىلارعا 250 مىڭ ءىس تۇسكەن. بۇل وتكەن جىلدىڭ سايكەس مەرزىمىمەن سالىستىرعاندا ەكى ەسە ارتىق كورسەتكىش. ال, ءوز كەزەگىندە, مەملەكەتتىك سوت ورىنداۋشىلارعا وسى جىلدىڭ ەكى ايىندا وتكەن جىلدىڭ سايكەس مەرزىمىمەن سالىستىرعاندا ءتورت ەسە كەم, ياعني, 47 مىڭ ءىس تۇسكەن. ءۇش جىل ىشىندە مەملەكەتتىك سوت ورىنداۋشىلاردىڭ سانى 70 پايىزعا قىسقارتىلادى» دەپ اتاپ ءوتتى. بۇگىنگى تاڭدا ەلىمىزدە سوت ءىسىن اشىق وتكىزۋ ماقساتىندا سوت زالدارىنداعى پروتسەستەردى بەينە جانە تاسپاعا جازۋعا مۇمكىندىك بەرەتىن جاڭا جۇيەمەن جابدىقتاۋ جۇمىسى جالعاسۋدا. قازىر وسىنداي جۇيەمەن سوت زالدارىنىڭ 75 پايىزى جابدىقتالعان. بۇل باعىتتاعى جۇمىس جىل سوڭىنا دەيىن تولىق اياقتالاتىن بولىپ وتىر.
بىرلىك پەن كەلىسىم
ۇلت جوسپارىنىڭ ءتورتىنشى باعىتى بويىنشا قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ اڭگىمەلەپ بەردى. ءبىزدىڭ ەلىمىزدە, مەملەكەت باسشىسى نۇرسۇلتان نازارباەۆتىڭ ۇستانىمىندا حالىقتىڭ بىرلىگى مەن كەلىسىمى ارقاشان باسىمدى قاعيدات بولىپ كەلەدى. وسى ورايدا ۇلت جوسپارى اياسىندا ەل ىشىندەگى بىرلىك پەن بىرتەكتىلىكتى قالىپتاستىرۋ ماقساتتارى قويىلعان. بۇگىنگى تاڭدا وسى ماقساتتاردى جۇزەگە اسىرۋ باعىتىندا 33 ءنورماتيۆتى اكت قابىلدانعان. پارلامەنت دەڭگەيىندە بەس زاڭ قابىلداندى. مەملەكەت باسشىسىنىڭ بەس جارلىعى مەن ۇكىمەتتىڭ ون ەكى قاۋلىسى قابىلدانىپ, العا قويىلعان ماقساتتاردىڭ جۇزەگە اسىرىلۋىنا نەگىز بولۋدا. بۇل تۇرعىدا جاڭا قوعامدىق سانانى قالىپتاستىرۋ جانە قازاقستاندىق مادەنيەتتى نىعايتۋ شارالارىن جۇرگىزۋدە قازاقستان حالقى اسسامبلەياسى جەتەكشى ءرول اتقارىپ وتىر.
ەلباسى نۇرسۇلتان نازارباەۆ ەل كەلەشەگىن ايقىنداۋشى رەتىندە ۇسىنعان جانە بۇگىنگى تاڭدا جۇزەگە اسىرىلىپ وتىرعان ۇلت جوسپارى بارشا قازاقستاندىقتاردىڭ ءومىر ساپاسىن جوعارى دەڭگەيگە كوتەرۋدى مۇرات تۇتقان داڭعىل جولدىڭ باستاماسى. يگىلىككە باستاعان ۇلى جول قازاق ەلىن وركەنيەتتىڭ ورىنە شىعارادى دەپ سەنىممەن قارايمىز. ەلىمىزدە جۇرگىزىلىپ جاتقان سەرپىندى ىستەرگە قاراپ وسىلاي ايتامىز.
عالىم قوجابەكوۆ
