5 ماۋسىم – بۇكىلالەمدىك قورشاعان ورتا كۇنىنە وراي «جاستار جەتىستىكتەرى» قوعامدىق قورى مەن «شەۆرون» كومپانياسى «ەكولوگيا بويىنشا بالالار بيزنەس-جوبالارى» اتتى ءVIىى رەسپۋبليكالىق بايقاۋدىڭ ۇزدىك جوبالارىنىڭ جارمەڭكە-كورمەسىن وتكىزدى.
سەگىز جىل قاتارىنان وتكىزىلىپ كەلە جاتقان بايقاۋعا بيىل ەلىمىزدىڭ بارلىق ايماقتارىنان 200-گە جۋىق جوبا ۇسىنىلدى. «شەۆرون» كورپوراتسياسىنىڭ ۇكىمەتپەن جانە قوعاممەن بايلانىس دەپارتامەنتى ديرەكتورىنىڭ ورىنباسارى جانبولات ۇسەنوۆ, قازاقستان رەسپۋبليكاسى قورشاعان ورتا جانە سۋ رەسۋرستارى ۆيتسە-ءمينيسترى بەكتاس مۇحامەدجانوۆ ولاردىڭ ەڭ تاڭداۋلىلارىن ارنايى ديپلومدارمەن جانە ماقتاۋ قاعازدارىمەن ماراپاتتادى. ال, ەكولوگيالىق يدەيالارىن ومىردە جۇزەگە اسىرۋ ءۇشىن 13 بالا جالپى كولەمى 1 800 000 تەڭگە اقشالاي گرانتتارعا يە بولدى.
وقۋشىلاردىڭ نازارىن ەكولوگيا ماسەلەلەرىنە جانە تابيعي بايلىقتى راتسيونالدى پايدالانۋعا اۋدارۋ ارقىلى الەۋمەتتىك جاۋاپكەرشىلىكتى, وزەكتى ەكولوگيالىق ماسەلەلەردى شەشۋدىڭ پراكتيكالىق داعدىلارىن دامىتۋ ماقساتىندا ۇيىمداستىرىلعان شارا بارىسىندا استانالىق ءمولدىر وڭلاسىن مەن ەرزات مايدانوۆ كۇندەلىكتى تۇرمىستا پايدالانۋ ءۇشىن اق جۋساننان ءبولىنىپ الىنعان ەفير مايىن قوسىپ, قوي مايى نەمەسە سيىردىڭ ءىش مايى ارقىلى دايىندالعان سابىندى تانىستىرسا, ەلورداداعى №48 مەكتەپ-ليتسەيىنىڭ 11-سىنىپ وقۋشىسى الەكساندرا شيبينسكايا مەكتەپتەگى اۋىزسۋدى تازارتۋ جانە ونىڭ ساپاسىن جاقسارتۋ ماقساتىندا تسەوليتتى سۇزگى جاساپ شىعارعان.
«سۇزگىنىڭ وسى ءتۇرىن پايدالانۋ ارقىلى اۋىزسۋدىڭ ساپاسى جاقساراتىن بولادى. مەكتەپتى سۋمەن قامتاماسىز ەتۋگە جۇمسالاتىن قارجى ۇنەمدەلەدى. تسەوليتتى سۇزگى ارقىلى تازالانعان اۋىزسۋىنىڭ قاتتىلىعى تومەن, ول ۇرىقتاردىڭ دامۋىنا جاقسى اسەر ەتەدى جانە ءبىر كلەتكالى بالدىرلاردىڭ دامۋ جىلدامدىعىن ازايتادى. سوندىقتان, بۇل سۋدى الدىن الا تۇندىرماستان مەكتەپتەگى بولمە وسىمدىكتەرىن سۋعارۋ ءۇشىن پايدالانۋعا بولادى» دەيدى ا.شيبينسكايا.
جەڭىمپازدار ەندى ءوز جوبالارىن جۇزەگە اسىرۋعا كىرىسەدى.
گۇلبارشىن وكەشقىزى
